我係死神，專門審判自殺嘅人(離魂記‧前傳): 6
「哇‧‧‧！」成班女仔都顫咗顫，神婆忍唔住出聲：「陳文輝你嚇死人咩！」
「對‧‧‧對唔住‧‧‧」陳文輝即刻低頭道歉。
「唉，講下笑姐。」神婆拍拍佢膊頭：「不過你應該開朗啲，同我哋多啲傾計啊嘛，如果唔係一世都冇女仔追你。」
「知‧‧‧知道。」
就正當我打算離開個陣，我見到個嗰叫阿寶嘅短髮女仔‧‧‧佢離死亡不遠。
「喂‧‧‧阿敏行緊返嚟喇，快啲扮無事發生過！」神婆望住遠處行緊過嚟嘅阿敏，立即收哂啲塔羅牌。
「好啦，齊人就影一幅大合照收工！」神婆舉手高呼。
最後，佢哋喺樹林之間企埋一齊影咗一幅大合照，就正式解散，一齊搭小巴離開。
個陣已經接近傍晚，落起濛濛細雨，可能因為接近郊區所以天特別藍，從小巴望出去就形成一幅美麗嘅風景畫，置身小巴之中令人感覺到莫名嘅安全感。
阿敏坐咗去小巴嘅單人座，冇加入班女仔嘅傾計堆，就咁自己一個戴住耳機望住外面聽歌。
阿敏深一深呼吸，突然轉頭望住我：「死神，要唔要聽下？」
「唔洗。」
「又怕羞‧‧‧」阿敏隨和地一笑：「首歌叫《密封罩》，我覺得首歌幾啱你，先叫你聽。」
「點解咁講？」
「點解？聽一次囉。」佢又淺淡咁笑一笑，就轉頭望番窗外。
本來猶豫嘅我，亦都不自覺讀取阿敏思想，同佢聽住個一首歌，佢係因為我先聽依首歌？
落車之後，阿敏就同車上嘅大家揮手，獨自行返屋企。
「死神啊，你調查我點解逆天不死，冇走去自殺‧‧‧」阿敏喺回程嘅路上講：「但我覺得‧‧‧‧‧‧生命，係會影響生命。」
「但如果影響咗，我都應該會知道。」我沉思一下，說：「除非‧‧‧對方都係逆天嘅存在。」
彼此互相影響。
「就係因為咁，所以你‧‧‧」我望向阿敏。
佢任由毛雨打落自己頭上，轉身望住我：「唔，所以我先想試下接觸自殺嘅人，試下用生命影響佢哋。」
「你真係奇怪。」我望住澄藍濛瀧嘅天空：「你依種年紀，應該係去吃喝玩樂，但你居然係想主動去接觸將死之人。」
「因為‧‧‧我想試下，感受佢。」阿敏淺淺一個笑容，就好輕風咁淡。
「佢？」
「佢係我細個遇過嘅一個好人，我覺得有好多嘢唔係偶然，包括‧‧‧我遇到你啊死神。」阿敏伸一伸懶腰，說：「你明唔明啊？」
「個嗰人對你影響咁大？」我望住阿敏，問：「咁佢依家喺邊。」
「走咗。」
「走咗？去邊。」
「去咗你掌管嘅地方，上次咪同你講過。」阿敏望住我：「死神咁冇記性。」
「就係你上次講個嗰‧‧‧連名都唔知嘅人？」
「我想問佢個名個陣‧‧‧佢已經走咗。」「佢點救你？」
「其實‧‧‧我都唔知係唔係佢救我，只係一切太偶然，連我自己都唔敢相信。」
「連係咪佢救你都唔知？」
「我‧‧‧相信係嫁！」阿敏點頭。
「咁佢因咩事救你。」
「咁就要你自己查喎，唔係你職責嚟咩？死神。」阿敏對我會心而笑。
