[人性] [感情事]我不會講你知，其實是第幾次: 分手？冷戰？

自從我同Stella嗌完交之後， 
一直去到我考完alevel，我地都冇聯絡過。 
我地分左手？或者係啦。 
我地冷戰緊？或者係啦。 

我都真係好後悔當日用咁重既語氣同Stella講野。 
但係我選擇考試要緊，亦都冇即刻氹番佢。 

考完試後，我終於可以釋放自己。 
我都有反思自己。 


係咪我真係變左呢？ 
我諗我需要搵人傾下計。 

我想搵樂仔傾，但係又搵佢唔到。 
跟住我又搵Candy探下口風。 

"Candy姐，做緊咩呀？" 

"你個死賤人仲夠膽搵我？Stella乜都同我講哂架喇。 
我估唔到你會咁樣對佢囉！佢做錯左乜呀？ 


佢知唔知佢幾多人追? 
佢一心一意咁樣對你，你唔珍惜就算啦！你仲要鬧佢？ 
我睇錯左你呀！我仲以為你係一個好好男朋友。 
我當初都好支持你同Stella一齊架！ 
你去死啦賤人！" 

未等我解釋，我已經俾人噴到一面都係。 
唉，呢個時候，樂仔打番俾我。 

"唉，死仔。你做乜鬼野呀你？ 


為左考個試，冇左個咁好既女朋友，值得咩？ 
好自為之啦。快D追番人地啦！ 
唔講喇我有少少野忙緊，再搵你啦。" 
樂仔又收埋我線... 

我，都係想搵人傾個計姐... 
嗯，搵琪琪傾下先。 

"琪琪姐，做緊咩呀？" 

"我陪緊男朋友呀。" 

"你幾時又拍拖架？我唔知既？！" 

"Hugo哥，你咁忙，我廢事煩你啦。 


我同番Philips一齊喇。 
不過佢唔鐘意我成日搵你嘛..." 

"嗯，明白既。好啦冇野喇！" 

我發現原來自己真係冇乜幾個可以傾計既朋友。 
以前有起事上黎，都可以搵樂仔同琪琪丫。 
再以前，都仲有呀健丫。 

唉...我係個電話簿碌黎碌去。 
都冇乜幾多個可以傾計既人。 
咦，好啦搵佢傾下啦。 

"火車姐姐，係到嗎？"