我只不過喺自修室溫書，點知比我遇番佢。: <六十一>小霖的感覺(一)
個老司機車咗我地去逢甲夜市，呢個應該係我地成個旅程最後一個逢甲夜市，玩咗成日大家都好餓，特別係小霖，所以我地都迫不及待去搵嘢食。
「點啊，好啲未？」我問佢。
「好好多啦，冇乜嘢啦。」見佢面色好番啲先放心。
「下次唔好再咁傻啦，我大男人一個餓少少有咩所謂。」
「知道啦..」佢就好似隻小雀咁講，十分緬婰。
「喂，一齊黎影幅相啦，話曬最後一晚！」阿豪叫，我地都簇擁住佢，影咗幾張相，為我地嘅旅程留下美好嘅終結。
番到去之後，我繼續同小涼whatsapp。
「聽日終於番啦…好唔捨得。」我講。
「唉..好掛住你啊，但係聽日到我走，仲未有得見..」
「係喎..又會咁啱我番黎你走嘅？你幾點機啊？」
「晏就兩點啊，我上機你都未翻到啦。」
「咁唯有你番黎先再見啦。」
我打完之後，小霖就沖完涼出黎，沖完涼出黎嘅佢真係好迷人，我驚我再望住佢會暴斃，但係偏偏好似有種引力令我移唔開視線。
「做咩係咁望住我啊？」佢哄個頭埋黎問，嘩，救命。
「冇..冇啊，諗緊嘢之麻。」搞到我鬼死咁緊張。
「唔捨得我啊？」
「點會啊，番到香港可以成日見啦，住咁近。」
「但係冇得再同我瞓啦喎..」
「亂講嘢啦，我去沖涼啦。」喺呢個咁具挑逗性嘅環境同氛圍之下，我再唔走我驚我會失守。
入到去之後我係咁用凍水沖自己，令自己冷靜落黎。
.
.
.
呢個時候，小霖正喺到埋頭睇緊啲嘢..
-----------------------------------------------------------------------
小霖視角
我一直有打日記嘅習慣，將每一樣嘢都寫得清清楚楚，我驚第時會唔記得。
聽日已經係旅程最後一日，所以我喺到睇番自己打過嘅嘢，回味番呢幾日嘅時光...
「台灣 we are coming！！」我地一到咗，阿豪就大叫，其實我都好期待，因為終於可以放鬆下。
今次阿靜同小涼冇去，我知我咁諗係自私啲，但係希望今次可以同阿楓玩得開心啲，為我自己留下一個美好嘅回憶。
「去到先算啦，gogogo！」唔知阿月同阿楓講緊咩呢，佢好似好興奮咁。
喺飛機上面我同阿晴仲有子妮坐，我地三個由以前就好friend，咩都拎出黎一齊講。
「你地正啦，可以同阿言阿星一齊玩，羨慕死人啦。」我講。
「唔係你拒絕阿豪你都得架。」子妮講。
「都話冇..」
「冇感覺啊嘛。」佢地兩個異口同聲咁講。
「唔好以為我地唔知啦，其實你仲未放低阿楓就真。」阿晴講。
「放唔放低有咩所謂呢，見佢而家開開心心咪得。」
「你地唔好同佢亂講啊，我唔想影響到佢地，我只係想做佢青梅竹馬就算。」
我真係唔想影響到佢地，所以我盡量都想遏止自己嘅感覺，唔可以太過自私。
「得啦得啦，邊個唔知你汪大小姐一向將捨己為人嘅精神發揮到極致姐？」
有咁了解自己嘅朋友真係好。
去到民宿之後，我地喺到分房，啲男仔自己分好咗，淨低阿楓一個，所以我就..
「唔緊要啦..咁我同你同房囉..」我同佢講。
「你唔介意我都冇所謂啦！」
已經唔知幾耐冇同過佢瞓教，但係隔咗咁多年，咩感覺都唔同曬..至少我對佢嘅感覺係咁。
「得一張雙人床咋喎...」佢講。
「都要照瞓架啦...」
「一係我瞓地下，俾你瞓床啦。」
「呢到仲邊有地鋪俾你鋪姐，一齊瞓啦，地下都凍。」我承認係我想留住佢喺身邊。
「噢..好啊..」好彩佢都肯。
「我沖涼先啦咁！」我講。
「哦..」
「做咩姐你，呆曬咁？」佢呆下呆下個樣真係好搞笑。
「冇..冇嘢啊，我去搵阿月佢地啦咁。」
「嗯，咁我沖完過黎搵你地啦。」
我沖完之後就到佢沖，隔咗一陣之後..
