[人性] [感情事]我不會講你知，其實是第幾次: 火車姐姐既秘密 (5)
"我仲講得唔夠清楚咩？
我係中意你，想同你發生關係。
但係，我地唔會一齊，亦都冇可能一齊。
所以，我地將呢件事留係今晚就算啦。
出左呢到，我地當咩事都冇發生過。"
火車姐姐真係冷靜得唔尋常。
點解好似我同佢掉轉左角色咁？
而家佢趙完鬆呀？
雖然我冇蝕底，但係我一定要攪清楚！
我最憎俾人蒙在鼓裡。
頭先一直以為火車姐姐中意我，
我都有意同佢發展，
我先會同佢發生關係架喎！
"唔得，我地一定要講清楚。
如果你中意我，我地點解要當冇左件事？"
我不到黃河心不死。
"如果因為今晚，你想同我一齊，
呢d叫責任唔係中意。
我問你，如果你同我一齊，
你即係放棄同Stella復合既機會。
你真係諗清楚喇咩？"
我無言，佢諗得咁清楚，
一定係事先已經諗住咁做。
但我冇出聲，我等佢講埋落去。
"再者，你心入面，仲有第二個人。
你接受到自己做第三者咩？" 佢依然一臉平靜。
仆街，你講咩話？