我只不過喺自修室溫書，點知比我遇番佢。: <外傳>修成正果
「你快啲啦！咁慢架你！仲慢過我！」一朝早，小涼就喺我屋企係咁催我。
佢已經可以喺我屋企自出自入，我阿媽配咗條鎖匙俾佢，當正佢新抱咁。
今日係我好緊張嘅一日，所以我希望自己可以以最示正嘅形象見人。
「得啦得啦，我都急架。嘩，睇真啲，咁靚嘅你今日？」
著起姊妹裙嘅佢，簡約又不失高貴，淡淡地嘅妝更將佢五官嘅精緻突顯出黎。
「淨係今日咩？！死人頭你都好示正嘛。」
「洗乜講，唔係點襯起你。」
然後我地就拖住手出門口，唔係我自吹自擂，但係我地拖埋一齊真係珠聯璧合，襯到絕。
我去拎咗車之後就馬上去會合阿星。
啊！唔記得講番，今日我地要出席嘅係一個世紀聯婚。
自從大學畢業之後，我地都各自有各自嘅事業，但係唔變嘅係，我地可以周不時就有聚會聚埋一齊，所有大家感情仍然好好。
今日係阿月同阿靜，阿言同阿晴嘅聯婚，一次過出席兩個婚禮，我都係第一次。
不過大家係兄弟，有咩所謂。
伴郎同伴娘，自然落喺我同阿星，子妮同小涼身上。
一去到，當然就係玩新郎嘅環節。
「開門利是，九萬九千九百九十九！」一開到門，班姊妹就講。
「濕碎！拎去！」娶老婆真係唔可以慳呢啲。
「嘩，娜姐好靚喎今日！」我一入到去就講。
娜姐身為阿晴家姐，亦都係我地眾人嘅大家姐，佢見證住我地咁多對情侶嘅卜離合合，當然擔起姊妹團首領。
「洗乜講，唔好以為我淨係識匿喺星矢吧先得架。」
我地呢班兄弟團都真係俾佢搞到好甘，不過為咗兄弟，我地無懼！
幾經辛苦，先接到兩位新娘子。
「嘩..好靚啊老婆！」阿月同阿言見到佢地老婆都驚訝到呆咗。
識佢地咁多年，本身佢地都已經係顏值超高嘅女神級人物，但係今日第一次見到佢地真係打扮起黎，真係靚絕京華。
然後我地就去咗影相，然後就去咗酒店。
細節其實同上次阿王結婚差不多，都係大同小異。
唔同嘅係，今日更加似我地中學嘅聚會，好多好耐冇見嘅中學同學都見得番。
「喂！阿楓好耐冇見！」突然有人叫一叫我。
「你係..阿堅！喂好耐冇見好耐冇見！」
講起上黎，都要多謝佢，唔係得佢借個電話黎，我都聯絡唔到小涼，都唔會有機會俾小涼指出我咁多嘅缺點。
同阿堅傾咗一陣，阿豪就嗌：「阿楓阿堅，你地快啲黎睇下邊個黎咗。」
「喂喂喂！成班嘩鬼好耐冇見！」因為佢出現，我地成班6A嘅都聚曬埋去。
「挑，成日都見架啦，等我仲以為係邊個。」
「死人頭！又串你表姐夫啦！」小涼喺隔離罵我。
冇錯啊，黎嘅人就係阿王，所以我地先聚咗埋去。
「都係小涼有人性！」阿王講，含住兩泡眼淚咁款。
「哈哈，幾時到你地啊？」表姐問，佢都陪埋阿王黎。
上次就係我地去佢地個婚禮，估唔到咁快就幾年，而佢地都仲係如膠似漆。
講到結婚嘅問題，小涼即刻紅都面曬：「唔好講呢啲住啦！」
「怕醜呢..好啦好啦我地去搵阿月影相先。」表姐講，實在太尷尬，呢個圓場係由佢自己打番。
突然，所有人都聚焦喺個入口…
「咯咯咯..」清脆嘅高跟鞋聲徐徐響起，吸引眾人嘅目光。
而令我注意嘅，當然係佢果張久違而又熟悉嘅面孔。
「嗨，咁多位！」
「小霖！！」個個都嗌佢。
闊別幾年，小霖外表冇乜大轉變，依然好外冷內熱嘅感覺。不過人大咗，識打扮咗，配搭埋一陣陣成熟嘅韻味，起碼比以前吸引咗兩倍。
雖一美中不足嘅係..始終避唔過產生一種陌生感。
「咁耐唔見，去咗邊啊？」執邊啲花生友問。
呢幾年我除咗可以喺IG睇到佢嘅近況，就無辦法知道佢嘅消息。
「冇啊，除咗做嘢，得閒周圍去囉，頭先都係啱啱落機。」佢講。
「小霖..」小涼眼濕濕咁嗌住佢。
「小涼，好耐冇見。」佢地久別重逢就攬住咗，可能一個擁抱比起千言萬語更容易表達情感。
「嗨，阿楓。」之後佢都有同我打招呼。
「小霖..你好。」
我對住佢笑一笑，雖然我有好多嘢想同佢講，但係唔知點解呢一刻都講唔出口。
「係呢，小霖你有冇男朋友啊？」唔知邊條水魚問咗條咁嘅問題，不過我都想知。
「我..有啊，佢住我隔離架，朝見口晚見面就..」佢提起佢男朋友，就好冧咁笑。
「真係好啊，你終於搵到你嘅幸福。」阿晴突然標出黎講，其實唔止佢，其餘三個主角都行咗過黎。
「阿晴！阿靜！」佢行過去攬住佢地，三個都喊咗出黎，中學嘅友誼唔怪得咁
彌足珍貴。
我地喺隔離都睇到眼濕濕。
「恭喜你地啊，估唔到你地可以行到最後。」佢講。
「所以你咁忙要黎飲囉！冇咗你點得！」阿月講。
「好啦，開始入席啦，搵番你地嘅位坐啦。」阿言講，佢越來越成熟了。
「能夠娶到佢…」佢地輪流喺台上面致詞，身為佢地愛情長跑嘅見證者，我心底裏一直有種好抽搐嘅感覺，冇法，我真係太感動太感動。
佢地兩pair人搞婚禮，一定係世紀嘅婚禮，因為阿月阿靜阿言都係有家底嘅，喺個婚禮一定唔會用得少錢。
亦都證實咗，只要係有心，就算好似阿言同阿晴呢對王子與灰姑娘，都係可以突破所有困難，喺埋一齊。
當然佢地都有佢地面對嘅問題，但係見到佢地可以修成正果，真係非常開心。
亦令我突然萌生咗一種念頭。