「高登情緣」「港產片Feel」有一種愛叫做純愛。: 第二十三章

嚟唔切睇信，我即刻揸住封信同拎埋電話銀包跑出房門，衝出門，WhatsApp 曼喬，Wechat 曼喬，Telegram 曼喬，Line 曼喬，Facebook 曼喬，打俾曼喬冇人聽，我即刻call Uber 的士。機場，曼喬一定仲喺機場。
 
打咗好多次曼喬都冇開電話，我喺留言信箱追問咗好多。上咗Uber的士，我再睇返WhatsApp嗰啲通訊apps，發覺冇閱冇回，WhatsApp Icon係空白。我諗曼喬已經block咗我。我努力諗返琴晚嘅情景，我做錯咗啲乜？點解要不辭而別，明明我幾乎成晚冇訓，一訓就錯過咗送曼喬機？好憎自己點解可以咁白癡。
 
喺的士上，我開始睇返封信。
 
「安仔，多謝你陪咗我半年，呢半年係我人生中最快樂嘅半年，我爹地媽咪都係想我返去澳洲，我要返去澳洲啦，你呀正正經經識個女仔啦，你咁好仔，一定會搵到幸福。唔好搵我啦，我麻煩咗你咁耐，再見，安仔。」
 
我喊唔係因為封信嘅字少，而係原來我真係做咗兵，或者唔係高級兵，而係水泡Only。對於我嚟講，殘忍嘅係唔係曼喬唔愛我，而係曼喬當我係水泡。點解唔係好似好朋友咁？點解唔係好似屋企人咁？唔鐘意我點解又要對我好似男女朋友咁，點解要冧我？點解要攬我呀？原來水泡只係負責借出體溫，永遠冇辦法收返佢個心。
 




佢澳洲EX，佢最新EX 呀Wing，兩座大山都轟然倒下，但都依然冇辦法令曼喬愛上我呢座小山，我一直以為自己係第三座小山，原來都係沒有人。
 
「原來沒有 從來都沒有
纏綿邂逅
完全虛構　那一刻含情回眸
　原來是我妄想裡的　那點綠洲
原來沒有　從來都沒有
　教我緊張得心跳這麼久
　到了這一刻終於望通透
　其實愛情來過　半分鐘　也沒有」




 
趕到機場，我收一收眼淚，費事成個眼鏡框都係霧，我定神搵曼喬，而同時間亦留意電話有冇收到電話，Facebook同Ig會唔會覆我呀。
 
曼喬會唔會好似第一次見我，同我玩捉伊因，要捉夠幾粒鐘先好似寵物小精靈咁跳出嚟？
 
就係抱住那個信念，我搵到夜晚都搵唔到曼喬！原來我亦成日冇食過嘢，頭開始暈暈地。
 
出嚟啦曼喬！如果見到我咁可憐的話，唔好再匿埋啦，我真係好鐘意你咖！
 
又係抱住我好鐘意你呢句說話嘅力量，我搵到夜晚十一點，疲憊不堪訓咗喺座位上。




 
迷迷糊糊當中有個女仔笑住行埋嚟，我聚焦一睇，係曼喬！
 
「做乜咁傻豬呀？」
 
「我真係好鐘意你咖！我地喺埋一齊啦，唔好返澳洲。」
 
「等你呢一句好耐啦，死傻佬。」
 
幸福呀，Sweet呀，但點解攬起個身體咁虛無縹緲嘅。正當我想望真啲自己係咪發緊夢，夢就醒咗。
 
我表白了，但已經趕唔切了，心愛嘅女仔已經走咗返澳洲。