[人性] [感情事]我不會講你知，其實是第幾次: 紋身既女孩 (7)

雖然而家係廿唔知幾多世紀，但係男人既基因都係冇變架。 
好勝。 
我淨係知道我出左手，我唔會俾自己輸！ 

而好勝，足以令到一個人陰溝裡翻船。 

"我明白佢追左你兩年，真係好有耐心好有誠意。 
但係愛情並唔係只係計到場既先後。 
如果因為我遲黎就當我冇誠意， 
咁樣對我並唔公平。" 


我又一個懇樣。 

"我明白，你俾時間我諗下啦好嗎？" Rose望住我雙眼。 

如果當時我識諗既話， 
其實好清楚明白呢個女人貪心，想兩個都愛想兩個都對佢好。 
而我，只係一隻棋。 
可惜，我諗通得遲左少少。 

有人話當局者迷，的確冇錯。 


我最後悔既唔係自己柒左， 
而家傷害左Ada。 

"Hugo，我想同你傾下。"Ada打俾我。 

"做咩呀Dada？" 

"我淨係想知道，你仲會唔會同我去南丫島？" 
點解Ada要咁執著南丫島？ 



"我真係冇時間呀...你有冇咩緊要事要去？ 
如果冇既你搵其他人同你去？" 
我當時係咁樣答Ada。 
好明顯，係，鬧我啦，我冇心肝。 
又係我話要建立我地既回憶， 
Ada提左我咁多次，我就應該要知道南丫島對佢黎講好重要。 

"冇，冇緊要事。算啦。" 
明顯地，Ada好失望。 
可惜當時我正正只顧住Rose。 

鏡頭一轉，我約左Rose，不過佢遲遲未出現。 
我打俾佢，聽電話既係一個男人。