[校園][愛情]《個女仔衝咗出馬路然後俾我救番》: 「第八章-歸來」

第八章

「嗶，嗶，嗶，嗶，嗶，」

比鬧鐘點醒咗我，我拎起電話睇9:14

嘩，原來已經9點幾，好彩今日返晏啫，我刷完牙，洗完面，就換衫落街食早餐，不過落街之前，我打咗比浩峰，問佢食唔食野，點知佢話
「.........好窮

」

Ok fine......因為我都試過

咁下一個電話我決定打蒨頤，正當我諗住禁落去嘅時候，我嘅身體停低咗，我諗緊打唔打好嘅時候，已經太遲，因為佢已經打咗過嚟，

「喂？」

「我啱啱訓醒肚餓啊，陪我食嘢得唔得啊

？」可能佢啱啱起身，佢把聲帶點稚氣，好似啲BB

「好呀，你出得門口打比我」

「嗯~知道！」

喺等佢嘅期間，我望住屋企部琴，我行咗埋去，打開咗部琴，如果喺側邊睇應該好型，起碼呢一秒前係，當我將所有情感諗住彈嗰一下........噠咗Q
利申：除咗唱歌，音樂乜都唔識

天外之音:主角啊主角，好心你唔識彈就咪搞啦

我:扮下型唔得咩

天外之音:你扮到咩？下？下？下？

我:.......ok...fine......

「留住溫度~速度~溫柔~和憤怒~」電話播住沙龍嘅鈴聲，當然我好快就聽咗啦

「喂~我出得門口喇」蒨頤講

「咁我而家落樓喇」

「咁收線喇」

「嗶--嗶--嗶--嗶--嗶--」

我着咗鞋，check好哂電話銀包鎖匙集哂！我熄哂燈就走咗

落到樓，我快過佢唔洗佢等，我等咗一陣，
突然間，眼前一黑，之後聽到把聲問，

「你估我係邊個？」佢特登押低把聲

「Um......蒨頤？」我專登扮傻

「你點知架？」

「妖...當我低能架咩」

「哈哈，好肚餓啊，食嘢啦」

「係喇」

我哋食咗去某茶記，嗌咗兩個早餐，講真野食真心麻麻地，如果今日唔係校慶，我寧願返學食，好快我哋食完野就返咗學，

是因今日校慶，冇限幾點返學，所以我都係跟返差唔多到我當值嘅時候返去，蒨頤因為啱啱轉校，所以唔洗當值，我同浩峰一樣時間當值，但講真空中花園真係冇乜嘢做，加上天氣又凍，所以冇乜人，我同浩峰全程都傾偈，主要圍繞前晚payday2打成點

傾下傾下已經當值完，浩峰就約女，而我就去咗搵蒨頤，搵到佢之後，我陪佢行咗學校其他攤位，行下行下，原來已經五點幾，我問一問蒨頤有冇去邊，佢話冇，是因馬鞍山係劣食天堂呢，就唔係浪得虛名嘅，所以我哋決定番屋企先，轉頭出沙田食嘢，就係咁我同佢又可以獨處，起碼番到屋企前我係咁諗

撘lift上到樓，諗住跳番part舞先入屋，點知一行到屋企門口就見到有個少少mk又mk唔哂嘅𡃁妹坐咗喺個喼上面

「喂，望夠未呀，開門啦！

」

你都傻嘅，都唔識你，點解要開門呢，咪住，把聲咁熟嘅

「你唔係阿怡啊化？

」

「係呀，唔洗問阿貴，快啲開門啦」阿怡反一反白眼

於是我一路笑鳩佢一路開門

，入到屋佢第一時間衝入房換衫，我冇理佢，我都入咗房，一出嚟就見到佢着住件背心，
(你哋會以為我好似日本啲咩兄妹戀？你哋真係傻豬嚟嘅，雖然我阿妹樣貌同身材真係可以溝死仔，但我已經睇慣哂)

「喂，轉頭去邊」佢問我

「做咩」

「陪我食飯呀~」一百八十度轉軚，把聲即刻變咗娃娃聲

「我同我個fd食，唔係浩峰，你鍾意嘅咪嚟囉」

「多謝阿哥~」

我哋約咗八點樓下等，差唔多出門口嘅時候，吖妹就同我一樣，check哂有冇漏野就行，

落到樓，我見到蒨頤，就簡單介紹咗大家，之後就行去撘車，途中，佢哋兩個好似識咗好耐咁，佢哋幾時變到咁fd架......我開始淆底

撘車過程唔講......直接飛！

到咗一田個food count我哋好快又搵到位，買完野食，先發現原來蒨頤幾大食，食飯過程都幾驚，最驚嘅係，佢哋兩個傾嘅話題大部都圍繞我！！

「你知唔知啊，佢上次攞咗我支洗面奶當牙膏用，笑到我呢

」吖妹笑到見牙唔見眼

「真係架？」

然後佢哋望住我陰陰嘴笑，有冇人可以答我，點解佢哋可以咁快就熟到咁

好快食完飯，我哋行咗冇耐就返咗屋企，因為！真係好攰，臨上樓之前佢哋傾到唔捨得返屋企

「蒨頤！橫掂你住對面樓，不如得閒過嚟搵我玩啊！」

「好啊」

「Byebye」

「Byebye」