「‧‧‧‧‧‧」
佢講到喺依個沒名冇姓嘅人救咗佢，對佢影響佢好大。喺呢家冇任何頭緒嘅情況下，我只能先從依件事入手。由於我無回溯時間嘅能力，所以唔能夠得知阿敏當年發生嘅事。
不過，我可以借助讀取佢思想，或者潛入佢嘅夢境。好運嘅話，佢會夢起當年嘅事，我就可以從中得知，但係好不設實際。
因為人腦咁複雜，佢要發嘅夢好多。
再次咁啱發中依個夢，都可能會係幾十年後。
所以最實際都係自己親身去調查。
我喺阿敏訓緊個陣，就喺佢間房周圍搵資料，每一張紙、每一張相都搵過哂，都只係日常中學生嘅嘢。
再之後我出客廳同去佢父母主人房繼續搵，最終只係俾我搵到一張放喺客廳嘅一張全家照，個張相因為係喺醫院影‧‧‧睇落阿敏仲好細個，而且阿敏個表情睇落唔多開心。
醫院。同生死最有關連嘅地方，亦都係我同上帝搏鬥嘅聖地，近乎人間嘅地獄入口。
如果知道係邊間醫院，或者我就可以知道阿敏細個因為咩事入院？唔通佢所講嘅人，係醫生？
翌日。
「呵欠～～早晨死神。」阿敏習慣一起身就伸懶腰，可能成日伸嘅關係身材都夠修長。
「早晨。」
「唔？我冇‧‧‧聽錯啊？」阿敏視線喺我身上定格。
「聽錯啲乜。」
「你同我講早晨囉‧‧‧‧‧‧」
「‧‧‧我同緊你床上隻曱甴，講早晨。」我暗地裡啪一下手指。
阿敏驚疑咁揭開張被，即刻叫咗聲：「喂！！搞咩啊‧‧‧！點會有曱甴架！」被嚇到嘅佢，立即就落床離開間房。
我飲埋杯熱紅茶佢：「呼。」
「阿寶，你今日嚟啊？」阿敏朝早落街食完碗雲吞麵，就收到朋友嘅電話：「你一陣十二點自己上嚟啊。」
阿寶‧‧‧個嗰短髮女仔，我記佢死期將近。
「死神，幾時再帶我去搵自殺嘅案件？」飲住凍好立克嘅阿敏問。
「一直喺你身邊。」坐喺佢對面嘅我答。
「‧‧‧」阿敏好似差啲咽喉：「你講真？」
「你隔離個張檯個位中年婦人，三日之後帶埋個仔去迪士尼會因為中暑不治而死、你後三排廂座個阿伯，一個月後會因為冇持續定時服食心臟病藥物而死、仲有拎緊蛋牛治俾你個位侍應，會因為今晚過馬路衝紅燈俾小巴撞死。」我重申答阿敏一次：「所以死亡，一直喺你身邊。」
「嚟，靚女，蛋牛治。」侍應放低碟蛋牛治，就轉身離開。
「‧‧‧‧‧‧」阿敏成個人猶豫幾秒之後，突然企喺身捉住個位侍應：「侍應哥哥‧‧‧今晚你千奇千奇唔好衝紅燈！」
之後又走到去個位婦人同阿伯身邊講：「姨姨，下個月暑假啊！唔好陪個仔去迪士尼啦咁多人，阿伯你都要定時定候食藥呀‧‧‧！」阿敏一口氣講完之後，就返去自己個位坐。
個位阿伯突然拍拍自己個頭：「係喎‧‧‧我都唔記得自己要食藥‧‧‧‧‧‧哈哈，姐姐仔唔該‧‧‧你！伯伯我有老人痴呆‧‧‧好多嘢都忘記。」
「係喎，一暑假就好多大陸人，囝囝！我哋改去冒險樂園好冇？！」個位中年婦人問自己個仔。
