[人性] [感情事]我不會講你知，其實是第幾次: 小驚喜 (3)
"下？你講Hugo？你有冇睇錯呀？" Candy嘗試幫我解釋。
"我都以為自己睇錯，所以我跟住佢去到酒店大堂，我仲睇到佢幾多號房呀...
Stella，你唔好嬲佢呀。佢一定有苦衷..."樂仔顯得有d內疚。
(Hugo: 你講緊乜野呀...偷食有乜苦衷呀...)
Stella一句聲都冇出過...淚如雨下。
樂仔見到機不可失，就接住講: "黎，我地同你討番個公道。"
(Hugo: 仆街你估你拍緊古裝片咩...)
Stella依舊冇出到聲，呆呆咁企左係到。
樂仔見佢唔郁，一時三刻都唔知點引佢去酒店。
佢一心諗住Stella會好嬲然後捉姦在床架嘛。
點知Stella淨係企係到喊，一句聲都冇出過。
Candy可能見Stella太傷心，於是佢都開聲：
"Stella，去攪清楚左都好既。你放心，我地一定企係你呢邊！"
Stella緩緩開口："我唔想同佢分手呀...我地走喇不如。你地兩個都扮唔知好冇？"
好，我實在低估左呢個傻妹傻既程度。
佢地已經講到出軌，佢居然可以當冇事發生？！
樂仔同Candy對望一眼，可能係對Stella既反應始料不及。
等左一陣，樂仔再開口：" 唔得。你放過佢；我唔放過佢！我去打佢一身！"
樂仔一個轉身就走左去，Stella係後面叫都叫唔住，只有跟住黎阻止樂仔咁做。
Stella好奇怪點解樂仔係都要幫佢出頭。
望住樂仔既背影，Stella覺得樂仔好嬲，因為佢見到樂仔個身震哂。
而樂仔，其實已經笑到面容扭曲，身體抽搐。