[人性] [感情事]我不會講你知，其實是第幾次: 初次約會 (2)

我焦急到就黎爆。 
但我都知道我唔可能無了期咁等落去。 
所以我決定等到1點，見佢唔到就算。 

時間過得好快，轉眼間已經12:45。 
仲有十五分鐘。 
呢個時候，我見到電梯有個身影跑緊過黎。 
我笑左笑，我知道，係琪琪。 

"對唔住呀Hugo！我遲左咁多！" 琪琪跑到我面前，喘哂氣咁講。 



"唔緊要啦！到左就好。點解電話同SMS都搵你唔到既？" 

"我電話壞左呀！平時我靠電話個鬧鐘，但係壞左我唔知醒呀。" 

我笑左好耐，原來就係一個咁簡單既理由。 
但我就好似個傻仔咁諗千百萬個佢唔理我既原因。 

或者，當你緊張一個人，就會有所體會。 



"好喇，我地不如睇左戲先？我買左飛喇頭先！就黎開場喇！" 我問。 

"嗯，好啦！" 

我地睇既係 E健同呀SA既"阿孖有難"。 
劇情係咩我都唔記得喇。 
我淨係記得好多次我好想拖住琪琪隻手，但奈何我又唔夠膽。 
萬一衰左，陣間一定好尷尬。 
成套戲，我就係猶豫同十五十六既心情下睇完。 



唯一令我失望既，就係睇完戲後，琪琪又變得咁靜。 

"我同你食D野先啦不如？" 我怕佢肚餓。 

"好呀。" 

成餐飯就係我自己一個係到唱單簧，佢只係好簡單咁應我。 
而且我睇得出，琪琪好似若有所思咁。