心的距離: 14. 新朋友

我從衣櫃中拿出那深藍色的西裝，拍一拍鋪了的塵。
久違了。
換了衣服，吃過了麵包，再檢查公事包內有履歷和照片，就趕到小巴站頭。
頂更的阿駿看到我，即說道：「嘩基仔你今日咁靚仔嘅？約咗女仔呀？」
我登上了他的（亦是我的）小巴，沒好氣地說：「你就約咗女仔，今日去見工呀。」
「哦，祝你好運啦。」「多謝，麻煩你啦。」

「阿基，即使今日 interviewer 唔係我，你都要加油呀」
當然，若果 Kathy 是面試官，大概我不用面試就直接取錄了，哈哈。





來到了 Kathy 的公司，表明來意後，就被安排坐在一間房間的門口，旁邊還有幾位應徵者。
應該是小組討論呢。講到「吹水」嘛，我還是可以的。
我打量一下他們，似乎他們都有備而來，但都不免緊張，不時弄著頭髮，或是到處張望。
唯獨是有一位同樣穿著深藍色西裝的男生，神態自若，淡然地坐著，看來是個強敵。

過了一會兒，秘書小姐示意我們可進內。
經過了無新意的自我介紹，我知道那男生姓李，叫 Joseph。

正式進入主戰場。
平常的個案大多都是關於私人企業的，問如何提升收益，如何挽留顧客云云，但這次小組討論的題目是一個歷史博物館的個案，問我們如何提升人流及參觀者的體驗。




嗯，這頗有挑戰性，但卻嚇倒了其他應徵者——除了那神態自若的男生。

「我覺得可以放多啲互動嘅展板，等參觀者除咗被動咁接收知識之外，仲可以透過互動嘅遊戲，去令過程更加有趣，加深佢哋嘅記憶。」Joseph 說道。
我立即接著他的話：「我同意，互動展板慢慢變成主流，喺唔同嘅博物館都有應用。除咗展板之外，我覺得仲可以配合而家嘅科技，推出 AR 導覽嘅服務。」
幾個面試官望著我，似乎對我的建議感到好奇。我知道成功了。
我繼續說道：「參觀者可以下載我哋嘅 app，一邊行嘅時候，就會透過眼前嘅博物館場景，認識唔同展品。講解唔單只侷限於文字同聲音，仲可以加入動畫，或者一啲歷史片段，令到講解更有趣﹑全面同清晰。」
真不能相信我能想到這點子。
Joseph 似乎被我的點子啟發了，急不及待地說著：「我好認同佢嘅建議，外國有唔少博物館用咗 AR 導賞後，人流提升，參觀者亦都滿意呢種導賞方式，更可以節省到專人導賞嘅資源。」
想不到他竟然會幫我補充資料。
然後他繼續說：「不過我覺得如果要令參觀過程更有趣，配合電玩遊戲就十分適合。我哋可以利用 online game 嘅遊戲內容去配合導賞，令年青一代更有代入感，同時更有興趣去了解歷史。」




我和應道：「講到年青一代，就不得不提利用 social media 去做宣傳。除咗講博物館嘅資訊，我哋仲可以用 facebook page 去講一啲歷史嘅冷知識或者趣聞，寓學習於娛樂......」
我跟 Joseph 一唱一和，使其他人只能從旁觀之。

半小時的面試結束，我們一干人離開面試室。
Joseph 趨近，跟我說：「你頭先講得好好。」
我笑著回道：「大家咁話啦。」
「我好開心遇到個咁勁嘅對手，介唔介意交換 contact？」
沒料到竟然在面試中認識到新朋友，我當然點頭說好。

我們邊走邊說，得知他在英國留學，之後回到香港工作。他在留學期間，到過歐洲不同國家遊玩和實習，光聽他的經歷，就讓我羨慕不已，亦難怪他見識如此廣博。
我只到過台灣，最遠的一次是日本。歐洲嘛，可望而不可即啦，自然搭不上話。

今天認識了個博學多才的朋友呢。