「唔要‧‧‧」個細路望一望阿敏，好哀怨咁喊咗出嚟「嗚嗚嗚嗚嗚‧‧‧我要迪士尼‧‧‧‧‧‧」
「嗱，姐姐仔，見你咁靚女，聽你講一次啦。」侍應對住阿敏笑一笑。
‧‧‧
竟然‧‧‧
十秒之內改變咗三個人嘅性命。
正當我想出口對佢訓話之際，佢就塞咗件蛋牛治喺我嘴邊：「死神，多謝你，請你食！」
「唔好塞發霉腐臭嘅海綿入我口‧‧‧‧‧‧」我捉住阿敏隻手，但蛋牛治已經掂住我個嘴。
早知唔用人類形態現身陪佢食早餐‧‧‧‧‧‧
「哈哈哈哈‧‧‧咬啦！食一啖姐死神。」阿敏就係樂於塞我食垃圾。
「Wowowo！」呢個時候，我嘅救星出現──阿宏。
佢一嚟到就扮哂一副驚奇嘅樣子見到我哋，之後繼續講：「阿敏‧‧‧咁啱嘅！」
「阿‧‧‧宏，伯父上次冇事啊嘛‧‧‧‧‧‧？」阿敏仲記得上次嘅事。
「冇啦，醫生話佢無啦啦急性中風，但身體又好正常‧‧‧都唔知咩事。啊‧‧‧係啊，佢去咗私家醫院檢查啊，好平渣嘛，幾萬蚊。」阿宏又展現番一張笑臉，坐喺阿敏隔離：「係呢，介唔介意我坐喺到？」
「你都坐咗落嚟‧‧‧唔通我話介意咩‧‧‧」阿敏另過一邊面，細細聲咁講。
「啊‧‧‧你都幾恩愛喎。」阿宏望住我，似乎打量緊我。
「係啊，」阿敏生硬咁點一點頭，講：「我日日都要陪佢嫁。」
「你個男朋友又唔出聲嘅？哈囉‧‧‧‧‧‧」阿宏想同我握手：「唔會真係自閉啊嘛‧‧‧」
「就算佢係自閉，我都係咁鐘意佢。」阿敏雙手捉住我手掌，雙眼閃閃發亮咁凝望住我。
「係喎‧‧‧‧‧‧阿敏，記唔記得我哋以前初中一放學就一齊打羽毛球？」阿宏轉移話題：「哈哈哈，今個暑假我哋再日日打啊？我可以教番你點打喎。」
「唔洗啦，今個暑假我要陪佢。」阿敏依然望實我。
之後佢兩個都唔出聲，就好似等緊我回答咁。
「阿‧‧‧宏？」我望住佢。
「係，咩事呢？」佢瞇起對眼，一副笑意：「唔出聲先生。」
「你阿媽搵你。」
「吓？」佢不明所以。
突然，阿宏手機響起，一接聽臉色就一沉：「阿媽你講咩話‧‧‧！？老豆過馬路突然俾車撞！？你等等‧‧‧‧‧‧我呢家即刻嚟醫院‧‧‧」
阿宏一收線，就即刻執嘢狂奔走人：「唔講先‧‧‧下次見，我有啲事‧‧‧‧‧‧」
「死神‧‧‧？」阿敏疑惑咁望住我。
「六筋清靜返。」我合埋對眼。
食到咁上下阿敏就埋單，講都唔講就拉住我隻手行出茶餐廳，向附近商場嘅超級市場進發，似乎佢係要為教阿寶整意粉而買材料。
「牛油、意粉、煙三文魚、洋蔥‧‧‧‧‧‧」阿敏突然回頭望我：「死神，你對意粉有冇興趣？」
「冇。」我即刻扭轉頭，望住另一邊嘅紅酒櫃。
「阿敏‧‧‧‧‧‧！」喺呢個時候，乾糧貨架另一面傳出一把少女嘅聲音。
係佢補習班嘅朋友──神婆。
「Hi，咁啱嘅。」阿敏望住佢。
「我嚟買嘢啊嘛‧‧‧‧‧‧你自己一個啊？」神婆偷偷地望住後面嘅我。
