「高登情緣」「港產片Feel」有一種愛叫做純愛。: 第二十一章

曼喬嘅IG同FB亦好少更新圖片，就算更新得都唔係同呀wing嘅合照，我心諗真係好奇怪。點睇都唔似係拍拖咁……到底發生乜野事？
 
陳家安，唔關你事，陳家安，人地家事咋！
 
拼命說服自己咪撚理，但最後都係忍唔住WhatsApp 曼喬
 
「點嘛？成日喺Facebook叫春，你唔係有你嘅呀Wing咩，仲記得我呀？」
 
 
 




「乜你理我啦咩？」曼喬WhatsApp覆
 
「不嬲都理你咖啦，點嘛，又喺Facebook情感大爆發呀！」
 
「你唔想理我就算啦。」
 
「唔會唔理你，係最近多咗出去同巴打絲打玩，無謂成個毒L咁下下玩電話。」
 
「想聽下你把聲，打俾你OK？」
 




WhatsApp傳來視像通話，只見曼喬一個人坐喺房間入面，無精打采。
 
「呀Wing OT未返？」
 
「係。日日都凌晨兩三點先返，第二朝又八點幾走。」
 
「冇Day OFF？」
 
「成個禮拜只係帶過我兩次出去食飯，仲要喺同佢同事一齊食，食完佢又返公司做嘢，叫我cal的士返屋企」
 




「咁男人事業為重呀嘛。」
 
「都唔sweet嘅！」
 
「咁有冇X交叉Z Y（我同曼喬之間嘅術語，即係搞嘢。）？」
 
「冇。」
 
「唔係呀？咁索都噠唔著佢嘅火？俾著係我肯定打飛機打天光。」
 
「咁佢成日咁夜返，佢攰，我亦冇mood。」
 
「乜你哋唔係日冧夜冧咖咩？」
 
「雖然佢會冧下我，但係佢真係唔會掂我先奇怪，even錫錫都冇。」




 
「等佢放假再同佢浪漫過一晚lor。」
 
「喂，陳家安，係咪識咗第二條女？」
 
「邊有呀，我邊有人要呀？」
 
「你個樣OK咖，又咁風趣幽默，加上瘦咗，主動啲啦，唔好再做毒L啦。」
 
我主動，我就追求你啦，一係咪搵我，一係咪叫我溝女，明明我最鐘意係你。奈何我自覺得唔夠呀Wing咁叻，亦冇辦法撼動Wing喺曼乔心目中嘅地位，我先唔表白。
 
我以為我可以透過喺其他Group約人出嚟飲飲食食就唔會成日掛住曼喬，但係有日曼喬就嚟咗我屋企，得知我租咗房間俾其他巴絲，佢一度嬲到想喊：
 
「點解要租走大房俾人呀?」其實我都諗唔明女仔諗緊乜，明明都搬走，理我咁多做乜？
 




「你都唔喺度，房間我自己住唔曬，咪租出去share租金，我呢間屋主要擺貨咋。」
 
「你唔同我商量下？間屋我都有份。」
 
「sorry lor」
 
「憎死你！」好少可見到曼喬會嬲，好多時候佢都係扮嬲，點知今鋪就嚟料，仲要走埋，我點拉住佢佢都撥開我。
 
一個月，兩個月，曼喬都冇搵我，無論我WhatsApp佢幾多次佢都唔覆我。直到有晚佢打俾我，佢話佢同呀wing散咗，佢話可否嚟我屋企住，我話OK
 
唔係呀嘛，點解會咁咖？我仲多次走去求菩薩保佑佢地白頭到老咖，點解會散咖？