我係死神，專門審判自殺嘅人(離魂記‧前傳): 5

「等？你覺得我會有咩‧‧‧？唔好再俾假希望我‧‧‧‧‧‧！」阿南嘅靈魂由淺藍漸漸轉深紅色。


「你至少仲有阿媽啊！」阿敏大喊，自己都變得激動埋：「你知唔知有好多人想有個阿媽都唔得啊！？至少你阿媽唔會喺你細個嗰陣拋低你喺街啊，至少未做到依一步咁絕啊？點解人就唔係識珍惜身邊嘅事物！？」


阿南俾阿敏嘅激動嚇愣咗。


的確，人類總係會忘記身邊最好的，去追求沒有的。






不過好遺憾，時間已經啱啱好一分鐘。


我立即召喚「鬼手」將阿南嘅靈魂拉返入地獄，阿南喺被拉扯期間先回神過來，不斷望住同自己越嚟越遠嘅阿媽，眼淚不斷從眼框凝出‧‧‧‧‧‧


「阿‧‧‧阿媽！！！！」阿南向佢大喊，一眼都唔睜，想望得幾耐得幾耐：「我對你唔住‧‧‧我愛你呀──！！！！！啊呀呀呀呀呀呀──」






最終，阿南被「鬼手」拉返入地獄，現場回復一片安寧。啱啱嘅事，就彷彿唔存在一樣。


「啱啱‧‧‧‧‧‧啲嘢‧‧‧係唔‧‧‧係真‧‧‧」阿南母親呆坐喺地，情緒開始不斷累積。


「嗯‧‧‧伯母，阿南佢同你講嘅最後一句說話，你應該已經聽到。」阿敏望向窗外嘅黃金餘昏：「所以，你唔洗再擔心，佢都好愛你。」






之後阿南母親又再喊咗一次，唔同嘅係，今次冇再大哭大罵，而係好細聲咁默默抱住雙膝而喊，我諗，佢已經無悔。

經過一日嘅鬧劇後，到傍晚時份阿敏終於離開，獨自行返屋企。經過樓下蒼涼嘅公園時，輕風微微吹拂佢髮尾，佢似乎有啲嘢想講‧‧‧


「死神啊。」佢望住前面，冇特登回頭望住我講嘢：「係咪有遺憾嘅結局先係最美？」


「並唔係每場遺憾都無可避免，」我望一望灰暗濛濛嘅天空，說：「及時擁抱最該珍惜嘅人。」


「死神，我覺得應該要知你個名。」阿敏轉身、雙手放後一邊望住我，一邊倒後行：「其實你叫咩名？」


「我無名無姓。」我直視阿敏：「直接稱呼我死神。」






「咁‧‧‧‧‧‧死神啊，我最後嘅結果‧‧‧係會去天堂定地獄？」阿敏疑問。


「你唔特登去問，都可能會係天堂。」我盯住佢清秀嘅臉孔：「但我一答，你一定入地獄。」


「好囉～你咁神聖點敢高攀你。」佢笑一笑。


「你剛才點解咁激動。」


「激動‧‧‧？」阿敏望住我。






「人都已經死咗，明明唔關你事。」


「呃‧‧‧唔知喎～」阿敏佢扮到一副內有隱情嘅樣子。


