[真人真事][校園][純愛]《最陌生的人，就是曾經最熟悉的人》: 第五十九章

上一回講到,
我無啦啦問Candice係咪晏晝出去
我咁樣問得,
咁就梗係有目的啦
至於個目的係乜
其實就係咁嘅
我好想喺除夕嗰日會見到呀琳
但我亦都好清楚,
呀琳唔會想見到我
咁有乜野方法




可以滿足到佢,
又可以滿足到我呢
其實答案只有一個
就係只有我見到佢
但係佢見唔到我,
呢個就係唯一一個兩全其美嘅方法
所以,
如果我要咁做的話
咁我就一定要知道呀琳同Candice幾時出去
但係你知啦,




呢啲野,
點樣同人講出口呀
我講俾Candice知,
我都驚俾佢鬧我癡線
所以頭先一定要好婉轉咁樣問佢
每個人,
始終都會有啲啲秘密,
係唔想俾自己識嘅人知道

咁去到除夕嗰日,




我淨係知道呀琳同Candice晏晝出去
但係就唔清楚實際時間
咁我冇理由又打俾Candice問架嘛
咁樣呀水都知咩事啦,
所以我一早就去到天台
寧願喺嗰度等耐啲,
都唔想錯過機會
你知啦,
一走就冇回頭
點解我會上去天台
其實就係咁嘅
話說我嗰個商場天台,
有一個位係可以望落去樓下巴士站
而且嗰個角度仲要幾闊
仲要會望到啲人個正面




基本上如果佢地係搭巴士的話,
咁我就一定會見到佢地
我承認我係一個偷窺狂
但講真,
我唔係話有啲乜野特別想法
我只係想單純咁樣睇住呀琳
每過一日,
我見到佢嘅日子就少一日
我知道我第日去到外國,
一定會好掛住呢個面孔
因為佢已經喺我個心住左好耐
都應該走唔返出嚟架啦,
我知有人會鬧我好無謂
俾你見一見又點啫
仲要喺咁遠望




但係我想講,
愛情係咁架啦
當你真係好鍾意好鍾意一個人
你就會做好多冇回報嘅事,
明知佢唔會因為你做呢啲野而感動
因為佢都唔知道你係做緊呢啲野,
但你又唔想俾佢知喎
咁我一點鐘就去到天台等,
等等下就梗係悶架啦
好彩戴左部mp3機嚟聽 ,
以前邊度好似依家咁正呀
喺嗰陣,
手機都冇得上網
唔似依家咁樣,
可以一路上連登




一路等人
以前聽歌就係最大娛樂嚟架喇
咁樣等等下,
終於等到呀琳同Candice
呀琳今日著住左一件皮褸
下身係一對boot,
都係好似咋,唔肯定
因為始終唔係近望,
難免會有少少偏差
原來我仲可以望到佢著便服個樣
咁就已經好安慰,
原本我以為
我以後都冇機會見到佢著便服
依家先知,
我唔係完全冇機會




望望下,
唔知點解視線變得好矇
鼻頭好酸,
隻眼好似有啲野想湧出嚟,
跟住見到有幾滴水滴落我隻手度
我望一望個天,
唔係呀,
我呢度都冇乜雨
呢啲水係咩嚟架
唔通係冷氣機漏水
但我附近根本就冇冷氣機,
呢個時候我已經唔可以再呃自己
嗰啲唔係眼淚嚟,
我見到佢著便服個樣
就已經喜極而泣
定係其實,
我呢個情況,
根本就唔係開心到喊
唔知有幾時開始,
當我見到呀琳做一啲好普通嘅野
就已經令我好感觸,
明明呢啲野只係好普通
著便服,
微笑,
聽到佢把聲等等
根本係一啲好普通嘅事,
佢日日都會做
但係對我嚟講,
呢啲野就好難得
有時真係好搞笑,
我好開心可以喺除夕見到佢
只係,
眼淚不自覺離開我對眼,
棲息喺我隻右手度.