第二千三百九十四日，收到了第一封我愛你的信: 三

講返小學上普通話堂先，其實呢段記憶都已經變得模糊，片段十分零碎。但係我好記得，當首歌唱到「我愛你 愛著你 就像老鼠愛大米」，佢圓碌碌既雙眼就會望實我，個陣只有六歲既我，真係感到一種暖入心既溫馨，吾知道係大家既記憶裡，仲記唔記得第一次接觸異性既感覺係點，好似港女d波咁平平無奇？抑或對六合彩咁緊張？定係小心謹慎咁講既每一字每一句都要諗過度過，驚死講錯？上完個堂之後我地開始做朋友，初戀如玫瑰，將要萌芽。

一句「下一站，上水火車站」將我帶回現實，唔經唔覺，架車已經到咗總站，係時候同女朋友報到。
搭火車既途中，我諗返起好多細細個既事，亦更加清楚逝去了的，不複重現，珍惜現在，把握現有。
女朋友如google定位，分分秒秒check我位置。
終於到沙田，同女朋友會合後，去咗一間叫炑八既韓式燒烤店，話說我到而家都唔知炑呢個字點讀。
呢一餐都唔係好貴，應該話無想像中咁貴，都係六百多啲啲，我地叫咗個牛肉海鮮套餐，因為本人真係好撚鐘意食牛，試過同呀草二人邊爐，係佳寶超市買咗三百蚊肥牛，最後食晒。
食野個啲就唔寫啦，廢費啲人以為呢度係MAY姐有請，哈哈哈哈哈。

食完野例牌行uniqlo，佢拎起件七彩呀婆衫。




「呢件衫靚唔靚呀？」笑口西西咁款問我。
「ok既，好襯你喎。」唔通講真話，你著到好似個呀婆咩。
「真係架？會唔會太colorful？」佢又真係信喎，開心到好似食完春藥咁。
「你咁正，著咩都咁襯你啦。」講完都車自己兩巴。
「咁我要架喇。」我掰撚大個口，唔撚係話...我燥撚咗...
隔咗陣...成間鋪啲人都望住我，皆因我好大聱咁講咗句...
「屌，揀過第二件啦，你著到好撚柒，好撚似個呀嬸呀！！」我終於忍唔住啦！！
我唔要再做老婆奴！！我唔可以再比人笑！！
我要屌鳩佢一次！！屌到佢驚！！屌到佢反肚！！
我唔撚可以再忍！！！第時要佢聽聽話話！！




無理由比錢買件咁撚柒既衫！！！！！

以上六行都係得個諗字，我又邊有呢個膽量丫.
.當佢講到『咁我要架喇』既時候，我就知瀨野。
「唔睇多陣？呢件會唔會好啲？」我求鳩其拎件衫婉轉咁問佢，試圖改變佢心意。
「下，呢件男裝黎，你玩野呀，我決定咗喇，就呢件啦。」轉個頭就跑左去counter。
最後我都係挽救唔到，好彩唔算貴，就係咁，買咗件七彩呀婆衫，到而家未見過佢著超過三次...

送完佢返屋企，又係孤伶伶一個，精神同體力都好疲勞，一覺唔小心就係火車度訓著咗。
「叮鈴。」




「叮鈴。」
「叮鈴。」
whatsapp不斷響起，我係訓教同睇message之間掙扎緊。
「叮鈴。」
「叮鈴。」
「叮鈴。」
「咩事呀，有無咁多野講。」我心諗條女搞乜東東。
一打開whatsapp，我條女只係打咗段「多謝呀好(心心眼)(心心眼)，我好鍾意件衫呀(十鳩幾萬個錫)，亦都感謝你肯陪我(十鳩幾萬個錫)..」下刪幾十萬字同十鳩幾萬個錫。
我係咁意覆咗佢，然後打開一個小學同學既whatsapp group，慢慢睇落去，先知道原來呀影出咗事。