「我‧‧‧同我阿哥嚟啊。」阿敏拉一拉我衣袖，扯我過嚟。
「哈囉‧‧‧」神婆雙眼幾乎發住光咁，抬頭望住我：「好型仔啊‧‧‧‧‧‧」
「哈‧‧‧哈哈哈哈哈！唔講啦，下次有機會介紹你識。」講完之後，阿敏就拉咗我去埋單。
「你幾有朋友緣。」
「係啊，佢望多你一陣會食咗你添。」阿敏嘴角向上揚。
「點解？」
「如果佢知道你係死神你就死！神婆佢係一個好鐘意神鬼靈異嘅女仔，成日喺屋企試過好多通靈嘅方法，雖然都係失敗。」阿敏講起就不自覺笑起上嚟。
買完一袋整意粉嘅材料之後，阿敏就返屋企準備教上嚟嘅阿寶整意粉，我亦令自己隱身番，避免太多麻煩出現。
阿敏佢一返屋企就紮起馬尾髮，著住純白T-shirt加件淺藍格仔外套同牛仔褲就正式開工。將所有材料都放哂喺廚房，等緊阿寶嚟到。
「叮噹」嘅一聲，亦都示意阿寶嚟到。
「阿寶。」阿敏開門，就好似大姐姐咁歡迎佢入嚟。
「阿敏。」短髮嘅阿寶無力咁揮一揮手，就行咗入嚟。
「準備好未？」阿敏拉好手袖。
「唔‧‧‧」阿寶點頭。
自殺嘅味，越嚟越重。
「咁開始啦喎？」阿敏低頭望住矮瘦嘅佢：「首先呢，就切洋蔥先，試下切。」
「唔‧‧‧」阿寶點一點頭，就洗手、拎起個洋蔥開始切。
越切，眼淚就一滴一滴咁落下。
準備緊第二啲嘢嘅阿敏，無意中亦留意到阿寶滴咗眼淚上洋蔥到，就拍拍佢手臂：「阿寶？女人切洋蔥唔會喊嫁喎。」
「冇啊‧‧‧我‧‧‧」
「一路切一路講。」
「冇嘢‧‧‧」阿寶微微咁搖頭。
「係咪有唔開心？」阿敏安撫佢背脊：「都知你個傻女唔會突然間搵我，你平時都唔出屋企嘅。」
「我‧‧‧我想‧‧‧‧‧‧試下整俾男朋友食‧‧‧」阿寶眼淚一滴滴咁落下。
「唔‧‧‧我大概明白。」阿敏又問：「你同男朋友嘈交？」
阿寶搖頭。
「行房不順利？」阿敏再問。
阿寶又搖頭。
「佢對你淡咗？」
阿寶三搖頭。
「咁係咩啊～～寶寶？」阿敏兩隻手放落佢膊頭搖住佢。
阿敏見佢唔肯答，就唯有繼續教完阿寶整好哂成碟意粉先再問，而我就企喺一邊默默咁觀視著依一切。
經過咗三十分鐘嘅教導，總算到咗最後步驟──灑落磨成粉狀嘅芝士同煙碎三文魚。之後成碟意粉就正式完成，阿敏就將意粉放喺檯前，同阿寶面對面咁食意粉。
「阿寶，我真係唔習慣見你咁頹。」阿敏叉起意粉，望住阿寶。
阿寶乜都唔講，用手擦一擦臉上嘅眼淚：「我男朋友返工識咗第二個女仔‧‧‧‧‧‧」
「咩話？咁好少事姐傻女，如果佢哋冇單獨‧‧‧‧‧‧」
「之後我發現咗‧‧‧佢哋有單獨whatapps、fb同ig啲貼文又互相tag對方‧‧‧幾個鐘先覆我一次機，我越嚟越覺得‧‧‧佢唔鐘意我‧‧‧」阿寶說。
「咁‧‧‧你有冇同佢講過？」
「有‧‧‧‧‧‧佢淨係話普通朋友‧‧‧」
「咁你就信佢喇喎？」
