[人性] [感情事]我不會講你知，其實是第幾次: 一見鍾情

自從我知道Bobo同呀健真係一齊左之後，雖然心痛，但反而好似放低左件事咁。 
我都算真係做番自己，過番正常既生活。 

我偶爾都會同其他同學八卦下 Bobo既消息，不過我既反應已經冇之前咁大。 
我仲愛唔愛佢？我都唔知。 
不過俗語講得好，舊既唔去，新既唔黎。 

雖然我仲未遇到一個令我真係心動既女仔，但係我慢慢發現單身都幾好。 
可以唔洗顧忌咁周圍撩下D女同學。 



直至有一日，我遇到佢。 
今時今日，我每次諗起佢，我都覺得好對佢唔住。 
我曾經好愛佢，但到最後，傷害佢既卻係我。 
如果要數呢世人我其中一件後悔既事，一定係我傷害左佢。 
可惜一切都冇得番轉頭。 

我屋企同中學都算好近，行十分鐘就會番到去。 
我記得個日我打機打通宵，第二日番去戴唔到CON。 
當我懞下懞下咁行緊番去既時候，我見到有個著住我學校既校服既女仔企係到等巴士。 
我望多佢兩眼，居然有觸電既感覺！ 


佢細細粒，眼大大，扎住馬尾，非常清純。 

以前我唔相信一見鍾情。 
但當我見到佢既時候，我就知道呢個女仔將會係我生命中佔一個好重要既位置。 
我呆左咁望左佢好耐，不過都係冇勇氣去結識佢。 
結果當佢上左巴士後，我就繼續行番學。 

我番到學校後，依然對佢念念不忘。 

"喂，樂仔。想問下你識唔識D師妹？" 



"都識D既。點呀Hugo哥？好難得喎你睇岩左邊個呀？" 

"哦，唔係。今朝番學見到個女仔好可愛，睇下你識唔識佢姐。" 我唔想咁快話俾樂仔知我點諗。 

"得啦！你叫到，我幫你！形容黎聽下啦！" 

跟住我就同佢講左個女仔既特徵。 
LUNCH食完飯之後，我番到課室，見到有幾個小妹妹係我地門口裝裝下。 

"有咩幫到你地呀?" 我問佢地。 

"我地想搵呀樂呀。" 其中一個女仔答我。 

呢個時候，樂仔就係我後面行出黎。 



"喂，你地黎左喇？點呀我問你地既野有冇消息呀？" 

"有呀，個女仔應該叫琪琪。好似係3E班架。" 

"好野喎！咁快搵到。抵鍚。好啦聽日出街再講啦。" 之後樂仔就打發左佢地走。 

我完全冇言。 

"呀樂哥仔，借問聲你幾時開始識左成大班幼齒架呢？" 

"哦，個日我打完波，佢地走左過黎問我拎電話。 
唔好講呢D住，拿，幫你問左人地邊班喇。你自己識做啦。" 

呢個兄弟的確唔話得。 



"唔通我去佢個班搵佢咩..." 我心諗。 

好快就放學喇。 
我中五個時已經冇乜人用ICQ，大家都係用MSN。 
另外一樣好HIT既野係XANGA。 

放學番到去基本上第一樣野就係上XANGA同MSN。 
意無意之間，我竟然係XANGA發現有個同學識琪琪！