[真人真事][校園][純愛]《最陌生的人，就是曾經最熟悉的人》: 第七十二章
跟住落嚟都冇乜特別好講
都係同之前差唔多
喺面書同呀琳傾計
喺msn同Candice吹水,
間唔中會問下呀琳依家點
問佢讀大學辛唔辛苦呀嗰啲
當然啦,
多數都係我問佢
佢好少問我
又或者我唔係成日俾佢問
好快轉話題
咁梗係啦,
我都冇喺香港讀大學
我點知香港大學嗰啲結構
費事陣間講多錯多啦
同埋有一樣野,
我係一定會做
就係同呀琳講生日快樂
其實呢啲野係好表面,
只係一件好小嘅事
但係你知啦,
毒勁就係最注重呢啲唔等使嘅野
每一年嘅十月十四號早上十點
我就開電腦,
登入Angela個面書
click入佢個面書戶口,
打定句「生日快樂.」
準備定十月十四號嘅十時十四分就同佢講
我知你地都問我,
咁你喺外國點算呀
如果我喺外國就會計定時差
總之我要搭正香港嘅十時十四分講
有幾次喺外國返學遲到就係咁樣
為左喺香港嘅十時十四分講生日快樂,
咁依家返到嚟香港就好易啫
唔需要計時差,
用手機登入面書講就得
年年我都有做
去到依家都係
呀琳亦都好細心
有一次都讚我好有心思
專登夾啱時間,
得到佢嘅稱讚就已經得
我好耐好耐冇聽過佢讚我啦
又令我諗返起中四嗰陣啲野
明明唔應該諗返起以前
做人始終要向前望,
但我始終仲係留戀以前嘅事
同埋人,
當然啦,
佢唔知道其實係我講
冇所謂啦,
有啲野佢唔知好過知
時間線去到2013年
我亦都由一個學生哥變左一個文員仔
喺一間規模唔算好大嘅公司做
可能佢地見我係外國返嚟,
所以就好快請左我
其實喺外國讀書咪又係hea住讀
好聽啲叫浸過鹹水
其實差唔多,
冇乜大分別
咁樣返到嚟香港,
始終都係細細個就喺度
所以好快就適應返環境同埋氣候
比起我當年適應外國嗰陣快好多,
返到嚟香港,
原來我已經去左外國五年
時間過得真係好快
諗返起六年前嘅夏天,
呀琳崩潰嗰個樣
好似唔係過左好耐
講起呀琳,
其實近幾年都唔係成日搵佢傾計
都係間唔中傾下,
講下佢嗰啲大學生活等等
至於佢有冇拍拖,
我就冇問到
唔知點解呢樣真係問唔出口
我一直都好想問,
但每次打完句野之後,
我先發覺,
我之前係講錯左
原來我都係好介意,
聽到一啲我唔想聽嘅答案
我冇自己想像中咁胸襟廣闊.
話說喺2013年嘅十二月,
有一晚Candice約左我食飯
我:「你男朋友會唔會介意架
無啦啦單獨約我食飯
」Candice:「我同佢講左喇
我話我同你係青梅竹馬
大家嘅媽媽仲好frd,
佢好放心咁樣俾我去
仲講笑話,
如果係有野,
就一早有啦
使乜等到依家
」我:「咁樣你男朋友都對你幾有信心
」Candice:「係架,
唔好我都唔揀啦
」我:「仲記唔記得你當初鍾意呀狗呀
」Candice:「記得
以前我真係好白痴,
咁細膽
」我地就係咁樣
每次食飯出嚟,
都係講以前嘅野
唔係講笑,
次次都講到好開心
好多內容,
中學生涯真係最好
喺我眼中呀
我:「咁你依家仲有冇見呀狗
」Candice:「冇啦
上到大學就冇聯絡
唔知佢依家點呢
」我:「你唔係對人餘情未了呀
」Candice:「梗係唔係啦
係想睇下佢而家點啫,
咁你係咪對人餘情未了丫
」我:「少少啦
」我地好有默契,
大家都知講緊邊個
我:「佢依家點呀
」Candice:「我今次約你出嚟就係想同你傾下佢啲野
」我:「有咩事呀
」Candice:「件事你可能唔想知喎,
咁你仲想唔想聽
」我:「講嚟聽下
」Candice:「佢拍左拖喇.」
我聽到呢句,
個心係沉一沉
但我唔可以喺Candice面前表露我最真實嘅情緒
所以我要扮冇野
我:「佢男朋友咩人嚟架
」Candice:「呀琳去到大學之後,
有part time上門教琴
當然學生數量唔係好多,
