[人性] [感情事]我不會講你知，其實是第幾次: 表白(3)

拖住琪琪之後，佢望住我，一臉尷尬。 
我乘勝追擊，問佢："做我女朋友好嗎？" 

係黑暗當中，琪琪碌碌雙眼，帶點尷尬咁望住我點左點頭。 
佢亦都冇縮起隻手。 

媽！我得左喇！我差D係戲院大叫。 
我拖到佢隻手仔好實，佢隻手好細好柔軟。 
成套戲我只係呆呆咁坐係到，感受住自己既心跳；感受住琪琪既溫度；感受住琪琪既體香... 



套戲話咁快做完。 
我地走出戲院既時候，就冇再拖住手。 
我諗起原來識左佢咁耐，我地都冇影過相。 
於是我提議去影貼紙相，琪琪若有所思，之後就話好。 

影完相，過完膠，我好滿意咁收埋左張相入銀包。 
但係呢個時候，琪琪居然話佢約左人夠鐘走喇。 

"你真係約左男仔？" 



"係呀..." 

"可唔可以為左我唔好去？" 

"下..." 

"算啦，你都有你自己既朋友；自己小心D，唔好太夜番呀。"　我都唔知點解我可以咁大方。 

而今次，我終於記得俾埋禮物佢。 
我送左佢去地鐵，個心其實唔係好踏實。 


究竟我地算咩關係？ 

於是，我打俾Kary。 
唔知幾時開始，我同琪琪有咩事，我第一個一定係搵Kary。 

"喂，係咪去街？" 

"你同琪琪行完喇咩？" 

"係呀，佢走左喇。" 

"ok，銅記等。"