「高登情緣」「港產片Feel」有一種愛叫做純愛。: 第八章

澳洲快香港三粒鐘，KK返工嘅日子都會搵我傾計，每日下午三點（澳洲時間六點）係佢嘅放工時間，而我開始覺都唔捨得訓自每日同佢傾WhatsApp傾到下晝三點傾到佢放工，從打字到錄音，再到WhatsApp語音通話，有時候仲會同步睇同一部電影，一齊傾戲內嘅點點滴滴。
 
第一部係「胭脂扣」，一齊唱 「誓言幻作煙雲字……」
第二部係「天若有情」，一齊唱「……只求望一望　讓愛火永遠的高燒…」
 
冇第三部啦，因為大耳窿已經滋擾到我唔可以唔搬，爹地申請嘅公屋未批，家陣要諗搵屋搬，去邊度租呀？我上網搵親都五六千蚊，我邊度有呀？我銀行最後五位數字幾乎過曬俾我爹地應急，我靠倉務每日返OT即出嘅糧頂住，我銀行得返2000蚊咋，而且未出大糧，我銀包都係得返幾舊水。情急之下，我諗起我一個朋友，之前聽佢講過福田口岸有啲房2000蚊租一個月咋，不過就要同水貨客一齊住，一人一間房。租迷你倉都差唔多呢條數啦，有得諗嘅去福田住，好近落馬洲，雖然落馬洲再去青衣嘅，係時間耐少少啫。
 
「喂，輝哥！我想租間水貨客住嘅個啲屋，2000蚊係咪包曬？」
 
「安仔，你要租呀？」




 
「係呀，最快聽日有冇得入住？江湖救急幫幫手。」
 
「我有租開呀，不過拎嚟擺貨only，你要訓覺你咪去訓。」
 
「有冇WiFi個啲？我諗住搬電腦去，同隨身物品等等。」
 
「咁你住咗先，我再幫你搵間屋，我個度擺得電腦就訓唔到咖啦。」
 
「咁唔需要搵啦，我就拎嚟擺嘢啫，我今晚返工先，聽日早上搵你唔該。」




 
馬死落地行，唯有日日訓公司更衣室，放假先返去坐下，咁就唔徐需要租多一間屋。冇床位訓唔緊要，最緊要有WiFi，有WiFi先可以收到嘅whatsapp呀。同KK傾港產片已經每日必備嘅節目，為我動蕩嘅日子帶嚟少少歡樂，KK放假都會特登抽出時間同我傾下港產片。，
 
如意算盘梗係全家着草，點知執曬一個小行李出門，就俾後樓梯衝出嚟嘅收數佬擋住去路。坦白講，我心入面係淆底，不過我唔可以表露出嚟，林佳君教落，要扮堅強呀。
 
「屌你老母，你老豆去咗邊撚度呀？」收數佬兇神惡煞，好似想食咗我咁。
 
「我都話佢唔係我親生老豆，我係孤兒仔嚟，佢借咗錢之後就冇再返屋企啦，我點知佢去咗邊呀？佢電話都冇打過嚟，根本佢都唔理我啦。」
 
「你咪撚扮野啦，你老豆借錢填form個陣聯絡人填你號碼wor。」




 
「咁咪靠害lor，佢著草搵我嚟頂。」
 
「家陣你都拎住行李走，點呀，唔撚使還呀？」
 
「咁你地日日嚟拍門，大佬我夜晚要返工咖！」
 
班收數佬可能都冇曬我符，又唔chok唔到料，我咪擺脫佢地加快腳步走人。奈何扮堅強，背對住佢哋都感受到佢哋嘅惡，我好驚，點知佢哋都即刻跟住我，似乎諗住我會搵我老豆咁。
 
假意放慢腳步，然後突然棄lift走樓梯，一跑就嘗試拎返學界時期嘅實力，等班收數佬食塵啦。由於我住3樓好快就到樓下，頭也不後望地一支箭向前跑呀跑呀，終於擺脫咗班收數佬。
 
我孭住個背囊拎住個袋，加上啱啱俾收數佬追嘅驚魂未定，落魄同狼狽嘅模樣似乎惹起路人嘅注目，我唯有加快腳步行去巴士站……等啦，費事俾收數佬搵到，於是揮手招咗架的士，叫佢車我遠幾個巴士站。
 
輾轉返到公司，不嬲都係公司風頭躉嘅我，瞬間俾同事捉住問長問短。
 




「技安BB，因乜事一抽二楞？」
 
「係lor你去旅行呀？」
 
「係咪打算以後訓喺公司呀？」
 
係呀唔通著草話俾大家聽咩，我從來唔對外人愁眉苦面，心情再差都可以瞬間變返娛樂大眾嘅小丑。
 
「真係孝感動天，中咗六合彩頭獎，準備搬入貝沙灣豪宅，咪諗住聽朝拎梗啲嘢去新屋。得閒嚟我屋企參觀下各位，唉銀紙多得濟唔知點使呀救命！」
 
唔得閒同佢哋吹水，走入更衣室擺行李上locker頂。忽然諗起唔知個KK訓咗未，望下手機，冇佢嘅WhatsApp。
 
「靈感IQ稱得上十分之高超……」我打開林小姐嘅錄音嚟聽，每每都會會心一笑，而睇返同KK嘅WhatsApp對話，好似搵到嗰種快樂。
 
一如既往返工都係同同事吹水，吹水有個好處就係可以暫且將煩惱擺低，盡情投入笑聲當中。