「高登情緣」「港產片Feel」有一種愛叫做純愛。: 第十章

呢個夜晚訓得好冧，好舒服。一早起身即刻睇WhatsApp，KK冇搵我，反而收到輝哥WhatsApp話飲茶。落到茶樓房，輝哥同一班同事打緊牌，我見到檯上幾籠蝦餃燒賣牛肉，sorry我係一個素食者，肉真係唔啱我，於是我叫咗一碟菜心同齋腸，心諗，咦，KK今日放假？唔搵我嘅？
 
冇諗到正當我哋要出發開工嘅時候，KK WhatsApp我。
 
「安仔，我喺香港機場，你可唔可以嚟接我？」
 
「咪玩啦。」
 
「真咖！」KK send咗張自拍嚟，背景果然係喺香港機場。
 




浸過鹹水嘅女仔真係好大膽！我唔係講佢突然返香港，而係點解會搵我接佢，大家識咗兩個禮拜未到……但佢點解唔搵佢喺香港嘅屋企人，搵我？
 
「咁我嚟接你。」短短幾個字，咪以為我老定，其實我都幾淆，以前咁鐘意林佳君都唔敢見，係咪因為我年紀大咗大膽咗？唔知呀。於是我即刻同輝哥講有事走先，輝哥梗係唔肯放啦，講好今日幾多人就幾多人，佢要同老細交待，但係我都係堅持要走，不停沙冧，之後我就過關返香港。
 
其實我對香港唔熟悉咖……絕大部分地方我都冇去過……機場點去我都係一邊搭車一邊Google。最後摸摸索索地到咗機場，點知WhatsApp KK冇人覆，於是我開始四周圍搵，咁我本身視力都唔好，唯有謎起眼好專注咁望每一個喺機場嘅旅客。到底個KK喺邊度？
 
我add過KK嘅Facebook，我Facebook有我自拍嘅佢一定認得我啦，我成個古惑仔巴閉哥咁嘅髮型，KK應該話我聽喺邊個位置呀嘛。
 
WhatsApp佢冇人覆，Facebook佢冇人覆，WeChat佢冇人覆……等唔切走咗？而我傻甘甘即係兜圈圈搵，有啲人坐喺凳度訓著，有啲人企喺度等人，有啲人拎住行李準備check in。
 




搵咗兩個鐘，我坐喺凳上歎氣。唔會係高登釣狗公嘅遊戲掛？我俾人偷拍擺上高登：發情狗公機場狂奔，難尋到口嘅獵物？
 
我餘光望到身前有個女仔慢慢靠近我，我抬頭一望，嗰女仔望住我笑，眼前呢個應該係KK。毒男性格嘅我，見到女仔係會莫名其妙緊張，之後要係靚嘅女仔，眼神對咗冇兩秒，我眼神開始縮。
 
「Hi。」
 
「做乜唔覆WhatsApp？」
 
「呵呵，我一早見到你，我拎住行李跑，同你玩捉伊因。」
 




「點解咁做？」
 
「冇呀，覺得你好得意。不放棄地搵搵搵，氣喘咁搵。」
 
「仲以為你會偷影我，擺我上高登，冠以高登首席狗公之名。」
 
「唔會啦，你咁得意，又咁熟港產片，講嘢又風趣幽默，呵呵。」KK笑起上嚟嘅聲音，真係繞樑三日，好薛凱琪。
 
「返香港唔搵你屋企人接機？搵我？」
 
「我屋企人唔知我同BF分咗手，我費事俾佢哋知又煩住我，我屋企人好鐘意我BF咖，我媽咪鐘意到直頭想佢自己都嫁埋俾我BF。」
 
「因為有家底？」
 
「係掛，好現實。」




 
「咁你返嚟香港有咩打算？」
 
「你做乜唔望住我講嘢嘅？」KK特登捕捉我眼神，我明明低頭，佢就踎低，雙手撐住面豬登，笑住望住我。
 
「咁你返嚟搵你EX？」
 
「唔係宜家，減肥先，減完肥啦搵佢。係呢，家陣可唔可以陪我去長洲？」下，佢都叫肥，咁我係咩？癡肥？
 
「OK嘅，最好你帶路。」
 
「你冇去過？」
 
「我好少出街，對香港好多地方都唔係咁熟。」
 




「你真係好得意。」
 
得意？即係咩？係咪話我低能？定我毒得太出色，引人發笑？唔緊要啦，我對呢類評語都冇乜感覺。
 
我幫手拖住KK嘅行李箱，然後喺佢嘅帶路下，我哋搭船到咗長洲，KK揀咗個茶餐廳坐低，我望住張餐單，都唔知有乜野可以食……好多都係肉，我食素的
 
「要舊多士+凍奶茶，唔該。
 
「我要豆腐火腩飯，可樂，唔該。」
 
嘩，女仔鐘意食豆腐火腩飯。
 
座位就係面對面咁坐，KK好似發現外星人咁觀察我，面露甜笑，雙手托著下巴，佢應該打量緊我上半身所有部位，而我一如既往，都係望住佢膊頭。
 
「做乜唔出聲？」KK問。




 
「呢度人多，唔敢出聲。」我細細聲講。
 
「乜你咁細膽咖，哈哈，好搞笑。」
 
「怕人……唔講咁多啦，食完拿拿臨撇啦。」
 
到埋單個陣，我忽然鼓起勇氣，拎起張單走去收銀俾錢。踏出茶餐廳門口，KK忽然搭我膊頭，我嚇到唔敢彈開，心跳加速
 
「做乜搶埋單呀？」KK蠱惑地問
 
「費事你擺我上高登，唱我孤寒啦。」