「沖完啦？」我問。
「你估下。」
「啊，玩我啊！」
「喂！」佢上床之前我喝住佢。
「做咩啊？」
「吹咗頭先啦！攝親架會！」佢以前都已經試過。
「唔會啦，平時都係咁。」
「唔得！吹頭！」我堅持，我唔想佢呢幾日都病。
「唔吹！」
「吹啊！ ！」我拉起佢，然後拎起風筒幫佢吹頭。
「啊...我自己吹得啦。」
「幫你吹埋啦，費時你一陣又吹唔乾。」佢份人就最大意架啦，都係我照顧佢穩陣啲。
「記唔記得你都幫我吹過頭？」佢突然問我。
「記得啊，果次auntie係都要你吹咗頭先食飯，你個百厭星死都唔聽。」
「之後我又被你拉咗入廁所吹頭。」估唔到佢又記得。
「估唔到你咁多年都係咁，咁鬼懶！吹完啦，瞓啦！」
我突然有一個想法..
佢熄咗燈之後就上咗黎，看似寧靜嘅時刻，正正諷刺緊我思緒嘅凌亂，我竟然同佢..瞓埋同一張床。
「估唔到我地仲有機會瞓埋一齊。」我有感而發。
「細個瞓一齊就冇所謂啦，大個就..」
「點解大個咗就有所謂？人大咗就一定會變？」其實我係問緊自己，如果我鐘意嘅唔係佢幾好呢？
「下...」
「阿楓啊 。」
「嗯？」
「呢幾日可唔可以同我做一件事？」
「做咩啊？」
「不如我地一齊搵番啲細個嘅回憶啊。」
「喺台灣搵細個嘅回憶？」
「搵回憶唔係睇喺邊嘅，睇同邊個架姐。」我望住佢講，我真係好想好想搵番果種感覺。
「啊..你話點就點啦..」佢開頭有啲猶豫，但係好彩都肯。
「好耶！咁瞓啦，夜啦，早抖！」我唔想俾佢見到我咁興奮..你當我怕醜。
不過聽到佢話好我真係好開心，亦都好期待！
「Woww！」第二朝起身，我突然聽到有人大嗌。
「做咩啊..」我問，當我有意識果陣就見到阿月同阿豪拎住部電話。
原來我瞓咗喺阿楓胸膛上面，我都唔察覺添。
「啊..sorry..」佢發現之後即刻縮番開手。
「唔…唔..緊要。」
「你兩個快啲啦，就走啦，唔好嘥時間啦。」阿言上黎嗌我地。
「啊...頭先真係..唔好意思..。」佢講，我地果陣都有種好難形容嘅尷尬..
「唔緊要...我去刷牙先！」我即刻借啲意跑入廁所，掩飾尷尬。
「喂！」佢突然嗌住我。
「係！」
「你未拎牙刷。」唉啊..好樣衰啊！真係想搵窿捐啊！
「係喎..哈哈！」
入到廁所之後，我整理好思緒，就已經決定好，今日先真正嘅第一日，唔可以俾頭先嘅事影響到我地嘅關係，要珍惜同佢每一分每一秒。
由民宿行去林百貨真係好遠距離，行到我地每個人都身水身汗。到咗之後阿楓就想即刻沖入去吹冷氣，經過上次佢病，我唔想佢再次因為吹到冷氣而病。
所以我就即刻扯住咗佢。
「喂！又試唔抹汗就入冷氣地方！」
之後我好熟手咁拎張紙巾幫佢抹汗，一幕幕往事又浮現喺我腦海，無論係佢細個學完波，定還是佢放學打完波。
曾經因為呢啲回憶，我以為我喺佢心中係獨一無二嘅存在，但係後來先知我錯咗。
「眾目睽睽..會唔會唔係咁好啊？」佢問。
「一陣你真係病咗我唔會照顧你架喎，況且..你唔記得尋晚應承咗我啲咩啦？」
「但係..」
「入得去啦，行啦。」
入到去之後我就俾五花八門嘅貨品所吸引，好多好靚嘅手作作品啊！
「呢個咕塾好得意啊，有個人頭嘅。」我講，上面有個好可愛嘅卡通人像。
阿楓望住個咕塾呆咗咁，佢應該又諗起小涼吧..
「阿楓，阿楓！你諗緊咩啊？」我問佢。
「冇..冇啊，真係幾可愛喎，哈哈。」好心不在焉啊..
