[真人真事][校園][純愛]《最陌生的人，就是曾經最熟悉的人》: 第五十三章
喺開學日嘅晚上,
Candice打左俾我
Candice:「今日點呀
」我:「冇乜點呀
」Candice:「習慣呢種關係未
」我:「遲早都會習慣
依家咪都係適應期
」Candice:「你今日係咪喺走廊見到呀琳
」我:「係呀,
做乜野
」Candice:「我嗰陣落左去教員室,
所以就冇陪到呀琳
點知就俾你兩個撞到正一正
都唔知話你地有緣好定係冇緣好
」我:「你無啦啦打嚟梗係有啲野
入正題
」Candice:「我地放左學之後去食野
佢同我講返呢件事
」我:「佢點講呀
」Candice:「佢話見到你嗰一刻
要特登扮望唔到你,
真係好辛苦
佢仲話見到你冇望佢,
個心唔知點咁樣
嗰下先發覺,
原來過左成個月仲未放得低你
其實佢去到廁所嗰陣好想喊
但係因為我地仲未放學,
如果咁樣實俾其他人見到
佢話之前喺你面前已經好冇尊嚴咁樣大喊,
佢唔想俾你再一次見到佢喊
所以要死忍住,
想攞番少少尊嚴,
咁跟住我咪安慰佢
佢話其實佢知道話要同你形同陌路,
佢會好唔開心
但係冇得揀,
如果佢唔咁樣做,
繼續鍾埋去你嗰度,
自己只會更加唔開心
」原來嗰陣佢係同我一樣,
大家見到大家都唔知點樣
好唔自然,
明明兩個互相鍾意嘅人
點解會搞到咁樣
我當初咁樣做,
係咪真係啱
不過,
已經洗濕左個頭
都唔容許我有疑問嘅時間,
我:「咁佢仲補唔補習
」Candice:「我勸過佢,
我話冇必要為左你而唔補習
佢唔知道你會退出補習,
所以我同佢講叫佢頂住
唔好為左你放棄成績,
咁佢都話好
最多自己死忍,
我諗佢知道左你唔補習嘅話
應該會鬆口氣
」我:「唔該晒你呀Candice
的而且確冇必要為左我唔補習
佢真係講過,
嗰個補習miss幾好
仲係補一,三,五
」Candice:「係呀
」之後繼續返學嘅時間,
我同呀琳繼續冇互動
大家好有默契咁樣,
各自唔會接觸到,
唔知各位巴打絲打仲記唔記得,
其實小弟我係中文科科長
平時主要職責係收功課
我知你地會問,
既然我係中文科科長,
咁點會冇互動嘅空間
小小都有掛
咁我可以答你,
真係連啲啲都冇
平時我收功課嗰陣,
我都係叫啲人小息行嚟我個位
俾本簿我
如果我要收呀琳嘅功課,
一係佢就透過Candice俾功課我
一係佢就借俾本功課俾人抄
之後叫問佢借功課嗰個人幫佢交埋
平時如果喺走廊撞到,
佢一係就望前,
一係就望出走廊外邊嗰啲風景
總之我同佢唔會有眼神交流,
少少都冇
仲陌生過陌生人
你平時喺街撞到啲人,
都唔會特登扮望唔到啦
我依家個情況真係仲衰過陌生人
因為佢係連望都唔會望你,
你問我個心有冇唔舒服,
話冇就係呃你
你試下俾你最鍾意嘅人趕出佢嘅世界,
你就會明白點解
做兵都起碼可以靠近娘娘,
我係連兵都冇資格做
因為我根本就唔可以靠近呀琳
我唯一嘅安慰,
就係見到佢咁硬淨,
唔似其他女仔咁樣,
一失戀就叫天叫地
依家晏晝都冇得同呀琳食飯,
咁我就想好似之前咁,
晏晝唔食野
我只係做返未同呀琳親近之前做嘅野
當初我晏晝會食野,
都只係因為呀琳佢叫到
而我本身又有少少私心
想同佢接觸多啲,
先至會食飯,
依家我已經唔會再同佢一齊食飯
所以我就決定過返以前嘅生活,
晏晝唔食野
諗住會頂到,
以前都得啦
係咪先
但原來唔係,
我頭幾日晏晝冇食野先之後,
原來我係會好肚餓
以前我習慣左,
我就可以頂到全日
但自從同呀琳一齊食晏之後,
我已經習慣左晏晝食野嗰個感覺
已經返唔到以前
做人最慘就係,
當你啱啱適應一樣野嘅時候,
嗰樣野偏偏就走左,
當你想去返未適應之前嗰陣嗰個狀態,
已經唔得喇
無論係我個肚,
定係我個人,
一習慣左,
跟住就再去唔返以前咁樣
喺學校我就唔會同佢有任何接觸,
但係喺校外,
我就做左一件事
或者係我知道我得返半年時間望住呀琳,
所以我更加要珍惜時間
自從中五開始左之後,
每逢星期一,三,五,
我放左學就會一支箭咁樣走
唔係因為我趕住返屋企打機/打丁
而係因為我要趕去呀琳補習嗰個商場
企定個暗角位,
望住呀琳過嚟,
望到佢補完習,
之後再喺後面靜靜地跟住佢
望住佢上巴士先至走,
頭幾日,
我真係喺個暗角位,
企定定喺度兩個鐘
因為我唔知佢個補習時間有冇轉,
如果轉左嘅話咪食屎
睇過頭幾日嘅情況,
發覺佢個補習時間同以前冇分別
每堂補兩個鍾,
咁我就唔再戇居居咁樣
企喺個暗角位兩個鐘,
我會望住佢入去補習社,
之後我就喺附近溫下書
又或者睇下啲小說
當係解悶又好乜都好
鬼叫嗰陣冇智能電話
我又唔鍾意睇漫畫喎,
多數去天台又或者麥當勞坐,
我好清楚呀琳補補下習係唔會隨便行出嚟
大佬我同佢補左成年,
我點會唔知佢啲習慣
咁樣做,
好似係有啲變態
我亦都唔否認,
但係,
就算我俾人鬧變態都好,
我更加唔想見唔到佢
我極可能得返半年時間見到佢,
當我去完外國返嚟之後,
中間都起碼過左四,五年
仲要唔知佢喺呢四,五年入面會唔會搬,
到時畢左業,
又過左咁耐
想見都難
我只係想珍惜我見到佢嘅時間
所以先咁做,
因為我已經唔可以光明正大咁樣陪著佢
只能夠咁樣偷偷摸摸跟住佢.