「又話講你嘅故事我聽？趁依家講，唔好浪費時間。」我表情依然冷若如霜。


「喔？對我有興趣？」阿敏合嘴澀笑。


「知道你嘅故事，或者可以知道點解你逆天不死。」






「講還講，你拎咗我一年壽命點計！？你搞到我自己覺得真係好似短命咗咁！」


「召喚靈魂上人間係需要代價。」我說。


「咁唔講你聽～吹咩。」

「你‧‧‧‧‧‧呃我。」

「哈哈哈哈‧‧‧死神大人喺地獄未俾人呃過呢？」

結果，我果然被阿敏擺咗一道，根本唔存在乜嘢故事。跟喺佢背後歸家途中，佢問咗我好多嘢。






都係離唔開地獄入面嘅事，人間有句說話叫「好奇心害死貓」，佢真係一隻徹底嘅好奇貓。


「死神，你知唔知自己點嚟？」阿敏又問。


「我唔會答。」


「咁悶嫁你‧‧‧‧‧‧」


「話時話，你幾時請咗個攝影師番嚟？」我哋走到一條小巷個陣，我問。


「攝影師？」阿敏疑問。


「由你離開寶琳個刻，後面就一直有個人跟蹤偷拍你。」我說。


「你眼花渣～？」


「我隻眼連地獄有幾深都睇到，你區區一個人類質疑我？」

「咁‧‧‧唔洗理啦，應該係啲鐘意偷影女仔嘅變態大叔姐！走快兩步就冇事。」講下講下，阿敏腳步就跑起上嚟：「死神！我哋鬥快跑到對面街間小食店好冇？！」

「冇興趣。」無聊。

「贏咗請你食嘢囉！」說畢，阿敏就向前直奔。



最終，阿敏用咗十六秒七跑到對面街，正當佢回頭想望下我喺邊個陣，我就瞬間出現咗喺佢面前。


「哇‧‧‧！」佢嚇親。


「真係慢。」我不自覺揚起一抹邪笑。


「你‧‧‧你‧‧‧‧‧‧你玩瞬間轉移嘅‧‧‧！」


「輸就輸。」我撳住前額，搖一搖頭。「算啦，就當係請朋友食嘢。」阿敏走入小食店，坐低。


「朋友？」我重複引述多一次。


阿敏樓下呢間小食店面積雖小，但係五臟俱全，擺放住各種肉串、小食，又有汽水同啤酒，所以吸引咗唔少人放完工嚟休息下。


基本上除咗阿敏之外，其餘人都係有個伴一齊喺到食嘢。


「係，朋友。」佢點頭，語重心長咁講：「點解釋你聽呢‧‧‧‧‧‧即係，同佢相處會幾開心嘅人。」


「同我相處‧‧‧」我盯住她，問：「你好開心？」


「唔，都幾啊。」她會心點頭，笑住咁講：「至少你係死神，對住低嚟一級嘅人類唔會特登講說話迎合我，我都冇不屑你對待生命視若無睹嘅做法啦，因為我知道你係死神，收魂係你嘅天職。」


