我係死神，專門審判自殺嘅人(離魂記‧前傳): 15
過咗陣，陳文輝望一望時間，突然快手快腳咁收起哂所有關於阿敏嘅海報同相落床下底，成間房頓時變得正常好多。我用讀心術先知原來佢屋企人好快就返，佢唔想俾家人知關於阿敏嘅一切。
然後佢上網播住周杰倫嘅《最長的電影》，望住一幅相。相入面，係一班小學生嘅合照。
就咁睇，係某小學嘅班相。
我透過讀心術，讀到陳文輝內心依一句──「我哋嘅故事‧‧‧就喺個一刻開始‧‧‧」
我再用深潛讀心術，進一步讀取佢思想。
最後，我入到去陳文輝嘅回憶之中。
地點‧‧‧應該係學校？唔清楚。
不過有一班著校服嘅細路喺班房取笑緊細個嘅陳文輝。
「頭皮怪！頭皮怪！」佢哋一直咁笑。
陳文輝就一直低頭，佢內心好尷尬、又驚，最後老師叫咗佢出嚟。
「陳文輝‧‧‧」
「‧‧‧」陳文輝唔敢出聲。
「你平時幾耐洗一次頭架？」
「我日日都有洗‧‧‧‧‧‧」
「咁可能你要換下洗頭水啦，如果唔係同學仔會唔鐘意你架喎。」老師拍拍佢膊頭，再面向全班：「你哋都唔好再笑陳文輝同學啦，再笑罸抄！」
原來童年過得咁傷心。
回憶好快就到陳文輝放學個陣，佢一個垂頭喪氣咁行出學校，就係依一剎那‧‧‧‧‧‧
「啪！」一個突然排球飛到佢個頭上。
「啊‧‧‧」陳文輝佢撳住個頭睇落好痛。
幾秒後，一個身影出現喺佢面前、蹲低擦撫佢個頭：「喂！喂！你有冇事啊？」
陳文輝嘅痛覺好快就消去，隨而代之係溫暖、心一跳嘅感覺。佢望住眼前嘅人，正正係細個嘅阿敏。
細個嘅阿敏，個樣其實好普通。
但有種輪廓就係越望越靚，越有氣質。
「‧‧‧」陳文輝呆住。
「對唔住啊‧‧‧我個排球打到你‧‧‧‧‧‧」阿敏不斷用手擦撫佢個頭，想令佢痛覺消去。
第一次，有人毫不介意地摸佢個頭。
「阿敏，拎返個排球嚟未啊？」遠處另一把女聲。
「對唔住啊，下次再見。」阿敏對佢莞然一笑，就拎個排球返去。
陳文輝望住佢嘅背影，原來佢嘅情根係喺依一刻種下。
依種愛慕、迷戀，漸漸喺陳文輝內心中增大，隨住年齡增長，佢越嚟越渴求得到阿敏。
「世上我除咗我阿媽之外‧‧‧」陳文輝望住相入面嘅阿敏，幾乎想喊咁樣：「你就係對我最好嘅女仔‧‧‧‧‧‧」
只係摸咗你個頭一下‧‧‧居然可以有咁多諗法。
陳文輝嘆咗聲，望住天花板：「如果我有錢啲‧‧‧或者靚仔啲‧‧‧唉，點會突然有人送花俾佢嫁‧‧‧‧‧‧」諗下諗下，佢就喺張床發脾氣、又痛哭、又嘆氣，表情十足，一瞬間完美演繹哂出嚟。
緊接，陳文輝開始用拳打床，越嚟越頹，手機又不斷轉狀態，然後望實阿敏Whatapps嘅「上線中」。
呢條友喺到發情？
之後，我都冇興趣再去望依條友做啲乜。
全日留喺間房亂諗嘢，你早有一日發癲殺人都好正常。
個日之後，陳文輝好似比以往更加進取。可能係佢感受到莫名嘅威脅？唔想阿敏被搶走，所以嘗試改變自己。
