[人性] [感情事]我不會講你知，其實是第幾次: 表白

"到時睇點啦" 我係咁樣覆Kary。 

其實自從知道琪琪真係約左男仔去街，我已經盤算緊我應唔應該表白。 
首先，既然呢個男仔約到琪琪平安夜去街，即刻代表佢係琪琪心目中有一定地位。 
而且，以我了解既琪琪，個男仔應該唔係最近先出現。 
如果我日頭搶先表白，成功既話就有可能阻止佢夜晚出街。 
但係，代價就係如果我俾琪琪拒絕，意味住琪琪好有可能揀個個男仔。 

唔知由幾時開始，感情係要咁樣計住計住？ 
我諗起Bobo，初戀無限好。 


當然，當初係Bobo想同我一齊在先，我要煩既事當然少好多。 
但係某程度上，我懷念當日同Bobo簡簡單單既生活。 

突然好想問Bobo一句：你，最近還好嗎？還愛呀健那賤人嗎？ 
講真，我對Bobo既恨已經開始淡化，可能因為琪琪既出現掛。 

不過我冇搵佢，根據某個名哲學家講過： 
"過去的就讓它過去 畢竟曾經只是曾經" 
唔係經歷過愛情既重創，絕得唔會有咁深既體會。 



話咁快，就已經去到平安夜當日。 
我準備好哂禮物，仲親手自製左張聖誕卡。 
出發去見琪琪了。 

心情既興奮又緊張！ 
我地約左係銅鑼灣等，我記得當日人山人海，水洩不通。 
我今日著左件Casual 既西裝褸，務求以最靚仔既姿態出現。 
今次琪琪冇再遲到。 
佢著左一條藍白間既短裙，真係好靚，笑得好甜。 



唔知點解，我覺得我今日會成功。