[真人真事][校園][純愛]《最陌生的人，就是曾經最熟悉的人》: 第五十二章

講講下都就快去到中五
時間過得真係好快
諗返起,
中四嗰個畢業典禮好似唔係好耐嘅事,
但原來已經過左兩個月
我同呀琳個關係亦已經變到好唔同
前後只係兩個月,
估唔到會有咁大嘅變化
如果,
當初我單純咁樣,




根據我自己嘅心意,
唔考慮其他野,
接受左呀琳嘅表白
中五開學嘅第一日,
就係我地拍拖一個月嘅紀念日
可惜,
世界上從來冇「如果」呢兩個字
講就成日講,
但無論你講幾多次,
「如果」都係唔會出現




開學前一日嗰晚,
我都唔係好瞓得著
唔係因為我未做晒暑期作業
當然啦,
升中五嘅都好少會有暑期作業
因為我地要準備會考,
我唔係好瞓得著嘅原因,
係我喺度諗,
聽日終於會見到呀琳
世界嘅事真係好奇妙,




之前我就因為好期待見到呀琳而搞到瞓唔著
但係今晚就唔係,
我都唔知聽日應該點樣面對佢
我好想見到佢,
佢就唔想見到我
咁我應該點樣做,
況且我地係同一班
係冇可能見唔到,
咁當我見到嗰陣,
我又應該點呢
係咪應該配合佢,
佢唔叫我,我唔叫佢
大家好似唔識大家咁樣,
直行直過就算
做就唔難做,




但我可以肯定,
我個心會好唔舒服
諗諗下,
係我拒絕左人,
我個心唔舒服咪當係報應,
如果我再上去煩住佢
只會令佢更加唔好過
加上呀琳都講左,
想同我斷絕關係嚟忘記我
佢都講明個目標,
咁我都識做啦

第二日返到去,
今日竟然有早會
我地係男仔排一條隊,




女仔排一條隊,
我個位置係企得後過呀琳
我望住佢個背影,
又去返中四之前咁樣
大家已經有距離,
唔會再好似中四咁樣,
我同佢可以拍住行
我唔使再追趕佢,
依家,
我係連追趕嘅權利都冇
淨係可以任由呀琳喺前面,
我唯一可以做嘅,
只係喺後面偷望佢
見到佢同啲女同學有講有笑
咁個心都安樂啲




起碼唔係表現出受左好大刺激
係咁嘅話,
我就仲難受
當然,
佢係咪自己一個嗰陣先表現出唔開心嘅情緒,
咁我就唔知喇
上到去班房,
老師話新一年就會調位
不過個位就由我地自己揀,
大家同大家傾掂數就得啦
證明個老師都係好q懶
連學生嘅座位都唔諗
我擔心呀琳會坐返上年嗰個位,
所以我冇揀返上年我坐嗰個位
我喺後便求其揀一個位坐就算




之後原來係我諗多左,
呀琳都冇坐返上年嗰個位
今次同返Candice坐
而我個位,
就喺佢後兩行嘅左手邊
已經唔會好似上年咁樣,
我坐喺佢正後方咁接近
座位已經話俾我聽,
我同佢,
真係返唔到去以前喇
我嘅正前方唔再係佢,
佢擰轉面嘅時候,
見到嘅亦都唔會再係我
一年時間,
365日,
8760個小時,
525600分鐘,
31536000秒,
所有野已經變得唔同
但係我知道,
無論我再等幾多秒都好,
我地都唔會返去以前咁樣

呢幾年我都慣左喺人地面前戴面具
所以喺學校入面,
我都會扮到好似之前咁樣
嬉皮笑臉,嘻嘻哈哈
大家都知中學生涯有幾麻煩架啦
基本上係冇秘密可言,
所以喺學校,
我唔會同人講我同呀琳嘅事
唔係嘅話就會仲麻煩,
我已經搞到佢咁樣
再俾麻煩佢嘅話,
只會令我嘅罪名更加重
咁去到小息嗰陣,
我就一支箭
衝左入去廁所屙尿
大家做過中學生都明,
唔知點解真係咁鍾意去廁所
有時唔係好急,
都會屙左先
好奇怪,
咁我屙完出嚟之後,
就行返入去班房
好死唔死,
呢個時候我喺走廊嗰陣,
見到呀琳一個人行去我嗰個方向
即係代表我地兩個會迎頭碰面
呢個時候,
我feel到自己好緊張
個心跳得好勁
但我又唔可以成個人硬晒肽
戇居居企喺度,
咁樣係人都知咩事啦
我亦都唔敢望住呀琳,
我好怕同佢有眼神接觸
其實唔止佢唔識面對
我都一樣唔知點樣面對佢
講講下,
我地已經越來越近,
得返三步,
兩步,
一步,
各位讀者唔使咁期待喇,
我地冇事發生
直行直過,
佢有佢行,
我有我行,
向住相反方向走,
我地雙眼都係望住前面,
眼眸裏再冇大家嘅存在
我深一深呼吸,
之後行返入去班房,
冇喇,
我地之間真係再冇任何瓜葛
我喺佢個世界入面已經再冇位置,
時光,
真係返不到最初.