「‧‧‧」


「但我係人類嘛！我都有自己嘅同情心，所以見死不救‧‧‧‧‧‧」阿敏苦笑：「對我嚟講有啲難。」


「同情心？」


「人類獨有嘅嘢嚟嫁。」阿敏一邊睇餐牌，一邊同我解釋：「即係你見到一個人好慘，你自己都會切身感受到一樣‧‧‧‧‧‧」


「我當然知，你唔洗解釋。」


「咁死神，」阿敏轉頭凝望住我，一雙彷彿能貫穿靈魂的眼：「你又有冇同情心嘅呢？」


「我唔識傷心，我都無辦法興奮。」我望住店入面同朋友、愛侶食嘢傾計好開心嘅一對對：「一切，對我嚟講都係麻目。」


「咁‧‧‧你咪好悶？」阿敏似係想要更加睇透我。


「‧‧‧」我索性轉移話題：「又話請我食嘢？」


「唔！你食乜？」阿敏舉起手，向伙記喊：「要羊、牛、雞肉串各兩份，同兩罐啤酒啊。」


「啤酒，你飲得？」


「得！清涼喎，食肉串一定要配嫁，不過你唔現身又點食到咁嘅人間美食～？你唔係要我自己一個食啊？好lonely姐，個個都有人陪～～」


望住伙記放低嘅食物、飲料，再橫望鋪頭入面嘅眾生相，我合埋眼諗咗一諗，最後，決定走出去鋪頭向左走。


「‧‧‧‧‧‧」阿敏望住我嘅背影離去，嘆咗口氣打算低頭孤獨食肉串嘅時候‧‧‧‧‧‧


四秒後，我以人類肉體姿態從左面出現番，走入鋪頭、坐低番喺阿敏隔離：「如果喺間鋪頭突然憑空出現，會好引起恐慌。」


拎住一枝竹籤嘴中食緊肉串嘅阿敏笑咗一笑，然後吉咗舊羊肉放喺我嘴邊：「打開個口。」


「‧‧‧我自己嚟」我拎住枝竹籤將羊肉吞落肚。


感覺，就好似浸完尿嘅發濕海綿。「正～如果我死咗就真係再食唔到咁好味嘅嘢～～」阿敏睇落食得幾享受：「你頂唔順啲肉嘅‧‧‧‧‧‧咪飲下啤酒囉。」


如佢所講，我拎起罐啤酒嚟飲，一飲‧‧‧味道甜到我差啲想噴出嚟。


「點啊？」阿敏問。


「好甜好甜‧‧‧」我放低。


「吓？正常啲啲苦渣喎‧‧‧」


「我同人類嘅味覺唔同。」我整理番好衣領。


就係我講完依句無耐，就有個拎住羽毛球拍，身材高長、相貌尚算俊俏嘅少年行咗過嚟我哋依一檯，同阿敏打咗聲招呼。


「阿敏！咁啱嘅。」佢一見到阿敏，就瞇起對眼扮少少可愛又帶點古惑咁望住阿敏。


「咦‧‧‧阿宏？你經過呢到啊‧‧‧‧‧‧？」阿敏望住佢，再望望佢身後兩、三個朋友。


「係啊，你呢？」阿宏擺出一副笑眼，再望住我：「哦！男朋友仔‧‧‧‧‧‧」


我目無表情，望住佢。


「好囉～～追你咁耐都唔受溝，原來有個型仔男朋友～」阿宏暗裡咬一咬牙，繼續擺出一副友善嘅笑樣，想同我握手：「Hi！我係阿敏學校嘅同學。」


「呃‧‧‧」阿敏有啲呆咁望住我。

我望住個嗰叫阿宏嘅眼睛，佢一雙眼神輕佻無道，明明只係區區一個人類。

「吓？阿敏‧‧‧佢自閉定聾架？」阿宏笑笑口咁講，佢班兄弟朋友都喺後面陪笑。


「喂，唔好阻住我同我男朋友食嘢ok？」阿敏搭住我膊頭答。

就喺個阿宏想答下一句嘅時候，佢電話突然響起‧‧‧‧‧‧


「喂‧‧‧阿媽？」佢接起電話，幾秒後不可一世嘅表情隨即有變：「咩話‧‧‧‧‧‧！？你話老豆突然喺屋企全身抽搐同嘔白泡！！？報警先喇你！！！！我即刻趕返嚟！」


阿宏收咗線之後，就即刻再見都唔講一聲，就拋低朋友急步離開：「我老豆有啲事‧‧‧你哋食先‧‧‧‧‧‧」


「你朋友走得真係快。」我微笑。


「死神‧‧‧你‧‧‧」阿敏愣望住我。


到結帳離開個陣已經夜晚九點幾，阿敏行番屋企嘅路上，先同我講番啱啱個嗰叫阿宏嘅男仔，佢係咩人。


「死神‧‧‧你今日見到個嗰男仔呢，係我讀緊間中學嘅同學嚟。」阿敏一邊行一邊講：「我初中個陣參加過一排羽毛球班，同佢都算‧‧‧‧‧‧friend過一陣。」



「關我咩事？」跟喺後面嘅我問。


「無啊‧‧‧」阿敏又笑咗一聲，說：「同你講下姐，不過我一直覺得係黑歷史嚟，個陣年少無知。日日同佢去羽毛球場打波，突然有一日佢無啦啦走過嚟抱起我‧‧‧‧‧‧自此我就對佢好反感，第二日仲即刻走埋羽毛球班。」


「對佢嚟講未免太慘。」我揚起淡淺的嘴角。


「聲明埋先！我冇同過佢拍拖！！」阿敏舉起交叉嘅手勢：「全校嘅男仔都冇～！」


「呢啲說話，你應該同你鐘意嘅人講。」我說。


阿敏點點頭，就繼續返家嘅旅途。

之後依一段日子，大約過咗兩個星期？我都默默咁跟喺阿敏身後，每一朝佢同我講「早晨死神」，每一晚佢同我講「早抖死神」，就彷彿已經變成一個習慣。而我則永無變過，一直跟喺佢身後。