包括，去補習班之前開始會整下頭髮、嘗試著下新配搭嘅衫褲，但得罪講句，點整都係Look like shit。
然後上補習班個陣，去趁阿敏喺班房外面嘅走廊行走個時‧‧‧‧‧‧
「阿敏‧‧‧‧‧‧早晨‧‧‧」佢陰陰沉沉咁喺阿敏背後講咗句。
「哇‧‧‧」阿敏嚇到傾一傾前，望一望後先知係陳文輝：「俾你嚇親。」
「睇戲啊‧‧‧」
「吓？」
「 一齊睇戲‧‧‧」
「咩‧‧‧咩戲‧‧‧？」阿敏簡直唔知點反應。
「‧‧‧你鐘意啊，我請你睇。」陳文輝講嘢陰陰沉沉，毫無陽光氣息。
「唔‧‧‧」阿敏尷尬地笑，搖一搖頭：「呃‧‧‧唔好啦，我約咗人啊！」
「約‧‧‧約咗人‧‧‧‧‧‧？」
「係啊‧‧‧」阿敏作個籍口。
「咁下次先‧‧‧」
「好啊，有機會啊‧‧‧」阿敏點住頭，就行返入班房。
「約咗人‧‧‧‧‧‧」陳文輝望住阿敏修長均稱嘅背影，不自覺握實拳頭：「肯定係追佢嗰個‧‧‧送花嗰個‧‧‧‧‧‧」
陳文輝返到入班房後，坐喺後面嘅佢一直注視住頭髮秀長嘅阿敏，透過讀心術我可以得知，佢好多混亂嘅想法。
包括諗緊：如果阿敏依一世只係鐘意佢一個到底會有幾幸福、佢哋兩個婚後嘅優閒生活、一生人之中搵到一個啱啱好又係鐘意自己嘅人會有幾開心。
佢越諗越開心，然而，佢諗到最後都只係一場空。
因為佢鐘意嘅人，並無啱啱好都鐘意佢。
無錯，世界總係唔會如你所願。
如果唔係，人生就毫無趣味可言。
但對於人類嚟講，呢個並唔係挑戰，而係宿命。
陳文輝心底裡好似已經徹底認為，自己依一世都冇可能得阿敏歡喜。
因為佢壓根底知道自己，根本無咁嘅能力。
亦正正因為咁嘅思考模式，人往往會用超越自己道德界限嘅方法嚟奪得對方，因為佢已經默默被情感凌駕住。
阿敏死亡嘅日子，我望一望錶，亦都好似越嚟越近。
「沙啦沙啦──」補完習嘅阿敏如常地會喺條街行下，但好天氣不常，大好陽光之下落起雨嚟。
「成個暑假都咁鬼熱‧‧‧」阿敏仰望天上嘅曇天：「又咁悶‧‧‧」
雨，落得更大。
阿敏望住個天，好似諗緊乜。
鐘意窺聽他人想法嘅我，當然又立即使用讀心術，但就偏偏俾我聽到‧‧‧我唔想聽到嘅嘢。
「如果死神喺到‧‧‧」阿敏放空嘅眼神，就好似回想緊啲乜。
原來係當日我哋喺中環攤檔落大雨個陣，我拎咗把遮出嚟個幕。
就喺依個時候，咁啱俾我見到喺路上跑緊步，因為落雨而趕路想跑入商場嘅一位人兄，正正係上次幫阿敏頂咗撞單車一劫個位阿一。
啪
「喂，接住。」阿一除咗自己著緊件淺棕色格仔外套落阿敏個頭上。
「你係‧‧‧」阿敏望住佢。
「披住佢，去最近嘅地鐵站番屋企。」
然後，阿一就跑入鄰近有掩埋物嘅地方避雨，而阿敏望住佢嘅背影，瞳孔漸漸放大‧‧‧‧‧‧
「喂喂喂喂喂！停低呀──」阿敏追住佢。
「點樣？」阿一回眸盯住佢。
「懶咩型啊‧‧‧」阿敏捉住佢隻手，另一隻手將佢件外套披埋落佢頭上擋雨：「一齊入商場避下雨仲實際啦。」
「‧‧‧」
然後，佢兩個就喺雨中用外套披頭跑入鄰近兩條街距離嘅一間商場入面。
