[真人真事][校園][純愛]《最陌生的人，就是曾經最熟悉的人》: 第六十二章

去到last day之前嗰晚,
上到床我諗左好多野
諗返起當年小學畢業嗰陣嘅野
我記得,
嗰陣我係好唔鍾意中學
因為我要同小學嗰班朋友各散東西
以前就係咁架啦,
淨係會放小學嗰班朋友在眼內
其餘就乜都唔知
最好笑嘅係,




上到中學之後,
就已經好少搵返小學嗰班朋友
諗返起當初喊苦喊忽
話唔想被拆散,
仲話畢業之後要成日見
真係好諷刺
咁當我一上到嚟中學,
就梗係有少少唔慣架啦
身邊嘅人同事都要重新適應,
好多野都唔同左




連嗰陣同我最frd嘅Candice都同我唔同班
大家又傾好左喺學校盡量唔講野,
扮到普通朋友咁樣
嗰陣我都有少少唔開心
咁當然啦,
所有野都係要時間嘅
時間耐左就開始適應,
慢慢我就喺度諗
其實中學都唔係咁差啫
喺度自嘲當初自己嘅無知




依家我先發覺,
其實中學真係好開心
起碼我喺度識左唔少豬朋狗友
又玩呢樣又玩嗰樣,
無憂無慮又一日
最重要嘅係,
我喺度遇到我最鍾意嘅人
慢慢諗返起,
以前初中嗰陣,
我點樣借尿遁
去隔離班偷望佢
我仲好記得,
我第一眼望到佢嘅時候
嗰種觸電感覺,
真係好入心入肺




鍾意嘅野就係咁兒戲
一個眼神,
就足夠令到你神魂顛倒
唔使話做太多野
一見鍾情就係咁解,
跟住腦海再回想返,
我中三嗰陣
點樣出晒奶力溫書,
搏入精英班,
我記得嗰陣真係好辛苦
基本上係書不離手,
好彩中四嘅經歷話俾我聽
呢啲努力係冇白費
我好慶幸以前嘅自己
咁有恆心去做一樣野,




如果我中三嗰陣唔係咁努力,
入唔到精英班的話,
結果已經係兩回事
跟住去到中四,
點樣同呀琳一步一步咁樣親近
一齊補習,
一齊去街,
一齊買野,
等等等等,
我都費事數咁多啦
因為實在係太多
數之不盡,
再慢慢諗返起今個學期嘅事
同呀琳由熟悉變陌生,
大家不瞅不睬,




形同陌路,
短短一個學期
所有野已經變得好唔同,
對於我嚟講,
中四同中五最近嘅分別
就係我身邊有呀琳同埋冇呀琳,
中四真係開心好多
一路諗一路諗嗰陣,
原來聽日就已經係last day
時間過得真係好快,
我頭先諗緊嘅野,
好似唔係過左好耐,
每一個細節我都記得好清楚
但係時間話俾我地聽,
呢啲事全部都發生左一段日子




唔到你唔認命.

第二朝我特別早起
因為我好想喺最後一日同平時有啲唔同
平時都話會瀨床,
今日唔會啦
今日我好想返學
所以我一醒就落床
一返到去,
基本上嗰日老師都放低晒老師嘅威嚴
任由我地上堂影相,玩
有啲老師仲同埋我地一齊癲添
我好努力認住我地班同學嘅樣
我好清楚,
日後好少可會咁樣
成班人,
廿八個聚埋一齊
以後唔會架啦
大家考完會考,
就各行各路
有啲可能出嚟做野,
有啲就可能retake,
有啲可能會轉學校應付高考,
有啲就會留返喺原校,
人就係咁樣
以前日日有得見嗰陣,
就唔會珍惜
係要到最後一日
先至認清楚楚身邊嘅同學個樣
原來好多同學,
對比我中一見到嗰陣
真係變化好大,
點解我以前唔覺嘅
當老師講肺腑之言嗰陣,
有唔少都喊左出嚟
我地以前成日笑呢啲野好戇居
係當我地聽嗰陣,
真係有啲催淚
幾老套嘅說話,
都有令人流淚嘅魔力
我唔敢望坐喺前面嘅呀琳
我驚我一望佢,
就會忍唔住喊埋一份
就算我想喊,
我都要忍到返屋企
夜晚上床嗰陣先喊,
講晒所有嘢之後,
就繼續影相喇
我地嗰日就係不停咁影相
上堂有好,小息有好,
甚至lunch time都好
都係不停影相,
我都唔例外·
基本上我個個都有搵
但就係偏偏有一個人我冇搵
嗰個人其實係我最想搵嘅,
但一嚟我唔夠膽
每次我準備晒好啲對白,
想行過去嗰陣
我就不其然會縮,
跟住見佢同第二個影相
我俾人截左糊,
都係算啦
每次我見到佢撩人影相嗰陣
其實我都好想佢會行埋嚟我個位
撩埋我一齊影
但係呢啲最終都係冇發生到
咁我都明嘅,
佢連我坐喺佢身邊都唔願意
又點會同我影相呢
我寧願有一世嘅遺憾,
都唔想你有一刻嘅唔開心,
最後,
我只係好懦弱咁樣,
拎住部相機扮自拍
但其實,
背景入面包含住一個我最鍾意嘅人
唯有咁樣ff當係合照
中學生涯,
咁就完左喇.