心的距離: 31. 夜話

冬天的晚上，街上的行人不多，遑論是搭車的人。
我待在車內，把車門半掩，等待有乘客來時才開門。
在倒後鏡中看見有人正從遠處走過來，於是我把車門打開。

「嗨，阿基。」他怎麼會知道我的名字？
我轉頭一看，是 Joseph。
我未來得及反應，只說道：「嗨......」
「......乜今日咁錯蕩嚟坐我車呀？」我隨即回過神來，說道。
「無......知你就嚟收工，想同你食個宵夜。」
「哦......無問題呀，我揸埋呢轉就收工，要勞煩你等我一陣啦。」




「唔緊要，有得坐順風車，我唔該你就真。」他微微笑道。

過了一會，見沒有人上車，就打燈離開站頭。
「點解你會選擇揸小巴嘅？」在路上，他無故問道。
我於是告訴他其實我有一個小巴牌。幾個月前放棄銀行的工作後，就一邊駕車一邊找工作。
「本身只係諗住做個過渡，但係揸耐咗又覺得幾好玩，於是就繼續揸落去。當然啦，我仲有搵工嘅。」我一邊說一邊望著眼前的路。
「但係揸小巴唔會好辛苦咩？」
「辛苦㗎，但係為咗搵兩餐，都無辦法。以前屋企窮，無啖好食，我好怕過返呢啲日子，所以要努力搵錢。」
我見他不作聲，又繼續說：「雖然係辛苦，但係每一日都會車唔同嘅人，每一日路況都唔同，所以都幾有挑戰性嘅。」
他微微點頭表示理解。





小巴停在燈位，我拉起手制，繼續說著：「早幾個月我啱啱揸車嗰時，每朝早都有對老夫婦坐我車去觀塘，但過咗一個月之後，有一朝只係得返婆婆坐我車，我問佢，點解唔見伯伯，佢就話老嘢病咗，係醫院。再過多半個月，就連婆婆都無再坐我車。」
綠燈亮起，我頓一頓，鬆開手制後繼續前行。
「嗰時我就知道，伯伯應該去咗，婆婆已經再無需要坐車去觀塘。」
「所以，隨遇而安啦，今日唔知聽日事，都係踏實啲做人。」
他似乎對我現在的人生觀有點狐疑，問道：「但係聽 Kathy 講，你以前好搏？」
「以前我讀書係好搏㗎，中學嗰時死讀爛讀，入咗港大；入到港大，繼續讀，出嚟做銀行工。但係我喺大學先知，人外有人，天外有天，無論你點去追趕最叻嗰班人，始終都係有距離，或者係先天條件嘅限制掛。」
Joseph 直直看著前面的路，默不作聲。
他出生自中產家庭，大概甚少想過窮苦大眾的辛酸罷。





在路上，我們各自談著以往。他對我的以往感到好奇，我亦對他的經歷感到羨慕。
由於沿途的乘客不多，所以到達青山道的時間亦比預期早。
我把車泊在站頭後，就一同下車。

我帶他到附近的一間粥店。
雖然已是夜深，但粥店仍然燈火通明，捧場客亦不少。
兩個大胃王點了兩碗粥﹑一碟炒麵﹑一碟腸粉﹑一條油炸鬼跟兩杯豆漿。
我對他說：「你似係無食晚飯......」「哈哈，你講得啱。」
竟忙得連晚飯都沒有吃，可憐。