「我除咗信佢‧‧‧都唔知可以點‧‧‧‧‧‧」
「阿寶，佢返邊到？」
「東皇冠假日酒店‧‧‧」
「我可以一陣陪你去講分手。」阿敏語重心詳咁講：「又或者你可以喺手機講，仲直接。」
「吓‧‧‧‧‧‧但係‧‧‧但係‧‧‧」阿寶睇落好驚。
「但係咩？」
「我‧‧‧我冇諗過‧‧‧同佢分手‧‧‧‧‧‧」阿寶低住頭。
「其實呢，明知自己有女朋友嘅男仔仲同第二啲女仔咁曖昧不清，都要唔過啦？阿寶你自己話係咪。」阿敏說。
「係‧‧‧但係‧‧‧又唔洗即時分手咁嚴重‧‧‧」阿寶答。
「咁你有冇警告過佢，唔好再同個嗰女仔行咁埋？」
「有‧‧‧」
「結果呢？」
「都係一樣‧‧‧」
「對你愛理不理？」
「唔‧‧‧」阿寶點頭。
「長痛不如短痛，阿寶！」阿敏伸手去拍一拍佢個頭。
「咁一陣就去搵佢‧‧‧‧‧‧」阿寶睇落好冇自信。
就係咁，食完意粉後，阿敏就陪佢去阿寶男朋友做嘢間酒店，打算接佢放工，順便問清楚佢同個位女仔嘅事。
點不知，阿寶一去接佢男朋友放工個陣，佢男朋友見到佢就好似嚇咗嚇咁，而我同阿敏則企喺一邊，先作觀察。
「哇‧‧‧你做乜過嚟啊‧‧‧」佢男朋友望住阿寶，一副估唔到嘅樣。
「接你放工囉‧‧‧」阿寶答。
「哦‧‧‧」佢男朋友愕然咁點一點頭，然後就拎部手機出嚟一路行一路撳。
我同阿敏亦都開始跟住喺佢哋身後‧‧‧‧‧‧
「一齊去食嘢啊‧‧‧？」阿寶問。
「唔啦，啱啱酒店入面食咗。」佢男友答。
「唔‧‧‧‧‧‧」阿寶突然伸個頭望下佢部手機：「佢覆緊邊個？」
「朋友渣嘛‧‧‧」佢男朋友即刻拎開部手機。
「咁神秘‧‧‧‧‧‧」阿寶更加頹。
「肯定背住阿寶‧‧‧有第二個女仔‧‧‧‧‧‧」阿敏握住拳頭，目光銳利咁盯住阿寶男朋友。
「咁‧‧‧我哋行下街啊？」阿寶又問。
「真係有啲攰‧‧‧下次先啦。」佢男朋友拍拍佢膊頭。
「其實‧‧‧你係咪想同我分手？」阿寶企喺到問。
佢男朋友呆咗呆，好長氣咁答：「唔係～～」
「咁你又咁對我‧‧‧！？」
「我點對你啊‧‧‧我係咁嫁啦，不嬲我都係依種性格嫁喎‧‧‧‧‧‧」
「都唔係咁嘅‧‧‧」阿寶厭惡咁望住地下。
「唉‧‧‧」佢男朋友嘆咗口氣。
「佢根本就等緊阿寶講分手。」阿敏企喺一邊望住，搖咗一搖頭。
「點解唔直接講？」我望住依一幕畫面：「鐘意就鐘意，唔鐘意就唔鐘意，點解要辛苦自己。」
「因為佢想迫阿寶講分手先‧‧‧唔想搞到自己個衰人咁，或者令自己個心好過啲？死神，你好難會明。」阿敏淡淡咁道出一句：「因為世界好簡單，人類好複雜。」
「‧‧‧」我望住佢兩個。
「咁‧‧‧‧‧‧試下分開先囉，暫時做番住朋友先？」佢男朋友提出。
「你都痴線嘅‧‧‧！」阿寶喊住咁拍打佢身體：「你連諗都冇諗過要挽留我‧‧‧‧‧‧你根本已經唔鐘意我，如果係咁就唔好浪費我時間啦‧‧‧！」