有時跟佢去補習，有時跟佢去行街、有時跟佢去海旁、有時跟佢去睇戲、有時跟佢去聽歌，我好似入咗佢嘅生活咁，陪佢做每一件事。


喺外人眼中，佢好似自己一個人咁。


但喺佢眼中，永遠都有一個著住黑色西裝嘅死神跟喺佢背後。


而每一日，佢都會問我唔同關於生死嘅問題。


每一日，佢都會叫我試食唔同嘅食物（一樣咁難食）。


每一日，佢都會對住我笑。


一個咁樂觀嘅女仔，我都開始產生疑惑──佢真係會自殺？每每望住阿敏佢嘅臉孔，我都會諗起依個問題。


但「生死冊」既然有所記錄，點解會一錯再錯。


佢到底‧‧‧


點解會不斷違反生死嘅時律‧‧‧

後尾我知道，能夠影響生命嘅‧‧‧‧‧‧






就只有生命。


藍天白雲，青草送風。


阿敏今日約咗班朋友去南生圍，個到嘅樹長度有二十呎以上高，喺香港係好少見。而佢哋出發係先搭地鐵、再到輕鐵、然後巴士、再者行路、最後租單車入去。


阿敏亦都好似已經習慣咗我嘅存在一樣，就算我全天候二十四小時跟喺佢身後，都唔會覺得反感，反而好似多咗個傾計嘅對象。


所以無論佢同朋友去咖啡館飲嘢，定係一齊去食飯，我都會喺背後，直到我查明原因個一日。


「死神，識唔識踩單車啊？」阿敏喺天氣明媚嘅陽光底下，奶白嘅皮膚顯得白裡透紅。


「唔識。」抱住雙手企喺一邊嘅我，瞬間就轉移到佢前面一旁嘅石牆背靠住。


「喂‧‧‧你下下玩瞬間轉移，點感受到美景呀？」踩緊單車嘅阿敏望向我。


「美景？」


「係啊，南生圍就好似一個天堂咁靚嫁！」阿敏答。


「點解人類唔鐘意地獄嘅景色，比喻一個地方靚點解一定要用「天堂」。」踩單車嘅阿敏一超越過我，我就再瞬間轉移到更前嘅地方等佢。


「呃‧‧‧‧‧‧地獄俾人印象太負面啦。」

「咁我反而想睇下，你哋人類嘅審美觀。」


「好，跟住我啊。」阿敏講完，就發力向前踩踏：「喂喂‧‧‧‧‧‧死神。」


「唔？」我望住阿敏。


「陽光燦爛嘅日子，」阿敏望向頭頂上和煦嘅太陽，露出個笑容：「要多啲笑下嘛。」


當然我冇理佢，我從來就唔會笑。


同阿敏仲有佢班朋友到達所謂嘅天堂南生圍後，我覺得好普通，都係一片草地、幾株高樹、仲條河咁解，點解佢哋每個人都可以好似好享受咁‧‧‧‧‧‧


有人影相、有人追逐、有人睇景，對我嚟講唯一優點就係夠人少，安靜。


「阿敏，準備野餐喇。」同阿敏出嚟嘅係四女一男，聽講全部都係佢補習班識，見今個月冇嘢做考哂試就嚟放鬆下。

「死神！」阿敏向我輕輕地招手：「過嚟啦‧‧‧‧‧‧」


「一，我對發濕海綿冇興趣。」我搖住頭講：「二，我上嚟人間係調查你，唔係陪你遊山玩水。」

「嚟啦‧‧‧怕咩羞姐！」佢對住我笑。

果然，不作理會的沉默是應付她最好的方法。


「阿敏‧‧‧‧‧‧我哋有啲嘢想問你‧‧‧！」其中一個女仔向佢招手。

「唉！真係啊，你自己喺個到呆企啦，傻仔。」阿敏不屑我一眼，就去跟朋友野餐去。

「阿敏‧‧‧點解你近排成日喺咁對空氣講嘢嘅？」一個外貌酷似神婆的女生問。

「係囉係囉‧‧‧‧‧‧！我都見到喎‧‧‧！」另一個短頭髮、睇落幾正能量嘅女仔都問。

「你唔係讀書壓力太大啊！！」其中一個叫阿寶嘅女仔追問。


「唔係唔係～」和風輕輕拂過阿敏嘅秀髮，佢撥一撥向另一邊再答：「咁係因為‧‧‧‧‧‧我練緊話劇！」


「吓吓？咩話劇啊？」個位叫玉子嘅正能量女仔問。


「唔，叫《死神來了》。」阿敏點一點頭，答。


