[人性] [感情事]我不會講你知，其實是第幾次: 旅行

有一日，我同Ada出街既時候， 
佢突然問我： 

"喂！你有冇去過邊到旅行呀？" 

"我未去過旅行呀，做咩呀？" 

"係咁既，我...我同佢去過日本。"言下之意，即係Ada想同我去旅行？ 

"哈哈，你借d意想約我去旅行呀？" 



"哼！你可以唔去架！"Ada擰轉面，扮哂嬲咁。 

"去去去！咩唔去呀！女神約我去旅行喎！"我有時會戲稱Ada做女神。 

"咩女神呀！唔彩你喇！sem break去好唔好呀？" 

"你話事啦！" 

就係咁，我地約好左好旅行喇！ 


由於我未坐過飛機，事前我真係有少少緊張， 
咩都問一餐。 

"老媽子！有乜野唔帶得上機架？" 

"自己上網搵啦咁大個人！" 

"我驚去唔到旅行丫嘛！陣間佢地唔俾我上機點算？" 

"你係咪傻架仔！話時話，你同邊個去旅行呀？幾多人去呀？" 



"朋友囉。兩個呀。" 

"女朋友呀？" 

"唔係呀！普通朋友咋！" 

"我話你聽呀你做人要小心d呀安全最緊要！" 

"乜野呀呀媽？都話普通朋友咯。你諗左去邊呀？" 

"我叫你做人小心d之嘛。你諗左去邊呀？"