「呼‧‧‧」兩個人最終跑入到商場，雨水多少都有沾濕到佢哋。
之後兩個人互望對方，眼神之間，有種不可言語嘅感覺。
「唔該你‧‧‧你叫阿一啊嘛？記得你。」阿敏望住佢，抿嘴而笑：「上次幫我頂撞架單車一下。」
「唔‧‧‧」阿一點頭，說：「冇乜事我就走先。」
「喂‧‧‧你連外套都唔要啊？」阿敏問。
「‧‧‧」阿一停一停，諗一諗：「你鐘意就掉咗佢。」
「哈，咁好笑嘅你？」阿敏估唔到依個係佢嘅答覆，追問：「咁阿一，你唔洗咁快走啊。」
「點解。」
「落緊雨都無嘢做啦～你都無理由冒雨咁跑返屋企嘛？一齊睇套戲喇。」阿敏邀請佢。
「睇戲？」
「唔。」阿敏點點頭，指住商場門口隔離間戲院。
「我‧‧‧」
「嚟啦～」阿敏就係咁，牽住佢隻手佢到戲院門口前。
依種發展，完全超乎我所想。
原來識女仔係咁易，相反，陳文輝一直以嚟到底做緊啲咩？
「喂‧‧‧你係咪個啲以為喺背後保護女仔就好型嘅男仔嚟？」買完戲非後，阿敏笑一笑咁問。
「點解咁講。」
「又幫我撞車啦、落雨又無神神披件充滿你體味嘅外套落我個頭到‧‧‧‧‧‧」阿敏望實阿一。
「‧‧‧」
「入去啦，差唔多開場。」阿敏拉住木訥嘅阿一入去。
入到戲院後，昏暗一片。
阿敏同阿一坐咗喺某個後排位置，準備睇眼前依套電影《穿梭十四天》。只能講句，劇情十分之悶‧‧‧悶到，我都幾乎訓著。
「喂‧‧‧喂‧‧‧‧‧‧」阿敏笑住咁搖一搖阿一隻手，細聲講：「你有冇睇到啊？佢漏咗張歌詞喺餐廳啊。」
阿一矇矓咁打開眼睛：「幾秒之後，仲會有個女仔執起。」
「‧‧‧你又知嘅，你睇過啦？」
我點頭：「唔。」去到依一刻，我不得不承認‧‧‧‧‧‧
其實我從剛才落雨開始，就附咗上阿一身上控制住佢。
原本只係想俾件外套佢披住，等佢唔會因為可能淋雨引致發燒而病死，點不知俾佢拉咗入嚟睇戲。
你病死咗，我就調查唔到令你逆天嘅人係邊個啊。
電影終於迎嚟最終幕，裡面嘅男女主角最後因為時空限制而暫時分離，而阿敏就不知不覺地睇得太投入，眼框竟然會有啲濕潤。
「你喊？」完場個陣，我用阿一身體拎起個件格仔外套俾佢。
「冇囉，點會喊啊‧‧‧大佬。」阿敏慢慢移開我隻手，然後自己都笑咗下。
「喊就喊，唔係羞家嘅事。」
「係啦係啦～你咁鐘意迫我喊，我就喊俾你睇。」兩秒後，阿敏突然真係喊咗出嚟，臉頰上流咗一行淚水。
「‧‧‧」
阿敏嘅淚，好似唔單單嚟自剛才個套戲。
電影落幕播緊演出名單之際，我生硬咁慢慢伸隻手向佢，最後放落佢膊頭上。
人類安慰對方，大概係咁？
「唔該你‧‧‧」阿敏好快就收起淚水，重拾一副樂天少艾嘅樣子。
「點解喊。」
「吓‧‧‧？」
「你喊，並唔係因為剛才個套戲。」
「點解你會‧‧‧」
「我感覺到。」我望實阿敏。
阿敏亦都凝視住我，深一深呼吸、對我笑一笑：「咁我同你講個故仔啊，你可以當小故事嚟聽。」
我點頭。
