「高登情緣」「港產片Feel」有一種愛叫做純愛。: 第二十章

 
有一晚呀wing又OT好夜未返，曼喬又係同我傾到凌晨未訓，開埋WhatsApps 視像，佢望住我，我望住我，就算冇對白齋聽對方聲音我都覺得好sweet，好想一直keep落去唔好收線。但係呀Wing一返，曼喬就要同我講GoodNight，而我呢個末世大毒L又係聽返啲過期錄音睇返啲過期錄音嚟滿足自己空虛的夜晚。
 
 
 
 
 
「唱一闕高登歌，多少佳節網上過，從來未愛過，鍵盤中可反映更多，真的感覺。」
 
以前細個屋企冇電腦，所以唔會上高登，去圖書館借電腦都係睇下Youtube。直到屋企有電腦，我上高登望過下，頁面毫不吸引，比起uwants同discuss真係差好多。但我俾高登post吸引住嘅係，高登仔講嘢好幽默，好Mean，好敢言，而最難可貴嘅係，高登post好少會被admin del，充分體現言論自由嘅價值。高登證明咗一件事，頁面簡陋係冇問題，只要post質素高，一樣大把人上。同樣道理，一個毒男，一無所有，但只要識搞笑同創作，一樣可以吸引到女仔。




 
 
冇嘢係天長地久，但如果高登有日熄燈，我會永遠懷念高登而唔會上其他討論區，因為冇其他論壇可以取代到咗高登。留喺高登係一種感情嘅延續，人會長大亦會蒼老，會懷念過去。唔上論壇唔會死，如果高登熄燈，我咪唔上論壇。
 
以前成日俾大耳窿搞，俾屋企人鬧，我都係透過上感情台搵巴絲開解，又會喺創意台講故台睇下巴絲創作學下嘢。高登俾我轉移到負能量，又帶俾我正能量。
 
以至於曼喬返到呀Wing身邊，我心有葡萄味，我都係上高登開post抒發自己心愛嘅女仔同佢ex一齊返嘅心情，為免曼喬上高登見到，我唯有講句真講句假，費事俾曼喬發現係我。而明知道會俾巴打寸係做兵俾高登笑有得食唔食，但我都會開post，感覺自己冇咁孤單，起碼有人應下我。
 
最後，喺巴打一片恥笑聲中log out account，訓覺，夢中才是sweet，因為經常夢見曼喬，感覺那麼近那麼遠，喺夢中發生各式各樣無厘頭嘅事情，我同佢都係笑得好開心。
 




毒係冇問題，太易動情都冇問題，問題係動情之後好耐都抽離唔到，呆在原地癡癡地想念癡癡地等待。為免自己望落去好似好慘好淒涼，於是我開始戒曼喬。為何戒曼喬？即係佢搵我我忍痛但hea覆話自己唔得閒，即係唔好再on99聽過期錄音同睇過期對話。
 
高登咁多WhatsApp Group咁多Telegram Group，我亦有涉足，而我好快成為受歡迎嘅人。換轉以前真係唔多敢出去，但係我唔想再咁淒涼成日諗住曼喬，於是我就跟巴打出去食飯唱K，踢波 打羽毛球 打兵乓球 行山……總之係出街嘅聚會，我都報名同出席。而曼喬搵我我就話唔得閒。
 
我以為我嘅怕醜會俾人邊緣化，但冇諗過出到街好多巴絲都對我好有興趣，上至食素下至處男之身，我都成日俾人圍住嚟研究。而我亦發揮我一貫搞笑嘅本色，同巴絲打成一片。
 
「安仔，你住邊個咖？」巴絲總是會問起我呢個問題。
 
「錦繡花園，租嘅。」
 




「自己住？」
 
「之前同個女仔合租，家陣得我一個租。」
 
就係咁傾下傾下，有一對情侶兩個單身絲打住咗入嚟我屋企。大房連沖涼房俾對情侶，收佢6000蚊租金，兩個細房間房租俾絲打，收佢哋各自3000租金，而我做起廳長。電費水費大家再share。
 
而我每日除咗做代購生意，同網絡買賣生意，就係參加group聚，亦由怕醜仔變成以前做倉務時候受歡迎嘅安仔。與此同時，曼喬開始成日喺Facebook同IG打文抒情，言辭當中都好似提及到我咁。我keep住追，但只閱唔回，佢WhatsApp我我都係一句起兩句止。
但其實我個心係好痛，明明對方心入面冇我，點解我心入面一定要有佢，仲要係咁刻骨銘心！我又唔係溝唔到女，點解要咁掛住一個有男朋友嘅女仔？
 
都話唔好拖手唔好攬咖啦，搞到我中曬伏動曬情。家陣都分開住，做乜成日搵我呢？如果鐘意我就唔好返去搵呀Wing，同我講呀嘛。
 
奇怪在於，我越係冷處理曼喬，曼喬就越喺Facebook發功（因為佢set咗密友關係，佢打嘅嘢都係俾我一個人睇到，之前佢同我講過。）同呀wing一齊，點解成日搵我？乜曼喬唔知道男同女其實好難做到朋友，嗰男仔通常會鐘意嗰女仔！點解要成日俾假希望我？