「高登情緣」「港產片Feel」有一種愛叫做純愛。: 第九章

夜晚九點返到第二朝早上五點，都係400蚊左右一日，食個貴價宵夜飯盒都冇咗50蚊，所以我從來唔會喺公司叫飯盒食。咁啱幾個南亞仔又拎啲餅乾我食，仲有個唔多熟嘅扎馬尾南亞仔送咗包營多撈麵我，我拿拿臨整嚟食。食完訓陣再開工。
 
收工後，我衝去更衣室，果然又收到KK嘅WhatsApp，真係猶如心靈雞湯：
 
「Yo早晨，安仔！」
 
對於我呢啲落魄人，收到一個女仔WhatsApp，我感恩，上天冇遺忘我，當我頻臨絕境時都起碼開盞燈照下我，等我覺得好似有啲精神寄託。傾完一陣，佢忽然同我一個問題。
 
「如果我返香港搵你，你會唔會幫我？」KK問
 




「點幫？」
 
「冇呀，借間房嚟訓下」
 
「你真係返嚟香港搵你ex？咁勇？」
 
「Maybe！」
 
「到時先算啦。我唔得閒同你傾住呀，我訓陣先。」
 




踏上開往落馬洲嘅巴士，疲困不堪嘅我終於把握機會訓餐安樂。一諗起以後返工要落馬洲返青衣，遠到咁，真係不如搵過份工，仲要每日訓咁少時間，真係Crazy。到落馬洲火車站，見到輝哥居然仲早過我。
 
「輝哥，唔好意思麻煩到你。」
 
「唔好講呢啲啦，嚟，一齊返我屋企。」
 
「有冇啲工即日出糧，近落馬洲？」
 
「跟我走IPHONE ，一轉300蚊，一日5-7轉」
 




「唔會俾人捉？」
 
「每年每人都有兩次機會，捉都扣貨only，而貨主會負責返，唔需要我哋賠錢。」
 
嘩，走IPHONE咁好搵咖……雖然算偏門，但都唔係傷天害理呀，年年都咁多人炒iPhone，都要搵人拎返去大陸咖嘛。有個朋友做財仔，有個朋友做倫敦金……我諗都唔駛諗，走IPHONE啦，我可以搵少啲，但我唔想害人。我要一份即日出糧嘅工，只要我負荷得到，只要唔係害人，我都肯去做。
 
「輝哥，我跟你搵食呀，我等錢駛。」
 
「好呀，我正等人用，陣間飲茶再傾。」
 
上到輝哥個竇，原來都係普通三房一廳格局，四周圍擺滿雜貨同行李箱，而輝哥就住其中一個房間，一張床以外其他位置都俾貨物佔據。擺低行李後，就同咗輝哥去飲茶。呢個時候，輝哥開始同我講走IPHONE嘅嘢。
 
「每朝等通知，然後過返落馬洲火車站拎貨，你拎個背囊咁就塞IPHONE落去，然後過關，再拎俾貨主，就係咁簡單。總之見到海關職員唔需要騰雞，扮到自己好似旅客就ok。」輝哥講。
 
「應該ok嘅。」




 
「陣間得閒就同我行一齊行一轉，我喺後面跟住你，教你。」
 
「有乜野要注意？」
 
「簡單講，香港嗰關啲職員唔會逗你，然後行到大陸關，佢先有一班著藍衫嘅兵仔，你都唔需要理佢哋，到自助插回鄉卡過關個度，一出就會見到好多人排隊過機，你都唔需要理，唔需要過機，之後就有兩排白衫職員，你淡定咁過就冇問題。」
 
「萬一俾人捉點算？」
 
「你只需要堅持話係自己用，就得，之後佢會叫你簽名，第二日你就等通知，之後再交罰款就ok。罰款係老細俾你去叫，你唔需要拎錢出嚟。不過都係句，再叻嘅人都會俾人捉，再蠢嘅人都會成功走到貨，好多嘢都係睇運水咋，只能夠講你做得好啲，俾人周到嘅機會就細啲。」
 
