「高登情緣」「港產片Feel」有一種愛叫做純愛。: 第十二章

 
飲完茶我帶曼喬去買個包囊，然後就會合大家開工，呢一日行水貨嘅人比較少，所以單拖行一定好揚眼，扮情侶傾計就真係最好。返到香港關，我教曼喬入IPHONE落袋，如何塞得靚啲唔好俾海關發覺入面好多貨咁，教曼喬唔需要驚，表情自然啲就OK。無論係香港海關去福田海關定福田海關往返香港海關，都需要行一條幾長嘅直路，於是我同曼喬好自然地就傾下港產片。
 
「不如你開個Facebook Page寫影評介紹舊嘅港產片。」曼喬提議。
 
「但我寫嘅影評好難出街，咁曳！」
 
「唔會呀，幾有你個人風格。」
 
「其實我一直想做嘅係，將啲精華片段擺上網，香港地追求即食文化，叫佢啲追曬成套冷門嘅電影，影評寫得再好佢哋都未必會睇，反而我cut 啲片，將有趣嘅精華片段擺上網，引起大家關注，佢哋睇完覺得好咁可能都會去搵全片睇，如果我開page我就會咁做，當然，香港港產片咁出色，如果我有能力一定重新配音同加上各國字幕，推廣出去，等外國人都見識我哋港產片有幾咁出色。」




 
「好呀，咁你開page啦。」
 
「遲啲先啦，我咁大嗰仔，都未買過電腦。遲啲買部Notebook先。」
 
「今日我哋出糧買啦，我都要用Notebook咖嘛。」
 
「好。」
 
「你琴晚冇大嗌呀」




 
「係？可能嗌咗你唔知啫。」
 
當然就係咁傾住計行IPHONE，下午一點前已經行咗三轉。第四轉人流好少，我同曼喬行到去最後個個位，望到人流好少，真係有少少驚，於是我哋繼續行，開始見到前面有白衫海關職員，呢個時候唔過唔得，更加唔可以驚，於是我哋繼續扮輕鬆傾港產片，左右白衫佬望住曬。呢個時候，KK握住我嘅手，身體微微傾斜地挨住我膊頭，我今次冇再呆啦，極快捉住佢嘅手。順利過關。我心跳加速，面都應該紅埋。
 
今次冇上次拖阿嬸咁hard feeling，雖然都有啲唔自在，但曼喬嘅笑容撫平我浮躁嘅心，我冇咁抗拒。
 
「Sorry。」我為頭先捉住佢嘅手
 
「哈哈，我講sorry先真，冇同你講定就拖你手。」




 
「頭先好險呀，人流咁少，白衫佬咁多。」
 
「點嘛，係咪第一次拖女仔嘅手呀？」曼喬笑住問。
 
「唔係。」
 
「但你面紅wor，係咪Hot得濟呀？」
 
「我諗係感冒掛，有少少發熱。」
 
曼喬輕輕咁拍我膊頭，我諗佢肯定唔信啦，好似笑緊我連拖手都表現得初哥咁款。
 
我哋呢日行咗七轉，收工收到2100蚊，由於錢比較厚我叫曼喬幫我袋住先，而放工後，我同曼喬都喺福田，搭正八點，眼前見到有間茶餐廳門口嘅餐牌，曼喬興奮地咁拉住我入去。
 




「我呀食黑椒雞扒飯呀！」曼喬成個細路女咁，完全睇唔出係一個20幾歲嘅大姑娘。乜澳洲冇茶餐廳咖？見到黑椒雞扒飯都可以興奮到咁，啲澳洲妹真係得意。
 
「咁我要碟苦瓜炒蛋飯。」
 
「咁今晚我地返香港？」
 
「福田我同人合租咗間屋，有三個房間，佢地通常鎖門唔返嚟訓，我個間擺埋貨物，得一張床，其實你唔介意咪訓床我訓廳，咁聽朝就唔使等巴士，可以訓耐啲！」
 
「咁你會陪我咖嘛，邊度都一樣啦，就住福田間屋啦。」
 
女仔鐘意食碟頭飯，仲要食得咁滋味，真係少有，我碟苦瓜飯俾大陸廚房佬炮製到成碟藝術品咁，我第一次見苦瓜炒蛋可以整到好似蛋包飯咁，食落又真係幾好味道，苦瓜又唔苦。
 
食完飯，我就同曼喬去買睡衣買換嘅底衫褲，然後就上返個層樓。各自沖完涼，我拎咗個枕頭出廳訓，雖然個廳冇sofa只有一個長凳，但冇所謂啦一晚訓住先。曼喬就漏我傾計，又話呢度好黑，卒之我就入咗間房同佢坐喺床度傾計。
 
「你未答我，點解要我幫你袋住錢？你唔係有銀包咩？」




 
「唔夠大呀，而且我銀包主要都係用黎裝信，唔係裝錢。」
 
「不如你訓落床，我地慢慢傾啦？」
 
「男女點訓一張床呀？」
 
「我地拎兩個枕頭隔住係中間咁咪得lor，唔想坐呀，想訓喺度傾。」
 
「ok」於是我哋用兩個枕頭架喺床嘅中間，佢訓挨墻嘅入邊，我訓出面。
 
「點解要袋啲信落銀包嘅？」曼喬問。
 
「咪林小姐寫俾我嘅信，我一得閒就會睇返，每逢過年過節就拎啲信出嚟睇下懷緬下。雖然唔知佢咩樣冇佢嘅相，但有信已經係一件好好嘅紀念物。」
 




「我同阿wing都有寫下信，不過就應該冇你哋咁熱衷啦。」
 
「其實好多嘢傾電話都有得傾啦，點解要寫信？因為愛lor，點解寫咗咁多仲繼續寫？因為仲愛lor。特登走去買郵票買信紙埋信封，每一次諗寫乜嘢，再諗下順便寄乜俾對方，我試過寄包茶葉去林小姐屋企，點知佢就鬧我飛起，然後寄返一張面油紙俾我抹面。」
 
 
我冇留意到，我講講下，訓著咗。眼睛打開嘅時候已經係半夜，本來我應該驚，但枕頭對面傳來呼吸聲，我比較安定，唔需要開燈訓。幫幫手，今晚我唔好大叫，費事嘈醒曼喬。