「高登情緣」「港產片Feel」有一種愛叫做純愛。: 第二十八章

雖然曼喬話男人喊好無用，但係戒喊呢樣嘢我真係冇辦法再聽曼喬話，我睇住信喊咗，旁如無人咁喊。
 
嗰傻仔，會唔會係我？正當我諗住去曼喬鋪頭問個清楚
 
曼喬Facebook更新咗一張佢同佢鋪頭男仔嘅合照。
 
「Happy For 5 Monthes.3. Love You Babie!」OK，朋友都可以Love嘅啫，我要問清楚佢。
 
而令我震撼嘅係，佢Facebook set咗同某個叫Jeff嘅男仔嘅名，為交往中狀態。
 




呵呵，原來我同曼喬嘅半年感情，俾一個五個月感情嘅男仔擊敗。
 
原來沒有，從來都沒有，呵呵，我係一個可憐嘅水泡，我係一嘅悲情嘅兵仔。
 
行喺街中，我突然失控地喊，喊咗好耐好耐。
 
世界上傻人咁多，少一個唔少，為何偏偏又係我？
 
去七仔買咗幾支啤酒，吹曬佢，咁大嗰仔第一次飲酒，亦係第一次獨上青樓，開門嘅姐姐果然係意態撩人，燈光粉紅下，瀰漫著一種即將大戰嘅氣氛。
 




「想點玩呀靚仔？」姐姐問。
 
「你乜都唔駛做，陪我訓喺度，傾下計。」
 
「下？乜都唔駛做？」
 
「係呀，錢照俾。」我即刻喺銀包度拎出600蚊俾嗰姐姐。
 
「你咁得意嘅？上網識女仔都得啦，搵人傾計。」
 




「搵你最啱咖啦，大家等價交換，唔需要有情感交流，你聽下我呻就ok，事後我俾錢你，喺呢個空間入面，你做下我嘅樹窿啦，我好辛苦。」講講下我喊咗，成個人攤喺床上。
 
「你失戀呀？」
 
「係戀都冇戀過，嗰女仔冇同我講過愛我，係我一廂情願，以為擊敗佢心目中嘅兩座大山，我就可以變成佢唯一嘅大山，點知原來都係我幻想出嚟。佢根本唔愛我。我呀傻到明知佢有男朋友，我都走去求神明保佑佢哋，佢減肥我陪佢減肥，我仲同佢一齊構思點冧佢條仔，佢話鐘意香港鐘意旺角，我就成日陪佢行旺角行香港，佢話鐘意香港特色小食同點心，我就去學廚，開埋舖頭煮俾佢食，點知原來到頭黎我只不過係一隻兵。」
 
「搵過第二個女仔呀嘛。」
 
「唔啦，呢個女仔對我好重要，佢改變咗我一生，我有今時今日，佢影響我好深。可惜，佢離開咗我，仲同第二個男仔喺埋一齊。」越諗就喊得越犀利。
 
姐姐遞紙巾俾我，我啲眼淚卻失控咁流。待我平伏少少後，我繼續講：
「點解要寫信離開，唔當面同我講？又要俾我發現佢冇返澳洲，佢留喺香港！」
 
 
 




「點解離開你？」
 
 
「咁佢同佢男朋友散咗，嗰晚佢嚟我屋企搵我，ok冇問題，但佢開始咀我，之後想咩咩嗰啲。我係鐘意佢，我同佢亦有曖昧咁嘅關係，但我太熟佢啦，我feel唔到佢鐘意我，如果佢純粹想搵嗰SP，咁我梗係唔啦。就係咁，我拒絕咗，點知第二朝佢就靜靜哋走咗，只留低封信同我道別。」
 
「可能佢都好鐘意你呢。女仔想有人錫咖嘛。」
 
 
「可能我青頭仔，我feel唔到，我覺得如果要咩咩，大家要相愛先得，而唔係為咗一刻嘅開心。」
 
我見嗰姐姐都幾好人，於是一個禮拜有2-3次都上去禁鐘仔搵呢個姐姐傾計。佢有講過不如攬下我，我拒絕咗。我以後唔會再攬同佢冇任何感情基礎嘅女仔，一定唔會！