[人性] [感情事]我不會講你知，其實是第幾次: 結果

四月。天氣除左潮濕之外，仲開始帶幾分夏意。 
四月。意味住一班中五學生就黎考會考。 

作為頹廢青年代表既我，我都有溫下書既。 
不過每次溫書，就會不知不覺咁諗起琪琪同我之間既事。 
或者咁講，可能係我冇心機讀書啦。 

有一日，琪琪MSN搵我。 

"Hugo，你就黎考試喇喎。 


點解你仲可以成日ONLINE唔洗溫書既？" 

"哈哈，因為我係天才櫻木囉。" 

"低B。我呢，有D野想同你講呀。你介唔介意落樓？" 

"冇問題，五分鐘後見。" 

我個心跳得好快好快。唔通琪琪終於肯接受我？ 
我火速GEL番個頭，換件衫就落左街搵琪琪喇。 


琪琪著左條牛仔褲就落左黎。 
頂，咁HEA架著得。 

"點呀？有咩想同我講。" 我見佢拎住個紙袋，唔通有野送俾我？ 

"er...呢D俾番你架..." 

俾番我？我打開一睇，頸巾，手鐲，我親手寫既聖誕卡。 
冇錯，佢將我所有送俾佢既野俾番哂我。 



"咁即係點呀？" 我冇表露任何情緒，簡單咁問。 

"我唔想爭你任何野呀。我知道你一直對我好好。 
但係，我諗得好清楚，我而家拍拖喇，你以後唔洗對我咁好架喇。" 

轟！我個腦一片空白。 
咩話？琪琪拍拖了？點解會咁架？ 
琪琪見我完全冇反應，就講左句: "咁我番上去喇..." 

佢背住身離開，我叫住佢。 

"恭喜哂喎。幾時既事呀？" 

"呢幾日呀" 



"D野你拎番啦，我送左出去就唔會收番，如果你唔想就掉哂佢得架喇。好啦，咁我都走喇。拜拜。" 

為何還未看開　不喜歡背人感慨　可以不愛 
不用愛　就當喜歡給你差遣 
原來還勝過被愛