[人性] [感情事]我不會講你知，其實是第幾次: 註冊日

接住落黎最重要既日子，就係REG DAY喇。 
點解咁重要？除左註冊學位外，仲係報OCAMP既好機會！ 
以前成日聽D師兄講，去大學既OCAMP係幾咁令人熱血沸騰！ 
我真係萬分期待呀！ 

第一步，係影學生證。 
我真係好後悔我冇用自己既證件相。 
有人話，一生人影過最樣衰既相，POLY學生證必定進佔首位。 
我以前唔信，而家信了。 



之後聽左好多資料，終於到達我最期待既部份！ 
學生會！ 
各個屬會，大莊，學院會等等林林種種。 
有人舉牌，有人大嗌，目的都係吸引新生。 

由於我係比較早註冊既一個， 
我去到學生會COUNTER既時候， 
簡直係嚇親！佢地好似前世未見過人咁。 

"同學，去唔去OCAMP呀？大O好好玩架！" 



"同學，想唔想識自己學院既人呀？呢邊呀呢邊呀！" 

"呢邊係福記呀喂，最多靚仔靚女既地方！" 

佢地好似餓鬼搶屎，對住我同其他新生怒吼。 
當然，企得係COUNTER既，都係一眾靚仔靚女。 
好多新生都俾班靚仔靚女吸引左埋去。 
呢班莊員俾我既感覺好唔同。 
佢地少左中學生個份稚氣，取而代之既係一份朝氣蓬勃，唯我獨尊既感覺。 



"同學，有冇玩過CAMP FIRE呀？"　冇啦啦有個男仔問我。 

"冇呀..."　我唔慣同陌生人講野。 

"咁就岩喇！我地OCAMP有CAMPFIRE玩，仲燒到五層樓咁高架！" 

最後，我選擇左學院會同學系會既OCAMP。