「從前呢‧‧‧就有一個好鐘意作弄人類嘅死神喎，佢好鐘意整蠱凡人‧‧‧而佢嘅工作就係監視所有人類係咪附合時間死亡。有一日呢，有個女仔因為一啲事而唔開心，咁死神就出現喺佢身後準備睇佢點跳樓死，不過就係嗰個女仔想跳之際‧‧‧佢個心好奇怪，總係覺得，有一個人默默咁望住佢，當下嘅心跳好似曾相識‧‧‧就令佢記番起一句說話，然後有番「活著」嘅感覺。所以，佢就及時回頭，點知一回就見到有個男人突然出現，佢就自稱死神。」
「之後？」我一聽，就知阿敏講嘅故事，就係我哋之間嘅故事。
希望佢唔好醜化我。
「原來個女仔係逆天不死之人，所以死神就開始調查佢逆天嘅原因，喺過程之中‧‧‧女仔當咗佢係朋友，好信任佢，雖然佢係死神‧‧‧不過就係有種莫名其妙嘅安全感，覺得可以依賴，一個‧‧‧好陌生嘅親密朋友。」阿敏神情有啲低寂，不過都繼續講落去：「但之後有一日，死神因為一啲事，徹底破壞咗兩人之間嘅信任‧‧‧‧‧‧從此，死神就無再喺少女面前出現過。」
「結局？」
「結局‧‧‧‧‧‧我都唔知。」阿敏低住頭，淡然苦笑：「不過我相信，一定會係美好嘅。」
「所以，你已經原諒咗死神？」
「‧‧‧」阿敏冇回答到依個問題：「或者佢再出現個刻，我先答到你結局係點。」
因為已經冇人相信死神‧‧‧‧‧‧
所以佢嘅消失‧‧‧
其實都已經毫無所謂。
「再見。」
最後，我同阿敏喺戲院門外道別。
不過我估唔到，佢會當死神係朋友。
「多謝你聽我講咗個無聊故事。」阿敏答謝完之後，就轉身準備返屋企。
「喂‧‧‧」我望住阿敏背影開聲，令佢停咗落嚟：「有緣自然會相逢。」
「唔‧‧‧我哋會再見。」阿敏抿嘴點頭。
「我係話，你同死神。」
「‧‧‧」阿敏表情佢呆住。
到佢回神過嚟，我已經消失不見。
如常地，我出到商場後將個阿一嘅記憶刪除。
「咔」就喺個陣，街角有人偷拍我哋。
我舉頭望向個邊，發現俾雨淋到成身濕哂嘅陳文輝，偷拍住阿一。樣子睇上去既失落，又唔憤氣。
我望一望錶，阿敏嘅時晨差唔多。
我睇一睇「生死冊」，阿敏今次會因為陳文輝求愛不遂，而被佢用刀刺死。不過根據過往經驗，阿敏好有可能會逆天躲過死劫。
因為我都講過，佢過往都有幾次被「生死冊」記錄會「死亡」，不過最後都會避開一劫。
而且，佢逆天之命正正係喺阿敏細個撞車之後開始。
夜晚我望住阿敏訓著個陣會諗，到底點解佢可以逆天不死。
當年捐心救咗阿敏嗰個男仔，叫張嵐。
佢喺人間上面嘅親戚、家人都一早已經死得七七八八，所以根本搵唔到同佢有關嘅人。
就喺夜月當下，熟睡緊嘅阿敏無啦啦好似喺夢中諗起婆婆，就一直叫住佢。
佢同緊自己阿婆喺夢中相遇？夢，真係一個同往生者溝通嘅好地方。
雖然‧‧‧
佢哋都只係發夢者自己夢內嘅幻想。
同往生者溝通嘅地方‧‧‧‧‧‧等等，或者‧‧‧我可以搵到張嵐個墓碑？
於是個一晚，我就用瞬移去哂香港各大墳場，睇所有墓碑上面嘅刻字，有邊個往生者嘅名，係叫張嵐。
