[真人真事][校園][純愛]《最陌生的人，就是曾經最熟悉的人》: 第七十三章

既然依家呀琳已經有男朋友
咁我就盡量少啲喺facebook去搵佢
唔怕老實講,
如果佢冇拍拖的話,
我係有考慮過搵Candice幫手
當年我講過,
如果返到嚟香港
仲係鍾意呀琳的話
我會同佢解釋所有野
當然仲要搵埋人證啦




亦即係Candice
我諗呀琳應該會信Candice
就算佢到時聽完之後,
話已經對我冇感覺,
我都冇所謂
我淨係想將所有野解釋俾佢聽
我好想同佢講,
當年你唔係單戀
當年我只係講大話
所有所有嘅當年,




我都好想同佢講
不過依家呀琳已經有男朋友,
呢啲野就變得冇意義啦
都係唔好打擾佢喇
所以我都盡量少搵佢,
驚我自己會忍唔住同佢講晒所有野
當然啦,
生日快樂嗰啲一定會講
又或者可能見到佢ig有啲乜野特別
就會私底下inbox佢




問下佢究竟咩事
當然,
我嘅關心,
對佢嚟講可能個份量唔係好重
不過我覺得有啲乜嘢唔開心的話,
搵人傾下點都好啲
同埋依家ig咁流行,
其實我透過佢喺ig出post,
已經可以了解佢嘅近況
當然啦,
我都只係用Angela個身份
喺樂仔嘅ig,
當佢撳入去呀琳個ig嘅時候,
係睇唔到任何野
同時間,




喺樂仔ig個follower入面,
亦都搵唔到呀琳嘅存在
好彩我冇失憶,
如果唔係,
我真係唔會知道呀琳曾經同我咁接近
喺網上真係完全搵唔到證據架.

話說有一晚,
我自己一個喺度睇緊ig
當我睇完我用嚟社交嗰個嘅ig,
就開Angela個ig
基本上晚晚都係咁,
一登入之後,
碌落去就見到呀琳post左一條片
片入面,




係佢嘅背影
一個我曾經好熟悉,又好鍾意,
但係依家已經好耐冇見過嘅背影
咁段片梗係唔係淨係影住呀琳個背影啦
如果係咁嘅話,
咁就係一張相
而唔係一段片啦
之後我睇佢段片個題目
寫住
「很久沒有彈的一首歌,
一首我中學時期最喜歡的歌,
今天忽然很想再彈一次.」
類似係咁啦
正當我諗緊,
會唔會係我諗緊嘅嗰首歌嗰陣




我撳入去睇條片嗰陣,
真係我諗嘅嗰首歌
事隔七,八年,
我終於可以再聽一次佢唱歌
好耐冇聽過佢嘅歌聲啦
同以前一樣,
都係咁好聽
喺我心目中,
我覺得佢仲唱得好聽過藍又時
依家再開住歌詞聽多次,
原來啲歌詞係咁到肉
我明喇
終於明喇
我知點解你當初會話我蠢
原來咁簡單嘅字我都可以唔明,




你唱呢首歌,
其實就等於表白咁滯
但我當時竟然仲可以懵然不知
當時我返到去自己睇嗰陣都仲唔明首歌講乜,
好多年之後嘅今日聽番,
我終於明白首歌係講乜
段片入面嘅呀琳,
淨係唱左一段副歌
每一次佢唱完「一直愛著你 用我自己的方式」之後,
我就會撳返去
由「愛你是孤單的心事 不懂你微笑的意思」嗰度重新開始聽,
一直係咁loop
眼淚就係咁流
其實我唔係好鍾意喺電腦枱嗰度喊,
由細細個到大個都係
我要喊的話,
淨係會喺臨瞓前上床喊
但今日真係忍唔住
一方面我好開心,
因為可以再聽一次佢唱歌
我原本以為冇機會架喇
但係啲歌詞真係好催淚
「一直愛著你 用我自己的方式」,
呢句野就係我嘅心聲.