我只不過喺自修室溫書，點知比我遇番佢。: 給阿楓的信

給阿楓的信
 
當你見到呢封信，你唔洗搵我啦，我已經搬走咗，成個新界區咁大，你都唔會知我搬到去邊，至於電話..我都唔會聽。
 
其實搬屋嘅決定係我父母決定，因為係工作關係。
 
我開頭有諗住話俾你聽，但係後來都係覺得呢個係一個好機會。
 
我已經決心去離開你、忘記你。離開我地由細到大成長嘅地方，忘記對你嘅愛。
 


我曾經以為自己可以忘記你，去接受阿豪，後來發現，就算我同佢一齊，我諗嘅都係你。而且成日見住你同小涼一齊，我嘅醋意根本好難去消除。
 
我以為我可以默默咁祝福你地，只要喺你身邊就夠，但係由得到一個旅行嘅機會。
 
開頭我一直遏止自己嘅欲望，不過一望到你，我就不由自主咁，想佔有你，想同你一齊。
 
其實果次旅程我真係好開心，好似發咗場夢咁。
 
無論係幫你抹汗，幫你吹頭，瞓喺你身邊，同你影相，我中暑你照顧我，幫我拎行李，每一件事我都永遠唔會忘記。
 


但係夢歸夢，番到香港就要夢醒，我知道嘅。
 
自從你同小涼鬧交，我一直都好自責，我覺得係我間接拆散你地咁。特別係見到你一日樵粹過一日。
 
所以我已經幫你同小涼解釋清楚，我知道我唔同佢講清楚，以你性格你可能一世都唔會搵番佢，你條廢紙！
 
你要記住我係全世界最了解你嘅人！
 
我終有一日會番黎，當我已經忘記你嘅時候！
 


希望果陣係黎出席你地嘅婚禮。
 
放心啦，我都會去追尋我嘅幸福。
 
願我的出現會成為流星，在你生命旅程中留下軌跡。
 
小霖上