我只不過喺自修室溫書，點知比我遇番佢。: <外傳二>有情人終成眷屬

「得閒聯絡多啲，出黎食下飯啦。」個婚禮完咗之後我講，同小霖講。
 
「好啊，我話過我搵到幸福就會番黎搵你。」
 
「咁下次帶埋你男友出黎啦。」小涼喺我隔離講。
 
「嗯，一定會。」
 
其實我有懷疑過小霖講嘅嘢到底係真定係假，但係見到佢而加過得咁志在，咁輕鬆，都戥佢開心。
 


或者當初佢離開我嘅決定真係正確嘅。
 
希望你真係得到幸福啦，汪映霖。
.
.
.
「見到佢地咁幸福真係好。」小涼講。
 
我地之後去咗海濱長廊散步，而家我地坐咗喺到背靠住背咁坐喺到傾計。
 


「我都覺..乜你而家好唔幸福咩？」
 
「嗯..哈哈，問你一樣嘢啊。」
 
「知唔知點解當初我會鐘意你啊？」
 
「因為我靚仔囉。」
 
「死啦你，無厘正經！」
 


「好啦，唔玩你啦，講真真係唔太知喎，點解啊？」
 
「你記唔記得細個果陣去遊樂室啊？」
 
「會所果個？成日去架啦。」
 
「咁你又記唔記得你救過個女仔？」
 
「救過女仔..？」我個腦海入面啲回憶不停回放，搜索番果段回憶。
.
.
「你聽日係咪會再翻黎呢到玩架？」小女孩問。
「會，一定會！我應承你啦。」小男孩答翻個女仔。
 
我諗番起成日發果個夢..呃！


 
「你就係個女仔？！」我恍然大悟。
 
「嗯..」
 
「吓？！認真麼？」估唔到我地咁耐以前已經識。
 
「咁你係點認得我？」我問。
 
佢一路講番個經過，就將我腦部嘅記憶一塊一塊咁拼湊好。我醒起..果次經歷最後帶俾我好大嘅失落感。
 
佢一路講，我地就一直眼都唔眨咁望住對方。
 
原來我地一早就認識，一早就訂下咗緣份。
 


「唔知點解一喺自修室見番你就有種好熟悉嘅感覺，不過即使我仲未肯定你係咪就係果個男仔，但係我都不知不覺咁..鐘意咗你。」
 
「加上上次踩完單車之後，我地遇到果幾個爛仔，你奮力去救我嘅畫面更加令肯定係你。」
 
「由我好細個就認識嘅費子楓係見到不平事就會拔刀相助嘅人，無論對唔識嘅人定對自己朋友都好。」
 
「雖然..就算細個救我嘅同果日救我嘅唔係同一個人，但係我鐘意嘅都係我而家眼前呢個，傻下傻下嘅費子楓。」
 
「更何況我就係果個男仔，哈哈。」我講。
 
「可能冥冥中自有注定，注定我幫嘅係你，注定我地喺自修室見番，注定我地相戀..直到而加。」
 
「你仲好講！果日你明明話會再黎陪我玩，最後都冇！你失約！」佢突然話我。
 
「唉啊！果次番到屋企，阿媽見到我塊面瘀到一撻撻，唔俾我落去玩，我一直記得同你嘅約定架，我求咗佢幾日佢先俾我落去，點之等下等下都等你唔到，我以為你失約所以好失落。」


 
「我開頭仲想將你介紹俾小霖識，你地一定可以做到好朋友。」
 
「原來係時間嘅錯…我等咗兩日就冇再落過去，我驚再遇到果啲人，又冇人再保護我。」
 
「唔怪得啦..不過如果果日我地仲有一齊玩，好多嘢都會唔同。」
 
「可能我對你嘅感覺會同對小霖一樣。」
 
「可能我地就唔會一齊。」
 
「邊有咁多如果架！我地應該珍惜而加，活在當下！」佢握住我隻手講。
 
「係..」我突然企起身。
 


「做咩啊？」
 
我單膝跪低，然後講：「你願唔願意..同我追番過去失去咗果10年時間？雖然我而加咩都冇準備，但係時間真係唔等人，我地真係要珍惜每分每秒。」
 
「嫁俾我啊..巴渣妹！」我講完之後，只係見佢已經喊到缺堤咁款，眼已經紅到無法形容，大概係好感動掛。
 
「索索..死人頭！咁突然做咩喎..我地一齊咗就黎6年啦，咁仲有4年咪..」
 
「唔係唔係啊！我地仲有好多好多個10年架！」佢突然咁講，嚇到我當堂驚惶失措。
 
「噗哧，傻佬，玩下你炸！我嫁啊我嫁啊，我嫁俾你個死人頭啦！！」佢好興奮咁講。
 
講完之後我地就攬得好實好實，打死都唔會再分開！
 
「小涼。」
 
「嗯？」
 
「我希望你唔會唔記得，我地喺埋一齊嘅每一日，都係咁開心，我都係咁愛你。」
 
「嘻嘻，傻佬！」
 
玻璃之城入面，黎明同舒淇要到人生最後一刻先可以喺埋一齊，就等我地去彌補番呢個遺憾，繼續延續我地嘅故事…..
 
<我只不過喺自修室溫書，點知比我遇番佢>真係完。