[人性] [感情事]我不會講你知，其實是第幾次: 新生活 要好好過

"早晨。咦剪左頭髮喎" 我向住樂仔講。 

"係呀！第一日開學見新同學喎！唔知有冇靚女架嘛！" 

我地約左係地鐵站等，由於新學校座落新界區，家住九龍區既我同樂仔比起以往早左出門。 
雖然都已經中六，不過開學仲係會有所期待。 
特別係一個新環境，充滿住未知數，實在令人緊張興奮。 

最最最最最重要既係，由於呢間學校校風唔係太純良，出名多MK妹！ 
我其實都好憐憫呢班MK妹架。 


佢地一定係家貧，所以一條長少少既裙都買唔起。 

同樂仔吹下水目及下女，好快我地就到左學校門口。 
我望住校門係到諗，唔知呢兩年，我會係到遇到咩人同事呢？ 

今年中六只有三班，一文一理一商。 
我地走去文科班既課室，見到角落有兩個位置就坐低左。 
呢個時候我好似部SCANNER咁，掃視我地班既所有同學。 

其實我有少少失望。算得上靚既竟然得兩個！有冇攪錯呀！ 


同學A比較高，一頭電曲髮，甜美既笑容，有少少虎牙既佢不失為一個靚女。 
同學B比較細粒，一頭深啡色長直髮，個樣好可愛，眼大大。 
可惜我對佢地少少興趣都冇。 

我同樂仔交換個眼神，我諗佢都明白我諗緊咩。 
隔左一陣，一個我相信係班主任既物體走左入黎。 
佢好後生，三十歲未夠，仲幾高大靚仔，皮膚黑黑實實咁。 
佢話佢姓任，同時會係我地世史老師。 
佢頭先一入黎，我已經聽到班女同學細聲講大聲笑，九成係話個呀SIR靚仔啦。 



而我，由我掃視完我地班同學之後，我就下定決心要努力讀書 
開學日，好快就完結左。