食物通通來到後，他隨即吃過一口熱粥，然後一臉正經地說道：「其實今日搵你出嚟，係有啲嘢想同你講，亦都有啲嘢想問你。」
前一秒才嬉皮笑臉，怎麼後一秒就如此嚴肅。

其實我大概能猜到他想說甚麼。





我於是又跟著他吃一口粥，仔細聆聽他接下來的話。
「我諗......我有啲鐘意咗 Kathy。」他說畢，又低下頭來，似是有點難為情。
果然是這樣。
但這句話的由他宣之於口，還是有一定的震撼力，至少他的話在我腦海中響過好幾次，我當下無法回應他甚麼，只能低下頭再吃一口粥。
「嗯，我都估到。」我回復過來後，只簡單回應道。
「佢係個好女仔，你眼光好好。」我續道。
這話出自我口中，難免有點唏噓。
「我知道，但係我總係覺得佢心入面有另外一個人。」
我不明所以，於是追問他：「唔？點解你會覺得佢心入面仲有其他人？」
他思索了一會，然後緩緩說道：「唔......有一次我同佢去食漢堡包，佢食到成嘴都係，咁我攞紙巾幫佢抹之後，佢就呆咗咁望住我.......」
「......但我知道佢眼中嘅唔係我。」

看來 Joseph 並不知道我跟她的過去。

言猶在耳，可惡的記憶又再潛伏於腦海中。




當天的記憶只留下細碎的片段——她那甜滋滋的笑容﹑她吃著漢堡包的模樣﹑她淘氣的說話，每一段都觸動心裡埋藏的刺。
但為甚麼她還要記得我呢。
明明她現在身旁就有個更好的人，比我更能幹勤奮﹑更細心體貼﹑更有未來的人。
如果她是記得我，在乎我，那又為何放棄我，而跟我眼前這人曖昧呢。
如果她決心要跟 Joseph 共赴前程，那就不要記得我。
不然的話，那句「對唔住」就該對 Joseph 說，而非我。

他夾過一條腸粉，再說：「嗱我認識嘅朋友入面，最清楚佢嘅就係你。我想問吓，可以點樣令佢忘記以往嘅人同事。」

他竟然問我如何令她忘記我。
但我總不能開口說，她眼裡的其實是我，說他問錯對象了吧。
亦總不能挖破自己的臉皮，把自己與她的過去一一道出吧。

於是我靜下來細想，其實我早已沒有身份去待在她旁邊。
即是說，我沒有理由去阻止他和她談戀愛。




如果我的確能幫到 Joseph 的話，我就是他們的媒人，這樣對他，和她，都是一件美事。

我樂意去做。

「你放假去開邊到玩？」我呷著粥，問道。
「唔......赤柱呀﹑尖沙咀嗰啲囉。」
沒有紅磡，也沒有青山道，十分好。
「你多啲帶佢去呢啲地方，最好係你熟悉嘅地方。製造多啲相處嘅時光，同時創造屬於你哋約會嘅地方。」
我把自己從前的想法一一講出。
「如果想效果再好啲，就同佢去一次旅行啦，不過唔好去台北啦。」
台北這地方，蘊藏太多記憶了，不論是 Kevin 的，還是我的。
他們如想要創造獨有的回憶，就不要到那裡了。
聰明的他似乎有點疑惑，立即問道：「點解呢？」
我頓了一秒，再答道：「呃......我聽佢講過話去過好多次台北，話已經去到好悶喎。」
想不到我杜撰藉口的功力也不俗。




他點點頭，默默聽著我的話，我於是繼續。
「仲有......多啲帶佢去食嘢，佢好為食，最鐘意綠茶乜乜乜。同埋聖誕就到，你諗吓有咩可以做啦，食飯﹑送禮物，都得。」

我傾囊相授，希望他一一記在腦中吧。

畢竟我在教朋友去追求自己愛過的朋友，心裡難免有點矛盾。
感情上，誰都希望自己在別人心中能佔一席位，又怎能忍痛叫別人忘記自己呢。
但理性上我清楚明白，如果她因為記住我而只能跟 Joseph 曖昧的話，我們三人都是輸家。
關乎別人幸福的事，我不能率性而為。
所以我保證上述的話，絕無私心。

Joseph 聽過我的話之後，看來有一番想法，於是笑逐顏開，說要替我結帳，還說這一頓宵夜就當是學費吧。
我笑說好。

吃著炒麵的我望著興高采烈的 Joseph，心想：「如果他真能把 Kathy 追到手的話，那我到時會怎樣呢？」
我不知道。
因為膽小的我不敢想像。
隨遇而安吧。