最後，我搵到三十六個叫張嵐嘅人。之後再挑選性別、年齡，我已經確定咗真正令阿敏逆天嗰一個張嵐係邊個。
佢嘅靈墓位於將軍澳，墓碑上刻有嘅死亡日期，阿敏被捐心當日相附。唯獨係‧‧‧可能經過多年嘅風雨摧殘，佢墓碑上張相已經變得模糊幾乎睇唔清係咩樣。
不過唔會有錯，死亡日期、性別、年齡都係一樣。
依個張嵐，就係令到阿敏逆天嘅關鍵。
幸虧人類有類似依到記念亡魂嘅地方，如果唔係喺毫無線索、六親又死哂嘅情況下，真係好難調查落去。
我望一望墓碑，發現上面放住一朵殘缺嘅花瓶，之後我拎起花瓶，望一望朵花‧‧‧已經完全凋零。
再打算放番落去個時先見到，花瓶壓住咗一封泛黃嘅信。
我拎起封信，打開嚟睇。
「你要好番吖，聽講水程深姑娘話你要去一個好遠嘅地方喎。醫院好悶，不過有你喺隔離後每日都好開心，希望依種開心，可以一直落去。係喇，我仲未知你叫咩名？你記住要同我講吖！──敏字」字跡稚拙，睇落係小朋友寫嘅字。
上面寫住敏字？係阿敏寫嘅‧‧‧？咁封信係邊個放低？
而將紙嘅角落，仲寫低咗個日期，根據上面個幾行字嘅筆跡同顏色，應該都係阿敏順手寫埋嘅日期。
只不過‧‧‧
日期係張嵐死後嘅一個星期。
阿敏寫咗一封俾死人嘅信？冇可能，信上嘅文字完全唔似悼念一個人應有嘅語氣筆風。
睇嚟，要搵出信上所講嘅水程深姑娘先知當中因由。
「好遠嘅地方‧‧‧」我望住封信良久，抬頭仰天：「張嵐，地獄無你路、天堂亦冇你位，你到底去咗邊。」
第二日中午。
將軍澳尚德區內一間名為基博幼稚園，一班老師正喺幼稚園門口同即將放學嘅小朋友講再見。
「再見啦，小新，小愛。」一位老師溫柔咁對住一男一女嘅細路講。
「再見水姑娘！」佢兩個講完再見，就行去媽咪嘅懷抱之中。
「呼‧‧‧‧‧‧啲細路都放得七七八八‧‧‧水老師，咁我哋去食晏就啦喎。」一位短髮女幼教師同個位叫水姑娘嘅人講。
「哦‧‧‧好啊，我返班房執埋啲手尾同鎖門就過嚟。」水姑娘答。
「好，一陣見。」就係咁，成班幼教老師就一齊往商場方向行去。
而依個姓水嘅，就係我要搵嘅人。
阿敏寫個封信，上面有佢名字嘅人。
點解我會搵到嚟？因為阿敏做完換心手術後應該都繼續留咗一排院，咁喺得醫院又被阿敏稱為姑娘嘅人，應該只有護士。
所以我只要翻查醫院當年有冇一個叫水程深嘅員工，就可以知道佢一切。而且果然不出所料，佢的確係一位姑娘‧‧‧當年係負責兒童病房。
不過喺好多年前就已經離職，透過佢嘅入職申請表我知道哂佢所有資料，最後得知佢嚟咗依間幼稚園做幼教老師。
睇嚟佢揀嘅工，都係同小朋友有關。
「咳‧‧‧」水姑娘逐一熄哂幼稚園內所有燈。
令到所有班房、廁所、走廊都變得昏暗起嚟。
最後，佢逐一鎖上班房嘅門，先至打算由大門出去食晏。
但係‧‧‧
「咔‧‧‧咔‧‧‧」大門反鎖住。
「咦‧‧‧咩事‧‧‧‧‧‧明明我都冇鎖過‧‧‧」水姑娘試圖推開對門。