神婆拎出一堆塔羅牌出嚟：「咁就等我睇下你演出順唔順利啦！」


「嘩‧‧‧你信呢啲嘢嫁？」阿敏望住神婆啲牌。


「寧可信其有！抽到好牌咪信，唔好咪唔信囉‧‧‧‧‧‧」神婆攤開一張張塔羅牌：「阿敏，揀一張！用直覺！」


「唔‧‧‧」阿敏瞇著眼斜望我一眼，就隨心指咗其中一張：「就呢張。」


「好！開嚟見我！哈！！！」神婆動作極大咁翻開阿敏揀個張牌。





「死神」一開出嚟，所有女仔除咗阿敏之外都不自覺掩住個口‧‧‧‧‧‧


「竟然係死神‧‧‧‧‧‧」神婆數下手指，帶啲神經質咁講：「死啦阿敏！你出演依場話劇個陣可能會賴嘢呀！」


「係唔係真啊？」阿敏反而笑住咁問返。

「你可以信可以唔信嘅‧‧‧‧‧‧不過寧可信其無啊！」神婆一手掃開啲牌，說：「唉算！好餓啊喂，食嘢啦喂！」


叫阿寶嘅女仔拎咗個飯盒出嚟，打開佢：「我整咗‧‧‧愛心蛋卷，你睇下‧‧‧我特登用茄汁醬吱成心形架‧‧‧‧‧‧啊！點解個心形會散咗架‧‧‧‧‧‧」


神婆拎一個大盒出嚟，笑住咁打開：「我整咗好味嘅「普通」飯團，入面冇加魚眼、辣椒、雞子、牛歡喜、包你班傻女食到「姐姐」聲～」


其餘兩個女仔就分別整咗三文治同炒飯，最後一位男仔‧‧‧佢仲拎緊部單反不斷影緊四個女仔。


「喂！阿‧‧‧阿陳文輝，你唔洗再影啦，抖下喇，食啲嘢先。」神婆對個男仔講。


「唔‧‧‧唔緊要。」個男仔好細聲、聲線好弱咁答，然後繼續不斷影佢哋。


‧‧‧‧‧‧特別係阿敏。





直到佢影到咁上下，放低部單反相機打算食啲嘢嘅時候，我先見到呢個男仔嘅樣‧‧‧


佢咪係‧‧‧‧‧‧

「喂！陳文輝，你做咩係咁食阿敏整啲意粉啊！！食下我啲飯團啦！」神婆大罵。


「因為好好味‧‧‧‧‧‧」個位叫陳文輝嘅男仔，展出滿足、幸福嘅神色。


「啊‧‧‧死啦死啦，凍哂啦‧‧‧‧‧‧」短頭髮個位正能量女仔阿寶，佢楚楚可憐咁望住自己整嘅蛋卷。


「阿寶啊！你唔好成日咁婆媽啦，放得入肚就得啦！！」神婆右手拎住三文治，左手拎住私家帶嚟嘅炸油脾。


「哈哈哈‧‧‧女仔細心係好事啊，阿寶。」阿敏讚賞。


「阿敏你點整到咁好食架‧‧‧？」阿寶睇落係一個怕羞嘅女仔，因為佢連聲線都好似個陳文輝一樣咁弱。


「哈哈哈？做咩啊，整俾男朋友？」阿敏以姐姐嘅姿態問。


「唔‧‧‧」阿寶怕羞得望地點一點頭。


「搵日上我屋企教你啦，唔係好易學嫁！」阿敏提醒佢。


今日朝早，我見阿敏五點就起身準備所有材料，睇落都唔易整。


「啊！咩嚟架神婆‧‧‧‧‧‧」一個其貌不揚嘅女仔食咗佢整嘅飯團。


「魚眼飯團啊，嘿嘿嘿，有好多蛋白質架，吞咗佢啦傻豬！」神婆說。

「阿文輝，介唔介意睇下你影啲相？」神婆伸手問。


「嗯‧‧‧」陳文輝睇落都唔係個種大膽嘅人。


神婆拎咗相機望兩望，有啲唔滿意：「你影阿敏就咁多張！影我就得三、四張，仲要張張照妖鏡咁款！想點啊o靚仔！」


「幫你再影多啲！」陳文輝一手搶過部相機，就幫神婆影相。



到佢哋食得七七八八時，就走咗去條橋影相，一係就追逐，唯獨阿敏繼續坐喺地鋪上，抬頭欣賞秋季嘅落葉淡風。


唔夠幾分鐘，佢又望一望我一眼，見我仲企喺一顆樹前靠企住，就雙手放後懶神秘咁行過嚟。


「估下我拎‧‧‧‧‧‧」阿敏佢未講完成句，我已經答，


「意粉。」


「喂！你用透視啊？」阿敏放後嘅一雙手果然拎緊一盒意粉：「我特登留俾你。」


「劣食。」我卑視一眼。


「你食一啖先講喇！」阿敏作勢踩我隻腳。

