【介紹返，我女朋友有七種人格】<痴線治癒 x 浪漫搞笑系列>: 【Episode 4 : Kate 】

【Episode 4 : Kate 】

面前和我對視的麗人明明是我的女友，但此時的她卻給我一種難以親近的感覺。

「我有睇過你寫嘅網上小說。」Kate 打破沉默，右手拿起杯來，順便呷了一口咖啡，舉止優雅之極。

哈哈！😅我有點驚訝，因為就連初晴也甚少看我寫的小說，她嫌裏面的劇情太過暴力了。頂！明明就是熱血爆棚的佳作！

「多謝捧場。係咪好睇先？😎」我豎起了大拇指，露出洋洋得意的表情。





「文筆都ok嘅。不過內容太唔realistic 啦。好似嗰套咩《那夜凌晨，我坐上了喪屍列車》咁......」Kate 冷冷回應。

「哇！識貨！呢套勁高Hit Rate！」我打斷了她的發言。

「林說叔為咗救男主角用個屁股頂住度車門，搞到畀群屍狂咬八月十五。太美國英雄主義啦，人面對危機嘅時候唔會咁，冇乜人會咁犧牲自己去救人。」Kate 語氣平淡，用詞尖銳。

「仲有最後男主角知道女朋友會變喪屍，所以唔上地面陪佢一齊死，都係好脱離現實。」

「呢個世界根本冇呢種不顧一切嘅愛情。或者你可能想改變大家嘅諗法，不過咁寫真係好天真嬌。」Kate 不留情面，狠狠地評擊。





她見我半響沒有作聲，知道語氣重了，正想打圓場。我揮手示意，阻止了她。

「唔係想改變人嘅諗法，我係想搵有共鳴嘅讀者。嗰啲仍然肯捨己去幫人嘅讀者，嗰啲為愛情付出一切嘅人，相信係少數，我諗佢地一定好孤獨。」

「佢地需要認同，我嘅文字就可以堅定佢地嘅信念，等佢地無忘初衷，繼續感染其他人。」我壯志衝天地說，發出強過金庸、歌德，一眾大文豪的氣場。

「要相信文字可以令呢個宇宙變得更加美好呀！」我誇張地向天揮出了一記重拳，眼神爆出烈焰，擺出要征服全世界的衝勁。

這種高溫燒滾了我一切的演講沒有嚇怕Kate，反而打破了我和她的隔膜。她身子傾前，嘴角上揚，稍微撥弄頭髮，露出了罕見的微笑。





我吞完最後一口墨魚汁意粉，把澳門事件的詳情告訴了Kate。畢竟我這次來不是為召開文學大會的。

「係各司其職。我哋每個人都有自己嘅定位同鍾意嘅嘢。例如話遇到危險，好戰嘅阿烈就會出嚟應付。」

「初晴鍾意小朋友，所以佢負責返工，仲有Auntie Wendy，佢年紀大啲，有智慧啲，同有耐性......」Kate 冷靜地解釋。

她沒有提到自己的角色，是因為對我仍然有保留嗎？

「有冇諗過搵人幫手？妳知啦，幾個人分咗啲時間，始終唔太方便，哈哈。其實點解會有咁多人出現嘅？幾時開始㗎？」我故作輕鬆地說。

天啊！是咪問得好白痴呀。我是否已經冒犯了Kate？

「係有搵過治療師，不過冇乜大作用。我哋七個人相處無乜問題。我哋亦無必要記返之前啲唔開心嘅嘢。今日就到此為止啦，好嗎？」Kate 的臉色黑得像林日㬢，她拿出錢包，急欲離開。

那次約會過後，我還是久不久便會看到Kate。通常我不小心惹怒了初晴，Kate 便會出來調停。由於在眾多人格中，她和初晴最老友，所以我經常性地巴結Kate，向她求助。





好心啦。只不過係擺隻假小強落珍珠奶茶度姐。其實有咩好嬲呢？🙄

Kate 答應我在初晴面前美言幾句，代價是請她看舞台劇。Kate 看劇的眼神時而專注、時以興奮，最後卻不耐煩地皺眉。

「套劇唔好睇？」我被她的古怪表情所吸引，離開劇院後，我問她。

「幾好睇，只不過我唔鍾意其他人係劇院討論劇情，我覺得有啲騷擾。」她抱怨的語氣竟然有點可愛。

她又不停地撥弄著頭髮，這個人格的習慣很獨特。

後來，我知道Kate 之所以不喜歡別人在散場時研究劇情，是因為她認為看完好的作品，需要時間消化和沉澱，她不喜歡別人打斷她的思考，破壞那一剎的寧靜。

Kate 某程度和初晴很相似。她們同樣喜歡吃蛋包飯、喝Latte，欣賞椎名林檎的音樂。





即使Kate 否定我主張人性本善的作品，她還是會去賣旗，還是會探訪孤兒院，還是會像個小朋友一樣去撫弄小狗。

冷漠的臉孔底下其實藏著一顆善良的心。

如果她和初晴是同一個人該有多好，我心中不其然產生了這個怪異的想法。

後來發生了一次意外，Kate 這個人格足足有半年時間失縱了，沒有再露面。直到今天，我仍然在想如果當天我有阻止她的演出，是否一切就會不同呢？

（待續）