「高登情緣」「港產片Feel」有一種愛叫做純愛。: 第二十七章

我特登再整多幾張宣傳單張，寫明堂食平10蚊，仲有卡位坐。再吩咐呀Ken拎去俾曼喬。第二日Lunch Time，曼喬果然嚟咗食飯。我偷偷喺門內望，佢隔離個男仔同佢言談甚歡，令我醋意大爆發。
 
「條女要A餐，黑椒雞扒飯+一盅兩件 蝦餃同牛肉飲凍咖啡。條仔要B餐……」
 
「B餐你交返隔離搞。」未等Ken講完，我已經截住佢，然後喺我嘅愛心角落拎出包好嘅點心，而我亦親自整雞扒飯。
 
普通蝦餃嘅蝦邊有我嘅愛心點心咁大粒，蝦餃一定唔可以蒸到透明，要係本身嘅白色先好食。牛肉我亦加多少少香菜，黑椒雞扒飯我亦專登煎過。
 
「安仔，做乜整得咁精緻呀？出面個客你朋友嚟？」師傅見我好用心咁擺盤，其他單都唔接，專心喺自己位置整一個lunch set。
 




我笑住話唔係，繼續一邊整，一邊偷望出面嘅曼喬真係幾時都咁靚，望多幾眼個心都跌埋出嚟咁。終於整好曬，叫Ken拎出去。
 
留意曼喬見到點心嘅表情，留意曼喬食緊嘅表情，如果唔係唔想打擾佢，我一早衝出去攬住佢。佢選擇唔同我聯繫一定有佢理由，我尊重佢。
 
本來我整埋甜品，但又費事打草驚蛇，唯有自己一邊食一邊偷望曼喬。
 
直到佢同個男仔離開，我即刻捉Ken入嚟問話。
 
「嗰女仔有冇講低乜嘢？」
 




「冇特別同我哋講，但我聽到佢同個男仔講啲嘢好好味。」
 
有曼喬呢一句，我自己已經冧咗自己，我嘅努力學藝冇白費到……
 
 
 
 
 
 
開心嘅係，自此曼喬幾乎日日都嚟食嘢，俾足機會我精心炮製好味嘅嘢俾佢，亦俾足時間我偷偷望佢。每一日最開心嘅時候就係佢嚟食嘢嘅個一粒鐘。而更開心嘅係，曼喬開始玩返FB同IG，成日上載佢自己嘅新圖，但係佢依然冇回覆過我PM、




 
冇諗過高登討論區，呢個我同曼喬認識嘅橋樑，亦因為大量巴絲過檔連登討論區而變得有些少冷清，但係我冇註冊連登Account，因為：
 
「我係高登仔嚟咖嘛，過乜嘢連登？」
 
而更加冇諗過我之前係Facebook PM呀Wing 嘅信息，終於俾呀Wing睇到，而佢竟然回覆咗我，當日嘅PM內容係我問佢點解會同曼喬分手。
 
「你係邊個？」
 
「鐘意曼喬嘅人。」
 
「我點解要話你聽？」
 
「五萬蚊。五萬蚊買你同曼喬分開嘅原因。」
 




「你唔直接問曼喬？」
 
「我唔想佢傷心，唔想問佢，更加唔想佢諗起唔開心嘅嘢。」
 
「五萬蚊買個信息，你係咪傻咖？」
 
「呢層你唔駛理，唔該你巴打，你話我聽。」
 
就係咁，我帶住五萬蚊現金，約見呀Wing。
 
「佢咁愛你，點解會分手？」等呀wing一坐低，我即刻發問。
 
「呢封信俾你，我寫嘅，我走咗之後你慢慢睇，錢呢我就唔需要，如果你係愛曼喬咁就好好對佢啦，係咁先。」Wing遞給我一封信。
 
待佢走後，我即刻拆開信黎睇。




 
「無可否認，曼喬曾經愛過我，我亦好努力去愛佢。但冇辦法，我唔鐘意女人，我係鐘意男人咖。曼喬之後搵返我，咁啱我同我男朋友嘈交，所以我咪借嚟激我男朋友。不過我想同你講，Day1我已經同曼喬講過呢單嘢，佢係同樣幫我，唔存在我呃佢咖。同埋呢，所謂分手個一日，佢同我就講，其實佢鐘意嘅人唔再係我，而係有個傻仔，佢話我只係佢一個心結，見返已經打開咗。佢係鐘意個傻仔。」