同一時間，我喺昏暗嘅幼稚園走廊，行到去佢面前。可能所有窗門閂哂，走廊回音又大，令我對皮鞋走喺路上嚟會發出「喀──喀──」嘅聲音。
我正要上前，問佢到底封信係咩一回事。
張嵐又到底去咗邊。
喺大門個邊嘅水姑娘似乎聽到我皮鞋發出嘅走路聲，佢居然突然心慌起嚟，疑懼咁望住走廊方向。
佢再慢慢行到走廊正前方處，就見到由盡頭一直行過嚟嘅我‧‧‧‧‧‧
望到我嘅佢瞳孔漸漸收縮，最後：「啊呀呀呀呀呀呀呀呀呀──！！！！！」佢竟然大叫起上嚟‧‧‧
乜我好似要嚟收佢命？
水姑娘立即轉身向後門方向跑，我當然唔會俾佢離開‧‧‧喺我未問清楚之前。
所以瞬移咗去後門嘅位置，我入跑到嚟通往後門嘅走廊，見到我企住喺個到等佢，就叫得仲大聲，求其搵個班房衝咗入去，跑走咗。
佢同我玩緊捉迷藏？
「出嚟。」我直接步行入班房：「我知你喺到。」
躲藏喺玩具櫃裡面嘅水姑娘驚到唔敢發出抖氣聲，我微微一笑‧‧‧走到去玩具櫃下輕輕拉開櫃門。
佢又望住我，眼神充滿畏懼：「你‧‧‧你係邊個啊‧‧‧‧‧‧我‧‧‧冇錢架！唔好搞我啊‧‧‧唔好殺我啊‧‧‧‧‧‧」
所有亡魂逝去者望我嘅眼神，都係充滿畏懼。
唯獨阿敏‧‧‧
「我唔係強盜。」我低頭望住佢。
佢似乎冷靜番少少：「你‧‧‧你係邊‧‧‧個‧‧‧」
「我？」我啪一下手指，班課入面嘅椅子即刻移動到中間，播兒歌嘅CD機亦轉為播放一首名為《Secret》嘅琴歌。
「我就唔解釋太多，」我翹起二郎腿坐上椅子，望住水程深：「你可以叫我做，死神。」「你‧‧‧唔好講笑‧‧‧啊‧‧‧‧‧‧」水程深姑娘帶住無比嘅畏懼望住我：「我無病無痛‧‧‧咩‧‧‧咩死‧‧‧‧‧‧神‧‧‧你唔好呃我‧‧‧‧‧‧」
「張嵐去咗邊？」我手指一啪，就憑空變出一杯蘇特茶出嚟邊飲邊問。
「咩‧‧‧張‧‧‧張嵐‧‧‧‧‧‧我唔知你要搵嘅人係邊個啊！！」水程深姑娘大聲驚叫完就轉身，想從窗戶中爬出去外面。
我再啪一下手指，望到窗外出面嘅畫面，佢就即刻打消要出去嘅念頭。因為出面係一沿崖，只要一爬出去就會跌死落入深淵。
當然，依啲只係簡單嘅幻術。
「哇呀！！！」佢另番轉頭，哭哭啼啼咁跪地求我：「我一生人冇做過壞事‧‧‧你放過我啦‧‧‧‧‧‧我好驚啊‧‧‧嗚嗚嗚‧‧‧」
「我只係想知，張嵐到底去咗邊。」我再問一次。
「我唔知張嵐係邊個啊‧‧‧‧‧‧」佢痛哭流淚，真係軟弱。
「唔知？」我走上前，拎出個封喺墓碑花瓶下搵到嘅泛黃信件，展顯喺佢眼前：「上面有你個名，你話佢去咗一個好遠嘅地方。」
本來崩潰地喊緊嘅水程深姑娘慢慢抬起頭上嚟，直到望到封信之後眼淚先慢慢停下：「呢封係‧‧‧‧‧‧」
睇嚟真相要大白。
「好多前‧‧‧」佢餘淚閃爍喺眼底下，愣住咁望住我：「點解你會有‧‧‧‧‧‧」
「張嵐到底去咗邊。」
水程深姑娘望實封信，慢慢吐出說話：「我記得‧‧‧佢‧‧‧佢‧‧‧‧‧‧已經死咗。」