[真人真事][校園][純愛]《最陌生的人，就是曾經最熟悉的人》: 第六十三章

中學生涯完左,
代表我就嚟要離開香港
老實講,
今次我離開香港
代價真係好大
因為佢,
令到我冇左同我最鍾意嘅人一齊嘅時間
唔係話我搵野賴
如果當初我冇去外國呢個打算,
當呀琳搵我表白嗰陣




我一定say yes
不過算啦
都過左成半年,
就由佢啦
反正時間唔可以返轉頭
我當初咁樣做,
就已經預左架啦
不過講真,
我真係唔知去到外國適唔適應到
咁大個仔,




第一次去第二個國家生活喎
仲要係幾年
唔係幾日
好彩有姑姐睇住啫
如果唔係都唔知點算,
唉
馬死落地行,
焗住頂硬上啦
不過令我最擔心嘅唔係呢樣
而係一如我半年前所講,




我最放唔低嘅係呀琳
當然你會話,
你喺香港咪又係得個望字
都唔會做其他野架啦
你講得好啱,
我的確只係會咁樣做
但係唔知有冇人同你講過,
當你見到你鍾意嘅人,
就已經可以好開心
唔需要話有啲乜野特別野
你見到佢就已經好足夠
我喺香港的話,
以我依家同佢嘅關係,
我地的確過去唔返以前咁樣
兩個人唔會再靠近




但係至少我可以望住佢
就咁樣俾我望一眼已經好夠
唔會再追求第二啲野,
但係當我去到外國,
就唔可以咁做啦
香港所有野我都捨得,
唯獨係你.

日子一日一日咁樣過去,
無論我點樣努力都好,
始終都阻唔到時間嘅前進
我要去外國喇
呢幾日,
我靠Candice知道左
呀琳去左附近嗰個社區中心溫書




亦即係我之前同佢一齊溫書嗰陣嗰個社區中心,
我已經唔敢幻想其他野
如果係以前,
一定會幻想,
呀琳嚟返呢度
代表佢仲未忘記我地嘅事
但係依家知道佢同我嘅關係比陌生人更加陌生
實在冇理由令我有呢個幻想
只有我呢個人,
先會記住呢啲咁唔等洗嘅野
呀琳已經一早拋諸腦後
當我知道左佢喺嗰度溫書之後,
咁當然會喺附近偷偷地咁望佢
基本上有時我係一早喺嗰度等
又唔敢行開喎,




驚佢唔知會唔會突然間走人
衰啲講句,
我都係去可以望住嗰個社區中心出口嘅位置買野食
咁樣我咪可以醫肚之餘,
又唔擔心呀琳會走左
我知有人會鬧我嘥時間,
變態痴線佬
不過我已經唔會理
得返幾日我就走
呢個時候我仲諗人地感受
我呢個時候唔望佢,
好可能以後都見返佢
至少呢四五年之內都未必見返佢
我寧願嘥呢啲時間,
都唔想我再見唔到佢




每當我諗起我以後未必見到佢嗰陣,
我就好有動力咁樣喺社區中心出面等
望下一日望下又一日,
望望下,
我聽日終於要走喇
咁我夜晚執野嗰陣,
衫褲鞋襪嗰啲野
全部都係交由我老媽子負責
但唯獨有兩樣野,
我係一定要帶過去
第一樣係呀琳送俾我嘅鎖匙扣
第二樣係呀琳織俾我嘅頸巾
所謂睹物思人,
我就算見唔到呀琳
都可以望住呀琳送俾我嘅野
因為呢兩樣野,
係証實我同佢之間曾經好親近
唔係我自己幻想出嚟
呢兩樣野呀琳用左好多心機去整,
我唔可以俾佢地爛
所以我一定要帶埋佢出國
咁樣我就可以親眼望住佢,
減低佢俾人整爛嘅風險
我已經保持唔到同呀琳嘅關係,
我唔想連呢兩樣野都保持唔到
佢地係呀琳唯一送俾我嘅野
以後見到再靚嘅鎖匙扣,
手工再精細嘅頸巾,
都比唔上呢兩樣野
我呀爸呀媽問我點解帶埋去嗰陣,
我都冇同佢地講咁多
淨係話我一定要帶.

第二日去到機場,
我已經叫我班男仔朋友送我機
點解佢地班pk真係唔送
不過都好嘅
成班男仔攬埋一舊喺度喊,
成何體統
冇所謂丫係咪先
同埋我都唔想咁多人送我機
愈多人喺度,
我咪愈唔捨得走
所以嗰度只係得我呀爸呀媽同埋Candice
我估唔到Candice佢居然會喊
Candice:「我唔想喊架
你要小心啲呀 」
我:「痴線你喊乜鬼
我又唔係唔返嚟 」
Candice:「我同你一齊相處左咁多年,
點都有感情
我明明嚟之前話過自己唔會喊
點知都係唔得 」
我:「知你對我好啦 」
識左咁多年,
第一次用咁嘅態度同Candice講野
Candice:「仲整喊人 」
我:「幫我睇住呀琳呀 」
Candice:「嗯 」
我:「有啲乜野同我匯報啦
msn見 」
Candice:「嗯 」
我:「走啦,
拜拜 」
Candice:「拜拜
一路順風 」
其實我曾經諗過,
唔知會唔會好似電視劇咁樣
女主角喺男主角check in嗰陣趕到嚟
唔知會唔會有奇蹟發生
呀琳無啦啦出現
之後攬住我
不過奇蹟呀點會咁易發生丫
唔好搞笑啦
再見啦香港,
再見啦呀琳,
香港我就一定會再見
但係呀琳就唔知啦.