我地走咗之後，食咗啲嘢就去咗「藍曬圖」，果到真係個藍色天堂，入到去我都覺得空氣清新好多。
去到每一個角落，我都想同阿楓影一幅相，留低一個個印記，縱使喺佢心目中或者唔算得係乜，但對我黎講每張相都比黃金更加珍貴。
入夜之後仲靚，果到頂層係一個藍色世界，有好多藍色吊燈整成嘅一個區域，極之浪漫。
「我地影相啊，阿楓！」見到咁靚嘅畫面，我都唔想放過。
「又影？影咗好多啦喎。」
「快啲啦快啲啦。」
「你洗唔洗係咁睇番啲相啊？」佢問。
「一係就咁多年都唔影，一係就影咁多，係要睇清楚啦！」呢個係真心嘅，我唔知幾時先可以再有機會同佢影咁多相。
「你睇下呢張！你好似狗仔咁俾我摸住個頭，同細個有張相一樣架！」
「俾我睇過..係喎，果張相我仲放咗喺屋企。」
「我電話有啊！」
我開番個drive畀佢睇。我將好多細個嘅相都放咗入去，好多都有阿楓同我一齊影。
「你啲相都有好多我出現，哈哈。」佢都有咁嘅感覺。
「我人生都係有住你架啦...」我講..我講得好細聲。我好想好光明正大咁講呢句俾佢聽，但係以我嘅身份..唔容許我咁做。只可以鬼鬼祟祟咁講。
「下？」佢好似真係聽唔到。
「冇嘢啦，我地繼續行啦，哈哈。」
我一路撓住佢隻手行，我個心一直有種聲音叫我放手..但係我總做唔出。
我覺得喺飛機上面果個遏止自己嘅聲音漸漸消失..反而令我更加痛苦同矛盾。
喺大東夜市，阿楓見到咩好食嘅都影俾小涼睇，佢每影一張相都仿佛喺到提醒我，我地嘅關係。
「成班得番你有人性！」得番我陪佢等雞排，呢個係我地獨處嘅機會，我冇辦法放棄。
「你咪當俾佢地拍下拖囉。」但係唔通我又真係講出口咩。
「咁你呢？我就因為小涼黎唔到先焗住一個姐，真係唔諗住搵番件？」我只係怕搵唔到一個好似你咁對我嘅人。
「咁阿豪夠係單身啦。」
「佢同我地玩開嘛，況且係你唔接受佢。」
「怪我嚕。」
「你咁多裙下之臣都睇唔上？」佢地點同你比？
「個個都係以貌取人，都唔係真係鐘意我。」但係偏偏最了解我嘅，就唔係鐘意我嘅。
「咁鬼叫你生得靚，鐘意你性格嘅你又唔鐘意。」
「可能喺個trip我就搵到呢。」
「你再係咁痴住我搵到就奇啊！」有得揀我都唔想走…
「嫌我煩啦加陣！」我要仍然保持住..好朋友嘅角色。
「唔玩啦 ，有得食啦！」佢好快就拎黎食，成個大細路咁，但係睇落都..好辣。
「你試下 ！」佢隊埋黎。
「下…」佢明知我唔食得辣架…
「下咩啊，快啲啦，好正。」算啦，費時佢失望，死就死啦。
「咳咳咳，嘩好辣！」我即刻咳咗出黎，真係好辣。
「傻咗咩，唔食得就唔好隔眼。」你高興我有咩所謂。
我即刻飲兩啖手上杯金桔檸檬止辣，之後死頂：「唔係啊，都幾好食。」
其實我條脷已經痺曬啦…
「唔食得辣就..咳咳咳！」個傻佬又啃親，哈哈。
「唉，冇嘢啊？」
「飲啖嘢啦！」我遞咗杯嘢飲俾佢，佢諗都冇諗就飲咗先。
「點解你食嘢咁易啃親架？以前食麥當勞又係咁。」由細到大都係咁，傻仔。
「唉唔好提，都唔明食個薯條都會啃到，我又同你夾份食一個開心樂園餐，搞到得一杯嘢飲。」諗番起都好好笑，佢又要貪快幾條幾條咁食，百厭到。
不過佢唔咁白痴..又洗乜需要我..？
「咪又係我杯嘢飲救咗你！」
「係啦..叻啦，去搵佢地啦。」佢之後跑走咗。
「呃！打完齋唔要和尚！」
但係我知道..佢一定記錯咗小涼先係食辣果個。果然喺佢心目中，我已經冇小涼咁重要了嗎？