《我家姐竟然做咗我班主任？？？》: 【30】

我知道家姐嚟搵我，係有嘢想同我講嘅。

家姐佢斜斜地望一望漫澄，漫澄佢都好識趣，「我返上去先啦，唔阻你哋。」

漫澄笑道，然後就轉身離去。遠眺漫澄嘅背影，散發出仙氣，一種迷人嘅氣質。佢嘅馬尾隨住佢嘅擺動，而更覺吸引。

「喂！望夠人哋未呀？咸濕佬？」家姐細細聲咁講，生怕惹人懷疑。

「咩事呀？」我不耐煩地說，眼前喱位迷人嘅家姐搞鑊我件好事，有咩可能心情好呀？





「聽講你頭先同David一齊跑喎？」

「係呀。」我態度都係咁唔好。

「點呀，贏得輸呀？」家姐佢好關心咁喔。

「做咩呀？咁關心？」其實佢遲下去睇結果就知啦，不過我估佢就係等唔切個結果，先走嚟問我。

「咁我梗係撐你架啦！我想你贏個賤男呀！！！」家姐情不自禁提高聲浪，不過操場咁嘈，人哋都聽唔清楚我哋嘅談話。





「我...輸咗......俾佢。」

「下？」家姐佢流露出一絲失望，但收得好快，一閃即過，「唔緊要啦，下次再努力啦！」

「我知。」我細細聲講，「我頭先都出盡全力，想去贏佢，幫家姐出返口氣，用公平嘅比賽，點知......」

唉...但輸咗就係輸咗，講咁多籍口都掩飾唔到喱個不爭嘅事實。

家姐佢輕輕撫摸我個頭，好溫柔好溫柔，喱一種溫柔係我細個嘅時候出現過，之後就無。





依家重溫返，暖在心頭，忽然間有種想喊嘅衝動。

喱個氛圍，叫做感動。

「我明架啦。」家姐柔聲道，「我知你都係為咗我，不惜一切，又...令...自己...受傷。」佢嗚咽地道。

家姐好想喊，但又唔俾自己喊，畢竟喱度係學校，如果係屋企，可能已經淚崩。

「多謝你。」

我哋好少會咁認真講喱句，但如今一句真心嘅「多謝」，勝過無數語言。

因為喱一句，係直達你心扉。

已經唔需要再多講嘅咩......





心意，已經傳到彼此嘅內心，震憾身體每條神經。