[人性] [感情事]我不會講你知，其實是第幾次: 初次約會

"琪琪，就黎生日喇喎！有咩攪呀個日？" 

"琪琪，生日個日賞面食個飯嗎？" 

"琪琪，生日個日我請你食飯，冇得SAY NO" 

我諗左好耐都唔知點開口約琪琪好。 
正當我苦思緊既時間，電話突然響起。 

噢！曹操！！ 



"Hugo呀，我想問下你下星期二得唔得閒呀？" 

下？！唔係呀嗎？！琪琪主動約我同佢過生日？" 
仲洗諗既！緊係狗衝啦！ 

"得呀！我記得你生日架！我都諗住約你..." 

"不過我夜晚有少少野做，我地日頭出去啦。" 



"冇問題！星期二見！" 

收左線之後我係房到大叫。實在太興奮喇！ 
不過老媽子就入黎鬧我：痴左線咩你嘈乜鬼呀！ 
我完全冇聽佢講野！呢刻我既心情實在係太高漲喇。 

雖然我好想知道琪琪夜晚有咩做，不過霸住佢大半日都已經好好架喇。 
我個日一定要送頸巾俾佢！ 

到琪琪生日前一晚，我好似小學雞去旅行咁，完全訓唔到。 


第二朝一早就醒左。 
GEL完頭，又覺得唔滿意；之後又洗過頭。 
換好衫我就準備出門。 

我約左琪琪12點，食餐飯同睇場戲，之後行下街。 

但係....我由11:30開始打俾佢都冇人聽。 
SMS又冇人應。 
唔通琪琪出左咩事？ 
定係佢放我飛機呀？！ 

12:15PM - 我仲未見到琪琪既身影