昨夜星辰恰似你: 4. (上)

睇一睇手錶，仆街四點三。

明明約咗肥東佢地四點鐘學校門口等，遲咗咁多肯定又夾埋作我一筆。

因為我地班房係五樓，最高個層跑落去下再要經過斜坡先落到門口，仲要正值盛夏，溫度高達30，行快步都出曬汗，宜加仲要狂野時速咁跑，真係攞命。

去到門口嘅我已經喘嘥氣

「健哥掛住媾女搞到遲曬大到喎」肥東又搵我位入波





「照舊一分鐘十蚊，你一共遲咗20分鐘，自己諗」眼鏡誠繼續拎住本密浪麻麻嘅雞腸書睇

佢叫唐誠，戴住副黑框眼鏡，日日拎住一本厚到好似字典嘅書睇，內外都充滿住文藝青年嘅氣息，有家景，有學識，仲大把迷妹圍住佢轉。唔好見佢乖乖仔咁，事實上去到網吧就變到第二個人。基本上佢無乜缺點，唯一就係佢個人太薄情。

「追到我嘅打機入我數」我講完就9秒9衝去網吧

「你再無義氣啲」佢地話咁快就追到上嚟

呢兩個就係我兩位巴打，雖然大家性格興趣家景都唔一樣，但係我一早當佢兩個係世界上第二個我。





曾經係，我以為以後都會係。

-
2016。

「嚟杯sexy Beauty啊Eva姐」

呢間bar，我都好似有兩三年無嚟。

「啊健？好耐無見你嚟啦喎。啊誠同啊東呢？」




Eva好熟練咁將Tequila、1Banana liqueur、Triple Sec，Grenadine，鳳梨汁同柳橙汁放入shake壺再加冰chock咗幾下就倒落杯俾我。

一入口， 酸酸甜甜，醇而不膩，真係好好飲。

「幾時都話，Eva調嘅酒，同你個人一樣，永遠都咁正」

「我唔係問你好唔好飲啊，我問你啊誠啊東呢？我好耐無見佢兩個啦」

「真係好好飲」

「我問緊你⋯」

「唐誠。一早唔係我兄弟」

「你講多次？」





可能音樂太大聲，可能吵雜聲覆蓋咗我嘅聲線。

望住紅紅綠綠嘅燈光。

bar內一對對嘅情侶，只為失戀所以瘋狂劈酒嘅男女，一大班fd眾埋猜枚扭骰仔，仲有啱啱涉足酒吧嘅初哥。係每個人嘅身上都搵到自已嘅身影。

好似一切已經唔再重要，反正每個嚟飲酒嘅人，都不過唔想清醒。

咁，去解釋清晰嘅現實，又有咩作用。
只不過會令你愁更愁。

-
2011。





打完機就眼瞓。

打算翻到屋企就瞓，點知去到門口先發現無帶鎖匙。
呢一刻嘅我除咗想無限量咁爆粗，仲要諗今晚係邊度瞓好。

拎起電話睇聯絡人，先發現原來自己無乜朋友。

「喂，死肥東，今晚去你屋企瞓」
「咪搞我啊死仔，今日我老豆放假」
「又唔係未見過，唔係咁無義氣啊？」
「你咪試下打俾你老母囉」
「算啦」我果斷cut咗肥東線

打俾啊媽？





自從佢係我八歲個年俾頂綠帽我老豆戴之後走佬，我就好少再見到佢。

淨係知佢生咗個女，叫吳若霖。

頭兩年都會間唔中翻嚟見我一面，只不過每次唔夠十分鐘佢就會走，因為佢個女係屋企喊，喊住要搵媽媽。

然後佢就會交低幾百蚊俾我，然後頭也不回咁出門。

咁我呢？我都想搵媽媽。