為咗快啲重返安靜，我決定快手試一啖順下佢意就算，一放入口，果然不出所料，今次係發霉芝士配死魚嘅味道。


「又好難食啊‧‧‧？」阿敏問。

「仲洗講？」

「唉‧‧‧‧‧‧都試咗成兩星期，都仲未知你可以擺啲咩入口‧‧‧」阿敏佢望住我，不明解咁搖一搖頭、再苦惱咁搖一搖頭、再不屑咁搖一搖頭。

「咔」、「咔」、「咔──」就喺阿敏凝思住我個陣，陳文輝又再不斷用單反相機影住佢，就好似想捕捉阿敏嘅每一秒。


「唔好行過嚟我身邊。」我說。


「點解啊？」阿敏笑住問，反而行前咗一步。


「鏡頭對住我，會令我覺得好唔自然。」


「鏡頭？」阿敏聽完我講，就向後望一望，然後就發現咗不斷係咁影佢相嘅陳文輝。


陳文輝俾人發現咗之後顯得有啲手足無措，就扮影隔離嘅樹林、河景掩飾，但都唔會逃過我法眼。


「呃‧‧‧你唔洗理嘅，佢係好鐘意影相。」阿敏拍住我膊頭：「同埋反正都唔會影到你～～」


「佢唔係鐘意影相，」我掃開阿敏拍住我膊頭隻手，再撥一撥走啲塵：「佢係鐘意影你。」


「係咩？冇所謂啦。」被我無情掃開隻手嘅阿敏，竟然反而拉住我手臂：「死神，同你影幾幅相好冇！」


「唔好。」


「好！？」


一秒後，被拉住手臂迫住移動嘅我，講：「你知唔知，你呢家喺外人嘅眼中係點？拉住一團空氣移動，個動作十分之白痴，唔知以為你跳緊舞。」


「係啊？唔緊要啦，逼到你同我影相喎。」阿敏一直傻笑一直拉我到南生圍入面一條連住河邊嘅木橋。

「嗱，記住笑啊。」阿敏拎部手機出嚟，較自拍模式。


當然，我唔會作任何表情，或者眼神交流，就好似出席喪禮一樣咁。


「你影出嚟嘅每一幅相，都會係空氣，入面除咗你，唔會見到有第二個人。」我提醒。



「我個腦入面有你咪得。」阿敏望住我。


「唔覺咁係自欺欺人？」


「至少，我瞞到自己一世嘅話，咁呢個就唔會係謊言。」


望住阿敏拎起手機自拍嘅時候，雖然鏡頭入面冇我嘅存在，但佢都盡可能好似預留咗一個位置俾我咁，每一幅相睇落好荒謬‧‧‧‧‧‧


但對佢嚟講，可能都係一段記憶。


遺憾嘅係‧‧‧


喺調查完畢之後，我就會徹底刪除佢所有記憶，就好似從來冇喺佢生命出現過咁。

所以‧‧‧或者有日，佢再拎出依啲相嚟睇個陣，有嘅只有一片灰白。

「影完？」我雙手放入衣袋，暫時離開。


「哈哈，死神，唔知點解我總係覺得‧‧‧‧‧‧」阿敏望住其中一幅同我嘅自拍，我企嘅個嗰位置：「你喺依一張相，好似‧‧‧默默咁微笑‧‧‧？」




我一邊答一邊離開條橋：「荒謬。」



就當我行返去草地個一邊，就見到阿敏個幾個朋友圍住一齊，好似秘密傾緊啲咩，唔俾得仲喺條橋個邊嘅阿敏知。

「喂‧‧‧偷偷同你哋講個秘密！」神婆細聲咁講。


「‧‧‧咩啊？」短髮嘅細膽女仔，阿寶問。


「唔好講出去啊‧‧‧我驚阿敏知道咗會傷心‧‧‧‧‧‧」神婆悲傷咁摸住自己額頭，拎出剛才塔羅牌抽出嘅個一張「死神牌」出嚟：「其實‧‧‧我啱啱幫阿敏驗嘅，唔係事業運‧‧‧根本唔係幫佢測佢話劇成唔成功‧‧‧！」

「吓！咁會係咩啊‧‧‧？」



「係‧‧‧‧‧‧愛情運！！！！」神婆雙手掩住塊臉：「死啦，你知女仔對愛情幾有憧憬嫁喇，如果我剛才同阿敏講你愛情方面係零機會，佢真係頹咗都似！！！」

「車～～咁渣。」第二個女仔覺得好少事。

「係囉‧‧‧阿敏咁嘅質素，應該好多男仔想追啊‧‧‧」阿寶說。



就喺呢個時候，陳文輝出現喺班女仔嘅背後，陰聲細氣咁講：






「啱啊‧‧‧」