[真人真事][校園][純愛]《最陌生的人，就是曾經最熟悉的人》: 第六十章
目送佢上巴士之後
我自己喺天台冷靜一陣,
冷靜完之後,
跟住我就返左屋企
上下網,玩下啲無聊game
咁我一路玩,
玩到自己都覺得有啲悶
再好玩嘅遊戲,
都會有悶嘅一日啦
突然之間,
我個腦萌生左一個念頭
還掂喺屋企咁無聊,
不如我試下去尖沙咀
睇下撞唔撞到呀琳
即係玩俗稱嘅緣份遊戲
我覺得玩呢個遊戲,
好過喺屋企玩嗰啲囉
跟住我就同呀媽講:「我出去咯
今晚唔返嚟食
」媽:「約左人呀
」我:「係呀
」其實我邊有約人呀
我只係出去睇下見唔見到人咋
我最想約嗰個,
偏偏佢就唔會約我
咁試問我又點會約人呢
只不過我費事同我家老娘講咁多,
所以就求其答佢一句係呀就算啦
咁我戴埋呀琳送俾我嘅嗰條頸巾,
就出左門
當時大約係四五點,
我有預感尖沙咀會好多人
所以我喺度食左少少野先去
你問我心唔心急見到呀琳
咁我梗係心急啦
只不過,
既然玩得緣份遊戲(係我單方面玩)
我想偏向自然啲
有緣嘅就會撞到,
根本唔會急於嗰半個鐘又或者一個鐘,
如果係冇緣,
你喺尖沙咀廿四小時都唔會撞到
係咪好低b呀
不過冇計啦,
我唔去試下玩下
就唔會有撞到嘅機會
況且咁樣我大條道理解釋丫嘛
就算佢地見到我,
都起碼會覺得我係因為倒數先嚟尖沙咀
而唔係專登嚟撞佢.
食飽飽之後就去搭巴士
大約六點零鐘就去到尖沙咀
我喺九龍公園嗰個位落車
落左車之後,
冇乜方向,
跟住喺栢麗嗰度行
講開又講,
十年前嘅栢麗,
冇依家咁多國內同胞
即使嗰日係除夕,
身邊都係以香港人為主
唔似依家,
閒日都有好多國內同胞
跟住我沿住前面一路行
我記得嗰陣isquare,the one都仲未出嚟
跟行左去海港城
一嚟想去嗰度睇下野,
二嚟我覺得啲女仔都會多數會行嗰度
大家明我講緊咩啦
咁我全程都好集中咁樣望每一個人,
睇下當中有冇我熟悉嘅面孔
其實有時都唔係行商場,
只係周圍望緊啲人
但係行左好耐都見唔到我想見嘅嗰個人
之後行返出嚟
亂咁行左一陣,
我記得行左依家red mr個位
依家red mr個位咪有好多條分叉路嘅
我就好似啲遊客咁樣,
行完呢條行嗰條
咁當然我仲係全神貫注咁樣行
我唔想發生嗰啲老套嘅電視劇情節,
明明你想見嘅人喺你隔離行過
但你就見唔到,
互相擦過,
我同佢喺學校已經成日都係咁樣
我唔想出到嚟都仲係互相擦過
所以我一定好專心咁周圍望
但都係冇
行完一輪,
都有啲攰,
又有啲餓
明明我出嚟之前先食完野
咁算啦,
求其買麥當勞食算
食完之後,
出嚟繼續玩我單方面嘅緣份遊戲
之後我見到個天好黑,
我再望一望個手錶,
原來成九點幾
不知不覺間已經行左三個幾鐘,
之後我縮窄範圍
見到個背影係著住皮褸嘅,
我都照去
但係結果都令我好失望
全部人都唔係呀琳嚟
之後我更加睇埋邊個似係Candice,
因為見到Candice就見到呀琳
結果又搵唔到
跟住我去埋尖東嗰邊,
順便去尖沙咀碼頭
嗰度咁多人,
一定搵到啦我諗
我一去到身邊全部都係人嚟
好逼
不過算啦
心入面同自己講頂住
係咁架啦,
鬼叫我想搵人咩
慢慢行慢慢行,
一路keep住留意身邊啲人
都仲係見唔到
直至我聽到身邊啲人講,
2008年快樂
我先知原來已經倒數完
我都仲未見到呀琳
究竟佢喺邊度
點解搵到五六個鐘
都仲未搵到佢
跟住我就想打俾Candice
睇下究竟佢地去邊,
就算係輸
都想輸得心服口服
但係我依家呢邊咁嘈,
我就咁打電話嘅話
佢其實估到我出咗嚟
所以我決定行返去尖沙咀嗰邊
又咁啱,
我一去到尖沙咀就見到我架巴士
我心諗,
算啦都係撞唔到架啦
又或者可能佢已經返到屋企呢
都係搭巴士返屋企返屋企算
跟住我上到巴士,
因為今日係除夕夜,
依家只係十二點幾
冇乜邊個會咁早返屋企
所以我架巴士好少人,
亦都唔嘈
咁我就可以放心打電話喇
我:「Candice新年快樂呀
」Candice:「你呢個時候打嚟嘅
呀琳喺我隔離呀
好彩佢見唔到邊個打俾我姐
」我:「你呢度好嘈呀
」之後我聽到Candice同呀琳講,
話呀媽打左嚟
要去遠啲傾電話先,
Candice:「我行左出嚟啦
我話係我呀媽打俾我
你打俾我做咩呀
」我:「同你講新年快樂咋
」Candice:「你有咁好死
」我:「唔係我想喎
係我呀媽叫
」對唔住呀老媽子,
又擺你上枱
Candice:「多謝伯母先
同埋你個死人頭啦
」我:「你嗰度咁q嘈嘅
邊度嚟架
」咁我就可以知道佢喺邊度呀
雖然要婉轉啲問,
不過都總算問到
Candice:「我喺碼頭
.」我:「邊個碼頭呀
」Candice:「尖咀嗰個囉
」我:「咁好啦唔阻你喇
拜拜
」我唔問落去,
係唔想俾佢知道我出左嚟
不過點解,
喺倒數嗰陣我都喺碼頭,
但係我見唔到佢嘅
嗰一刻我先發現,
原來碼頭真係好大
明明大家喺同一個地方,
都可以見唔到
早知我就唔走住啦
如果我唔係返嚟尖沙咀嗰邊,
我就唔會見到架巴士
咁我依家就可能仲係喺碼頭嗰度,
可能已經見到喇
不過呢件事已經說明左一樣野,
我同呀琳根本冇緣
就算有,
都係曾經嘅事,
依家已經用晒啦,
如果唔係,
點會兩個都係尖沙咀,
但係都碰唔到面,
呢個就係最合理嘅解釋.