[人性] [感情事]我不會講你知，其實是第幾次: 火車姐姐既秘密 (6)
"第三者？即係咩意思？"我保持冷靜咁問。
"你真係要知？你知道左既，我地番唔到轉頭。" 火車姐姐望住我雙眼，好似想睇穿我咁。
"我要知。"我字字鏗鏘。我一定要攪清楚。
"我有男朋友。"下？即係我俾左綠帽佢條仔？
"咁點解你要咁做....？"
"佢背住我出軌，我想報復。
你一直都問我點解呢排咁神化，
其實係因為我發現佢出軌，不過我冇講佢聽我已經知道左。
我只係恨佢平時扮到對我咁好，居然係背後做左咁多野我都唔知。
所以，我想報仇。"
我睇得出火車姐姐雙眼，充滿恨意。
".......點解你唔同佢分手？"
"因為我愛佢。" 呢個時候既佢又柔情似水。
呢D係咩道理黎？
唔想同佢分手但係又要報仇？
因為人地出軌你就俾番帽人地戴？
眼前呢個女人，我睇唔穿佢收埋幾多野。
我睇唔穿佢邊句真邊句假。
我淨係知道，我作為佢朋友。
我接受唔到佢咁做。
原來我只係佢既一隻棋。
雖然外人睇到之後覺得我都佔左便宜，
但係呢個係我既好朋友。
我一直都好真心咁對佢。
點解佢要厄我？我諗番起呀健。
我好嬲咁同佢講：
"你玩我？你好自私呀。"
"人都係自私架啦。
你掛住讀書個陣有冇諗過Stella？
你同我上床個時有冇諗過Stella？
你咪一樣咁自私。" 火車姐姐毫無內疚之意。
我冇野好講，我選擇推開大門，離開呢個地方。