心的距離: 8. 麻甩飯局

秋風正盛，剛好吹走過去幾個月的暑氣。
季節轉，時令的食物也跟著轉。廟街的煲仔飯店外正排著長長人龍，等候入座。
肥仔然和阿諾剛好在入座前趕到，並在店外的雪櫃拿來三枝青島。
有些朋友，就是經得起時間和謠言的考驗。阿澄的事件，他們都明白我的苦況，故沒離我而去。
我總是慶幸有著這一班朋友，就算是工作多麼不順遂，或是跟女友鬧翻，但一看見他們，就是快活。
「秋風起，食臘味——就一個臘味飯，一個牛肉飯加蛋，整多個白鱔雞飯！」
肥仔果然是肥仔，滿腦子都是吃的。
「加多個細蠔餅同埋腐乳通菜。」我連忙補道。
這鴨蛋蠔餅，香港少見，不得不點。 
「你地近排點呀？」我首先打破靜局。




「咪又係咁，」肥仔然喝下一口啤酒，再說：「做個 IT 狗。」
「我咪又係咁，日日扮工，畀老頂鬧，日復如是。」阿諾接著說。
沒辦法，市道一般，大家都一籌莫展，默默承受。
「喂阿基咁你點呀？」「我？無做銀行啦，劈炮唔撈。」我喝著酒，緩緩說道。
「咁你而家做咩？」「嘻，唔講。」
「做咩呀，中咗六合彩呀？」我保持緘默和微笑，他們見此亦不再追問。
「啲酒你地飲埋去呀，我今日唔飲得。」待會我還要駕小巴回去呢。

過一會，食物通通來到。
「食多啲鱔啦，唔係點寫鱔稿呀。」肥仔然向著阿諾說。




「講起就嬲，上次寫篇稿，上面畀晒啲錯嘅料嚟，之後有人投訴，就推我出去受靶！」
「啲老屎忽係咁架啦，佢整唔死你，你就贏。」我和應。
「我就好啲，全公司啲電腦嘢都係我搞，佢想整我就嘻嘻嘻......」肥仔然洋洋得意地說道。
我們談工作。幾個廿幾歲的小伙子，在職場上都是受榨壓的一群。

肥仔然吃下一口臘肉，口齒不清地說著：「阿諾，見你前排同女朋友去日本旅行喎，開心啦。」從肥仔然的語氣中隱約感受到一絲嫉妒。
「最慘係，佢負責買嘢，我負責埋單呢。日日同佢去 outlet，人都癲。」阿諾倒是愁眉苦臉。
「哈哈哈，都話咗你架啦，偏偏你又心軟同佢去旅行。」我取笑他。
「至少我出咗 pool，你地呢？」阿諾一記完美反撃。
「嗱我就唔洗啦，」肥仔然耍手，再續道：「但係阿基你一表人才，點解無 pool 出呢？」




我低聲說道：「講到呢到，有啲嘢想請教你地......」
他們倆望著我，一臉驚訝地同聲說道：「吓，你搵到對象啦？」

我也被他們的反應嚇到了。「吓......吓......唔係......」我喝下一口茶，定一定驚。
「是咁的，我見返一個好耐無見嘅女仔，」我故意不說出 Kathy 的名字，免得他們胡思亂想。「可能係難得見返以前啲人啦，同佢傾計嗰時，個人好舒暢。佢對我又幾好，解開咗我咁多年嚟嘅心結之餘，又請我食嘢﹑吹水，你地點睇？」
「哦，咁咋嘛，咁咪繼續囉。」似乎阿諾的幻想落空，只淡淡說道。
「但係我諗你都要去做啲嘢去回應人，你知你啦，咁多年都係一枝公，內心又密封，你唔回應人，佢一見無癮，就係咁先。」肥仔然說畢，再喝下一口啤酒。
「肥仔然就講得啱啦，你都自閉咗咁多年，難得有個人肯入嚟你嘅世界，你咪畀人地入嚟囉。繼續發展落去啦，做到情侶最好，做唔成咪做朋友囉，都好。」阿諾說。
我連忙說道：「嗱講明先呀，我未諗住要同人拍拖架。」我舉起茶杯，說著：「但係無論如何，多謝你地先。」我們三人碰杯，一喝而盡。

「但前提係，你要畀人地去進入你嘅世界。」她亦曾如是說。
嗯，既然他們都如是說，我該要有些改變。

 飯局完結，我說：「我車埋你地返去呀。」
「咦，你買咗車咩？係咪『紅色的跑車像是帶著神秘』呀？唔怪得之頭先唔飲酒啦......」肥仔然酒酣耳熱，連帶說話都糊里糊塗。




「喂法拉利定保時捷？」阿諾亦隨之興奮起來。
我不作聲，默默帶他們到小巴所在的上海街。
只是他們看到所謂的「紅色的跑車」後，通通失笑起來。