心的距離: 12. 見家長

吃過早餐後，Kathy 跟隨我回到小巴站頭。
我著她到旁邊等候，我去取車。
發叔一見我，即問道：「基仔，我唔係 send 咗 whatsapp 同你講話阿駿會頂你更咩，你做咩仲走落嚟？」
我回道：「係咩，我都無收到。」
「點會呀......」發叔開著手機，找到我跟他的對話，我看到後，即說：「都無剔，你都無 send 到出去！」
發叔不好意思地說：「係咩，嘻嘻，唔緊要啦，你休息吓，今日就坐我車啦。」
於是我回去跟 Kathy 說：「發叔叫我今日休息吓，我地坐佢車。」她點頭。

我們走上發叔的小巴。
「小姐，真係唔該晒你，幫我睇住阿基。」發叔說：




「唔洗唔該......同埋叫我 Kathy 得啦。」她說。
「基仔，你就真係要好好報答人啦。嗰日呀 Kathy 一見你暈咗，就即刻飛過嚟問我攞鎖匙，仲請咗成日假嚟睇住你，真係有心。」
難怪 Kathy 能找到我，原來因為發叔。
她立即笑說：「佢報答咗啦，佢整咗早餐畀我。」
發叔聽後說道：「嘩，真係 Sweet…...我都未食過佢整嘅早餐！」
扮作呷醋的發叔令我哭笑不得。

或許是有訪客的緣故，發叔在路途上都十分高興，時時提起我兒時的往事。
這使 Kathy 十分雀躍，卻使我十分尷尬。
「阿基個衰仔，細個小學嗰時，成日喺我架車到瀨尿！哈哈哈......」




Kathy 開懷地大笑著，我卻想把頭埋在沙堆......不，座位中，心裡祈求著發叔不要再說了，畢竟車上還有不少乘客呢......

二十五分鐘的惡夢，隨著小巴駛上宜安街而結束。
「走啦，阿基，唔該晒發叔，拜拜！」Kathy 下車時喊道。
「拜拜。」我跟發叔一同說道。
她和其他乘客下車後，我就看著發叔。
「喂，做乜望住我啫.......頭先係搞下氣氛啫，哈哈。」
我繼續看著他。他知自己未能說服我，續說：「咁見到你有朋友嘛，我咪開心囉。」
我勉強接受這答案。





我坐著發叔的小巴來回青山道和觀塘數次後，來到了食飯時間。
他把車泊在店外後，我倆即走進餐廳，並隨即點了食物。
他回過頭來說：「睇你今日咁生猛，呀 Kathy 實係照顧得你好好啦……」他戚一戚眼眉，我就知道他在想別的。
「你又諗咩呀，我只係瞓咗一覺——」我立即澄清。
「唔洗同我交代喎，你係大人嚟㗎嘛！嘻嘻。」他口裡是這樣說，但心裡必定是想著些古靈精怪的。
我真的沒有跟 Kathy 做過甚麼呀！

「嗱，不過認真嘅，其實你同 Kathy 係咩關係？佢話就係你中學同學，最多叫做係朋友啦，但係又會咁有心去請假照顧你嘅？」發叔問。
我喝了一口熱奶茶，說著：「其實我都想知。」
「咁你諗吓啦，你自己嘅事留返畀你去煩惱。但係我睇得出佢係真心對你好嘅，唔係嚟白撞嘅，」發叔喝著凍咖啡，續道：「你呢，就真係要好好珍惜人哋啦，好似佢咁好嘅女仔，唔多架啦。」
我點頭說著：「嗯。」

此時，手機一震，原來是 Kathy 傳來的 Whatsapp。
「係喎，發叔畀我嗰條後備匙仲喺我到，你幫我問吓洗唔洗畀返佢？Thanks～」
我向發叔說：「Kathy 問條後備匙洗唔洗畀返你。」




發叔看著我的手機，再向我招手，於是我把手機遞給他。
奇怪，他想幹甚麼？
接過我的手機後，他按下錄音鍵，說著：「唔洗啦，條匙放喺你到啦。你睇住阿基，我就放心啦。」

這突如其來的一著使我大感詫異，於是我問發叔：「其實今朝嗰程小巴係咪已經當係見家長架啦？」
他笑一笑，沒有回答。