「高登情緣」「港產片Feel」有一種愛叫做純愛。: 第二十四章

曼喬走咗，日子還是要繼續過，只是我加劇掛念，每日loop d過期錄音，過期對話記錄，過期相片，喺腦海中搵返所有曼喬相處嘅記憶，幻想佢仲喺我身邊陪住我。
 
曼喬特別情迷港式點心，同鐘意行旺角，佢話旺角最能夠代表到香港，所以佢最鐘意旺角。本來我唔係特別鐘意香港點心，喺曼喬潛移默化影響下，我都會成日走去食點心，食住點心諗起曼喬食點心時候嘅表情同對白，經常能令我會心一笑。
 
於是有日心血來潮，我就放下網絡生意，唔再租錦繡花園。而係走咗去茶樓學廚，我想自己學整港式點心。喺廚房入面全心全意整嘢食，諗住每一個點心都係整俾曼喬食，幻想佢食住我整嘅點心幾咁開心。而我每日都keep住 喺Facebook同IG pm 曼喬，但係都冇人覆，曼喬亦冇再上線。我唔知道佢係避我定避所有人，我只知道我傻甘甘每日pm佢Facebook同IG，開太空卡去捕捉曼喬WhatsApp有冇上線，有冇更新status，有冇人覆。
 
由於間茶樓喺荔枝角，而我喺沙田租咗間劏房住，所以我每日都會搭港鐵返工放工。荔枝角返沙田，肯定要喺太子轉車搭去九龍塘再轉東鐵。而我就專登喺太子落車。記得以前成日同曼喬行旺角，落車行一次旺角重拾樂趣，毒L真係最擅長幻想，我都唔例外。於是我每一日都特登喺太子落車，行完一輪彌敦道再搭van仔返沙田。
 
澳洲其實有乜特色？我對澳洲嘅認識只停留係悉尼奧運，曼喬住悉尼，我去搵佢？但點搵，冇地址，悉尼咁大點搵？我諗到時候可以搵私家偵探掛，同埋見到面後我話我識整港式點心，我哋開間 OK茶室（O係因為我叫On仔，K係因為佢叫KK。），喺澳洲發展又得，返香港發展都得，嫁俾我啦。
 




總算唔係只話感情感情，我愛你有幾多分，而係我真係拎出誠意去求婚，因為我真係好鐘意曼喬，就算佢唔鐘意我，就算佢心入面有第二個人，我唔介意呀，我愛佢咪得lor。以前有個女作家都話，女仔最緊要搵一個愛錫自己的男人，而唔一定搵一個自己愛的男人。我咪就係愛錫Kiko嘅男人。
 
所以我好俾心機學整點心，每日可以幻想曼喬喺我身邊，每日行一轉彌敦道獲取養份，有咗寄託，日子好過好多，每日攬住同Kiko嘅點點滴滴嚟訓覺。
 
每日笑住行彌敦道，見到得意飾物就買，見到得意嘢就買，感覺遲早會見返曼喬然後送呢啲俾佢。噢，係，玻璃球，佢最鐘意水晶球球，於是我又走去買，堆到成間房間都係。
 
高登亦成為我尋找曼喬嘅地方。我上高登睇下邊個絲打似係，我上高登出下post抒下情，睇下佢會否見到。