「‧‧‧對‧‧‧對唔住阿寶，我都唔知‧‧‧」佢男朋友完全唔知要點做。
「賤格。」阿敏行過搭住阿寶膊頭：「阿寶，返去先。」
「你係‧‧‧」佢男朋友望住阿敏。
「死神！幫我認住依個賤男嘅樣。」阿敏說。
「‧‧‧」又關我事？
「阿寶‧‧‧我返去再whatapps你‧‧‧‧‧‧」佢男朋友講完，就一面愧色咁行返屋企。
「嗚嗚嗚嗚嗚‧‧‧‧‧‧」阿敏送咗阿寶返屋企，成程阿寶就不斷係咁喊。
「阿寶‧‧‧雖然我都唔知可以點樣安慰你‧‧‧但係，你要頂住啊！」阿敏坐喺佢隔離，不斷安慰住佢。
但對阿寶嚟講，就好似已經乜都聽唔入耳，講乜都冇用。
「哎唉‧‧‧死神！你有冇嘅嘢法術係可以令阿寶忘記依一切嫁？或者等佢唔好咁傷心？」阿敏問我。
「冇。」我抱住手，企喺一邊斜視住佢哋：「要忘記一個人，根本就唔洗任何法術。」
「講嚟聽下‧‧‧」
「時間。」我說：「時間可以令你遺忘一切，包括傷痛。」
「但係‧‧‧」
「傷痛係必然，最重要係‧‧‧」我將視線從佢哋身上移開：「有再一次企番起身嘅勇氣。」
阿敏凝望住我側臉，似乎望得入神，然後默默點頭：「嗯‧‧‧我明。」
「嗚嗚嗚嗚‧‧‧‧‧‧」阿寶依然喊唔停。
「阿寶，繼續喊啦‧‧‧痛就一定嫁啦，最重要係你要捱得到啊。」阿敏繼續撫掃佢背脊。
「我‧‧‧我習慣唔到‧‧‧‧‧‧我習慣唔到得自己一個‧‧‧我習慣唔到一起身冇佢嘅早晨‧‧‧冇佢嘅晚安‧‧‧我已經習慣唔到抽離唔到‧‧‧點解佢可以咁殘忍‧‧‧‧‧‧咁恨心‧‧‧」阿寶真的傷透了。
有人說，時間是「治癒」一切傷痛的最好良藥。
但與其說是「治癒」，倒不如說，是「遺忘」。
遺忘你對他的所有情感。
大概夜晚八點左右？因為阿寶嘅屋企人已經返嚟，佢又喊得七七八八，所以阿寶都已經收哂聲，得番啲乾淚。
阿敏知道佢仲會喊，但都冇辦法，因為佢自己都要番屋企食飯。
「唉‧‧‧遇著一啲咁嘅男人真係慘。」阿敏搖一搖頭，好似諗唔通咁：「連光明正大，直直接接同你講分手嘅勇氣都冇。」
「你有遇過？」我問。
「我‧‧‧？！我‧‧‧‧‧‧當然冇啦。」阿敏回答。
「竟然‧‧‧」
「竟然‧‧‧？！你講到我好似遇過咁喎，死神‧‧‧」阿敏突然向後一跳，一手挽住我後頸：「估唔到呢？」
「點解唔遇番個。」我瞬閃到阿敏身後，阿敏就突然變咗挽住空氣，差啲搞到平衡唔到。
「你唔覺～」阿敏嘆咗口氣，說：「呢個世界啲人好偽善咩？」
「偽善？」
「我敢講，鐘意我嘅人‧‧‧十個有九個都係因為我個樣，」阿敏望住前方嘅路，有啲不是味兒：「真正睇內在嘅，又有幾多個？」
「‧‧‧」
「就算佢哋講係睇你內在，你又可以信得幾多？所以我覺得‧‧‧‧‧‧」阿敏笑一笑：「冇經歷過生死嘅戀愛，都係假嘅。」
「原來想同你拍拖要交埋條命出嚟，犠牲真係大。」