「OK，到時你再教我。」
 
真係冇諗過我嘅第一次會獻俾咗某個阿嬸。一直以嚟我都係規規矩矩做人，冇行差踏錯，更加唔會走去抽人水。我出街唔會及女咖，除非條女擋住我視線我先會被逼望到。我同某啲女仔好friend都唔會掂佢手啦，我冇拍過拖，我更加珍惜第一次。
 




行IPHONE咪行IPHONE，根本都唔需要用腦思考，裝IPHONE落袋，然後行，咁簡單小學生都識。本來都係一個人行，行第三轉個陣，輝哥話海關開始多職員，所以叫我哋一男一女咁扮情侶一pair pair行。
 
老實講，我肥毒柒，望落係同實際年齡有差距，但我點睇都唔似同個40幾歲嘅阿嬸拍拖啦，家陣玩姊弟戀咁激？我望落去點都係世紀大處男啦，點會重口味到溝阿婆呀？oh sorry係阿嬸。呢個劇本唔work呀嘛，演員配搭錯曬呀，伏戲嚟！
 
我望住其他pair都係老牛食嫩草，阿嬸搭0靚仔，條氣先gur返啲。OK扮情侶咪扮情侶，大家傾下計，點知臨見到第一卡職員，嗰阿嬸就主動拖我隻手，我呆咗，我手掌攤開，佢都可以夾硬捉實我手掌。我已經唔想去計較佢皮膚有幾咁粗糙，我係覺得好委屈，第一次俾咗個阿嬸。我同林佳君都冇拖過手！早知第一次咁易冇，上次去佢屋企就應該隔住佢屋企嘅大閘伸手入去拖下佢手仔！我條氣家陣好唔gur！
 
如果唔係海關職員望住，我即刻鬧個阿嬸啦，扮情侶已經唔對路，仲拖我手，拖手拖手，冇感情可以亂咁拖咖咩？交戲wor。你叫個編劇出嚟俾我省佢幾腳呀，咁垃圾嘅劇本都寫得出嘅？
 
唉，卒之順利過咗關，我即刻fing開佢嘅手九尺四，怒不可遏！
 
「做乜拖我隻手？」
 
「咁扮情侶係要拖下手。」
 
「咁不如打茄輪啦，仲拖乜鬼手啫。咀住過關啦，海關一定信啦。」




 
「你駛唔駛咁大反應呀？」
 
我強忍委屈，可能真係毒得太多，太care拖手仔呢樣嘢，俾個陌生嘅女人拖下，感覺好難受。
 
但我見到跟後嘅輝哥拖住第二個阿嬸出嚟，我佩服佢嘅演技。係呀，走水貨都係要交戲，要交戲即係演員，我哋做演員嘅要專業啲！
 
「安仔，掂唔掂？行咗三轉。」輝哥問
 
「ok嘅，不過下次我自己行，唔好拍拖咁行，我周身唔聚財咁……我自己行仲淡定」
 
「安仔，拍拖咁行係好穩陣，試過好多次咖啦，因為海關職員開始多個陣，佢地主要拍啲重貨推行李嘅人，同單支人士，情侶大部分唔拍咖。所以當我哋收到水，把關嘅職員五六七八個，我哋就安排一pair pair咁行。」
 
「哦！」
 




果然出糧係有一種魔力，令我條氣順返好多。一部IPHONE 30蚊，走一轉10部袋300蚊，當日走咗5轉，出糧1500蚊。全日都係企同走多，冇乜咁辛苦，倉務雖然開心但都算辛苦，手同腰骨都好酸痛。得知咁易搵錢，我即刻辭去倉務份工，無論上司如何挽留我，我都冇俾人情牌打動。此時此刻我要錢，我要生活落去！
 
返到輝哥個竇，其餘兩間房嘅住戶都好似冇返嚟，而我上咗一陣高登，然後校定鬧鐘就訓
 
撫心自問，錢令我有安全感，但走IPHONE我並不開心，因為林佳君最憎大陸人同水貨客，而我竟然就做咗水貨客……如果唔係福田住所距離青衣太遠，如果唔係我等錢駛，我真係唔會做。