但都夠搵食
佢依家個男朋友,
係其中一個學生嘅堂大佬
呀琳有一次上門教嗰個學生,
咁啱佢男朋友嗰一排係喺佢個學生嗰度住
好似話係個男仔追佢
跟住就一齊喇
」我:「咁都好丫
」Candice:「你有冇野呀
」我:「冇呀
聽到呢個消息都開心
一個女仔有個男仔喺身邊都係好事
」我一定要呃自己,
我係開心
好開心,
咁樣我先可以忍住眼淚
我:「咁個男仔好唔好先
」Candice:「好呀
我同佢地出嚟食過飯,
佢好細心
對呀琳無微不至,
同埋睇得出真係好鍾意呀琳
唔係嗰啲花花公子
」我:「咁咪好囉
」夜晚返到去,
我即刻開返ig用戶
2013年,
係ig喺香港興起嘅時間
逐漸取代面書,
我喺度睇呀琳個面書,
都唔多相
唔知佢會唔會喺ig post呢
按照慣例,
我都係開兩個用戶
一個就係我社交用,
另一個就係我用嚟睇呀琳嘅近況
好彩近幾年返大陸,
喺我堂家姐嗰部電腦度搵到唔少「材料」
等我可以好似啲港女咁樣
間唔中可以擺張相
唔使驚唔夠相用
我拿拿臨開戶口,
之後就搵呀琳個英文全名
點知搵唔到
呢個時候我都嚇左一嚇
唔會搵唔到掛
我又唔想透過Candice拎佢ig
個感覺都係麻麻地
好似唔知點咁樣
試下搵佢英文名,
終於搵到
真係皇天不負有心人
搵左我半個幾鐘
跟住我再望一望我個用戶,
的確係Angelawong1234
咁就得啦
至於點解後面係1234
其實唔係佢推薦,
你知啦
香港大把人叫Angela Wong,
如果你打Angela Wong做用戶名嗰陣,
佢通常都會話已有人使用名稱
跟住哎你喺後面加啲野
多數都係數字,
不過我今次個1234,
係特登咁打
唔係貪方便
而係有一個好白痴嘅原因
我就係二月二十號生日,
即係220
呀琳就係十月十四號生日,
即係1014
你試下將兩個數字相加,
就知道點解我後面會打1234
當然,
好多人都唔知我呢個真正原因
不過算啦
我自己明咪得囉
跟住我見到呀琳係private
我就二話不說follow佢
等佢批准,
順便整好我個頭像
等佢知道我就係同佢喺面書傾計嘅Angela Wong
果然,
佢好快就accept左我
仲follow埋我,
我一撳入去,
見到佢有幾十張相
有啲係風景照
有啲係自拍,
見到佢個樣
同我腦海中嘅呀琳都唔係爭好遠
當然係更加靚啦
頭髮同以前一樣係淡啡(佢頭髮天生係淡啡)
皮膚仲係好似以前咁白,
笑容亦都同以前一樣
仲係咁令人傾心
唯一唔同嘅係,
就係佢身邊,
多左一個人
呢個人會陪佢食甜品
因為有一張相,
係講佢兩個食甜品
呢個角色,
以前係我做,
幾年之後換左人
嗰幅相仲要顯示佢係食楊枝甘露,
亦即係我當年話下次食嗰碗
原來佢已經有人陪佢食
唔似得我咁戇居
仲未食到楊枝甘露,
個男仔望落去都幾好嘅
樣唔差,
就算我唔識睇花唔花弗
我信Candice咪得
佢覺得呢個男朋友好
咁應該都冇死錯人
我唔信佢呢個好姊妹,
唔通信我呢個陌生人嘅眼咩
夜晚瞓到落床,
終於可以唔使控制情緒
其實我知架,
呀琳咁靚女,
性格又好
有乜可能會冇男朋友
呢啲野我一早知
所以就一早打好心理準備,
只係我估唔到
原來當真係發生嗰陣,
所謂嘅心理準備係冇用
都係會唔開心
我喺度鬧自己,
其實你唔開心做乜啫
都唔關你事,
你又唔係佢邊個
憑乜野唔開心,
況且,
佢搵到一個好男仔
唔係應該更加戥佢高興咩
我講就識講,
成日話佢開心就得
好似好大方咁樣,
但原來唔係,
當我見到佢拍拖嗰陣
原來我都係好自私咁樣喊
我真係做唔到所謂嘅佢開心我就開心,
我好羨慕佢男朋友,
因為可以欣賞到世界上最靚嘅微笑
都唔知要有幾多福氣先至收到
或者,
我以前曾經有呢個福氣,
只係自己放手唔要
我記得嗰晚,
係我近幾年嚟,
枕頭最濕嘅一晚.