「拍拖咁神聖嘅事，當然要同生死關勾啦～！」阿敏得逞咁講，但我知道佢講緊笑：「而且其實人‧‧‧根本就唔一定要拍拖先生存到，就算自己一個都可以活得好好的！係唔點解依個世代嘅人講到唔拍拖就唔正常咁姐～～」
返去之後，阿敏就依然喺whatapps安慰阿寶，但我知道阿寶離真正嘅死亡不遠，死因亦都係為情自殺。
不過我冇刻意去提阿敏，因為我一早已經同佢講過‧‧‧‧‧‧
死亡，一直都喺每個人身邊。
離開阿寶嘅死期仲有一個星期，今啱，阿敏一家人喺依一晚就去到阿寶男朋友間假日酒店食自助餐。阿敏顯然有啲反感，但為咗食夜晚個餐都要去下。
所謂自助餐，就係酒店將所有食物擺哂出嚟，然後任由你自助去選擇。然而，係我面前嘅畫面，就好似一堆腐爛臭魚雞蛋放喺張檯面前，而人類仲好開心咁揀選緊食邊個內臟位置好。
「哇‧‧‧爸爸，你做咩拎咁多牛油返嚟？」阿敏望住自己父親碟上一疊細盒牛油。
「老公‧‧‧你生吞牛油啊？」佢媽媽都笑道。
「啊？原來唔係啫喱嚟嫁‧‧‧‧‧‧」佢阿爸爸抓一抓頭髮。
「你有老花啦～～」阿敏用拳頭按一按去太陽穴。
「哈哈哈哈‧‧‧！個套戲又真係幾正。」
「嗱，冇介紹錯呢～咁我哋幾時先可以正式開始先～」
「呃～我唔同有女朋友嘅男仔一齊架喎～」
「得啦咁，依家分手邊緣，就快散。」
講嘢嘅兩個人，正正係阿寶男朋友同另一個酒店女員工，而身為顧客嘅阿敏就正正咁啱見到呢一幕。
佢當然冇上前責罵，只係覺得，阿寶真係遇咗個賤人。
阿敏之後同我講番，世界好多時就係咁。
人前，人後，可以係兩個樣。
一方面話想要將你救起，另一方面就諗緊辦法鬆手。
因為直接放開所有罪名就會諸加喺自己身上，所以要一直拖，拖到連被救者都開始覺得累、覺得絕望，等佢自己鬆手死去。
真係有心救定冇心救，你根本睇唔出。
所以喺世界之中遇到一個能將你救起嘅人，係何其幸運嘅事。
雖然阿敏喺酒店見到呢一幕，但係都只能夠放喺心裡面，因為萬一講俾阿寶知，只會係第二次傷害。
「一對狗男女‧‧‧」阿敏落寂咁望住窗外繁華嘅夜景，問：「死神，到底佢哋會唔會有報應？」
我答你唔到。
「阿敏‧‧‧‧‧‧點解你最近成日死神前‧‧‧死神後？」阿敏母親問。
「吓‧‧‧？冇啊，練緊學校話劇姐。」阿敏答。
「遲啲真係要帶你番教會。」
「唔要～」阿敏繼續扭轉頭。
「老婆‧‧‧你真係去？」阿敏父親問：「你咁耐冇返去‧‧‧」
「唔，冇乜嘢嘅‧‧‧」阿敏母親點頭。
自助餐結束之後，佢哋一家就返去屋企，不過半路途中，傷心咗幾日嘅阿寶突然打俾阿敏。
「阿寶？你約我出嚟‧‧‧想去邊？唔‧‧‧‧‧‧好，一陣見。」阿敏收起手機。
我問：「佢約你？」自殺嘅味道越嚟越濃烈。
「係啊，佢喺屋企頹咗幾日、靜咗幾日之後，聽佢語氣好似好番少少。」阿敏說。