[人性] [感情事]我不會講你知，其實是第幾次: 兄弟TALK

呢晚，我上左樂仔到打機睇波。 
兩個麻甩仔，三更半夜，唔係講錢就係女人架啦。 

"點呀你同Candy？"我首先問樂仔。 

"幾好咁啦。不過有時會覺得佢太痴身喇。 
你知啦，佢原校升到中六，意味住我係呢間學校都冇運行架喇。" 樂仔懶係不覊咁講。 

"你條友仔。未追人之前就當人係寶，追到喇就話人太痴身。" 
不過樂仔由一隻冇雀既腳仔，變到今時今日專心一意對Candy，都真係算係咁架喇。 



"你同Stella又點呀？"佢一個轉身，就將個話題交番俾我。 

"都係咁啦。佢都係一樣咁鬼死好。 
成日走上黎我屋企幫我做家務，連我老媽子都唔好意思。" 

"咁咪幾好。係喎，其實你仲有冇掛住琪琪？"樂仔陰陰咀笑。 

"嘩！講呢D。做咩冇啦啦提起佢？" 



"冇呀。你知你架啦個陣又話佢係女神為左佢要生要死咁樣。八卦下姐。 
一場兄弟你唔係唔講呀嗎？"　樂仔推左我一下。 

"講真我都唔知我對佢既感覺算係點。 
佢一直都係我心目中佔左一席位囉。 
你話我仲愛佢，我又唔係。 
你話我對佢冇感覺，又唔可以咁講。" 
我突然間覺得自己講野好鬼玄。 

"你講左野架喇？" 樂仔忍唔住窒我一野。 



"唉好煩呀你！咪鬼講埋D衰野啦。" 

"妖，講得勝起呀大佬！繼續啦。 
我問你一個問題。 
假如佢而家係單身，你又係單身，你會唔會再追佢？" 

"我...諗會掛。不過我都唔係單身啦。呢條問題冇意義！"我義正詞嚴。 

"OK，咁如果而家追你呢？" 

嘩呢個算係乜野問題呀？ 
"你都痴線既。假設性問題我唔會答。" 

"洗唔洗咁大反應呀。我隨口問下姐。 


不過你既反應出賣左你囉...." 

"唔好亂講野啦你，俾Stella聽到我殺左你呀。"