[人性] [感情事]我不會講你知，其實是第幾次: 離開

"一年...好！我應承你！" 

"哈，你唔好咁口響，我都未講完。 
呢一年，我唔會理你。 
話唔定一年後我已經唔記得你呢。" 

以我認識既Ada，一定唔會。 

"哈，又或者一年後你會好掛住我呢。" 



就係咁，我地定立左呢個一年既約定。 
亦都係因為呢個約定，我決定去留學一年。 
希望籍住呢一年，可以好好充實自己， 
令Ada刮目相看。 

"老豆，我決定左去讀書喇。" 

"嗯，冇問題。" 

我申請左英國好幾間大學既MSc program， 


最終拎左兩個offer。 
而家我就揀左去英國南部一個小鎮， 
展開我既新旅程。 

離開香港當日，香港國際機場。 
我既一生只係飛過一次，同Ada去日本。 
而今日既我，居然隻身去外國讀書， 
係我諗都諗過既事。 
黎送機既除左我屋企人， 
當然仲有樂仔。估唔到Stella同Candy都一齊黎左。 


唯獨係Ada冇黎。 

"你呀，唔好掛住溝女呀。"Stella同我講。 

"哈哈，我似d咁既人咩。 
你呀，唔好掛住溝仔呀。 
睇定d，搵個好男仔啦。" 

我同佢地逐一擁抱，攬住我老媽子既時候， 
佢忍唔住喊左出黎。 
畢竟咁多年黎，我都冇離開過佢身邊。 

我忍住眼淚，望一望四周圍。 
確認左Ada真係冇黎之後，就步入禁區。 
自從佢話佢唔會理我之後， 


佢真係冇俾我搵到過佢。 
我讀書既事都只係留左個message俾佢。 

十二個鐘頭之後，我踏入倫敦希斯路機場。